দেশত শেহতীয়াকৈ মুছলমান সম্প্ৰদায়ৰ বিৰুদ্ধে উদ্বেগজনকভাৱে বৃদ্ধি পাই অহা সাম্প্ৰদায়িক ভাবুকিৰ তথা মন্তব্যৰ মাজতে এক গুৰুত্বপূৰ্ণ স্থিতি গ্ৰহণ কৰিছে উচ্চতম ন্যায়ালয়ে।
উচ্চতম ন্যায়ালয়ে কিছুদিন পূৰ্বে উত্তৰাখণ্ড আৰু হিমাচল প্ৰদেশত উগ্ৰ হিন্দুত্ববাদী এচাম ধৰ্মগুৰু তথা নেতাই মুছলমান সম্প্ৰদায়ৰ বিৰুদ্ধে কৰা সাম্প্ৰদায়িক ঘৃণা ভাষণ সন্দৰ্ভত ৰাজদুখনৰ চৰকাৰলৈ সতৰ্কবাণী প্ৰেৰণ কৰিছে।
“যদি ঘৃণামূলক ভাষণ বন্ধ কৰা নহয়, তেন্তে উত্তৰাখণ্ডৰ মুখ্য সচিবক দায়বদ্ধ কৰা হ’ব। আমি মুখ্য সচিবক আদালতলৈ মাতি আনিম।”- উচ্চতম ন্যায়ালয়ৰ বিচাৰপীঠে কয়।
ঘৃণামূলক ভাষণ সন্দৰ্ভত উচ্চতম ন্যায়ালয়ৰ নিৰ্দেশনা অনুসৰণ কৰিবলৈ পৰামৰ্শ আগবঢ়ায় শীৰ্ষ আদালতে। লগতে ঘৃণামূলক সাম্প্ৰদায়িক ভাষণ বন্ধ কৰিবলৈ প্ৰয়োজনীয় সকলো পদক্ষেপ গ্ৰহণ কৰিবলৈ চৰকাৰক নিৰ্দেশ দিয়ে ন্যায়ালয়ে।
আন এক পৃথক শুনানিত উচ্চতম ন্যায়ালয়ে এই মাহৰ আৰম্ভণিতে হিমাচল প্ৰদেশ চৰকাৰক ৰাজ্যখনত অনুষ্ঠিত হোৱা এটা অনুষ্ঠানক সন্দৰ্ভত তীব্ৰ ভৎসৰ্না কৰে।
উক্ত অনুষ্ঠানত মুছলমানসকলৰ বিৰুদ্ধে আয়োজকসকলে সাম্প্ৰদায়িক ভাবুকি প্ৰদান কৰাৰ লগতে হিন্দুসকলক হিংসাৰ আশ্ৰয় ল’বলৈ আহ্বান জনাইছিল।
“চৰকাৰে এনে কাৰ্যকলাপ বন্ধ কৰিব লাগিব। এই ক্ষেত্ৰত কোনো প্ৰতিৰোধমূলক ব্যৱস্থা লোৱা হৈনে নে এই বিষয়ে ৰাজ্য চৰকাৰে আমাক জনাব লাগিব।”- ন্যায়ালয়ে কয়।
লগতে আদালতে শাসনাধিষ্ঠ বিজেপি চৰকাৰক সাম্প্ৰদায়িক বক্তব্যৰে উত্তেজনাপূৰ্ণ পৰিস্থিতিৰ সৃষ্টি কৰিব বিচৰা বক্তাৰ বিৰুদ্ধে কিয় তৎক্ষণাৎ পদক্ষেপ লোৱা নাই এই বিষয়তো প্ৰশ্ন উত্থাপন কৰে।
ৰাজ্য চৰকাৰক সতৰ্ক কৰি বিচাৰপীঠে কয়, “চৰকাৰে ৭ মে’ৰ ভিতৰত এখন শপতনামা দাখিল কৰিব লাগিব। লগতে এনে ঘটনা প্ৰতিৰোধ কৰিবলৈ কি পদক্ষেপ লোৱা হৈছে সেয়া আমাক জনাব লাগিব।”
“এনেধৰণৰ ঘটনাবোৰ হঠাতে নহয়। এইবোৰৰ আগতীয়াকৈ পৰিকল্পনা কৰা হয়। চৰকাৰে লগে লগে কিয় কোনো পদক্ষেপ গ্ৰহণ কৰা নাছিল? উচ্চতম ন্যায়ালয়ৰ ইতিমধ্যে এই সন্দৰ্ভত নিৰ্দেশনা আছে।”— ন্যায়াধীশসকলে লগতে কয়।
উল্লেখ্য যে যোৱা ডিচেম্বৰত বিজেপি শাসিত উত্তৰাখণ্ডৰ হৰিদ্বাৰত অনুষ্ঠিত তিনিদিনীয়া ধৰম সংসদত কেইবাগৰাকীও হিন্দুত্ববাদী ধৰ্মগুৰুৱে মুছলমানসকলৰ বিৰুদ্ধে ঘৃণামূলক ভাষণ দিয়াৰ লগতে মুছলমানক হত্যাৰ বাবে হিন্দু ধৰ্মাৱলম্বীক অস্ত্ৰ তুলি ল’বলৈ আহ্বান জনাইছিল।
চলিত মাহৰ আৰম্ভণিতে অনুষ্ঠানটোৰ এজন মুখ্য উদ্যোক্তা য়াতি নৰসিংহানন্দই জামিনৰ চৰ্তাৱলী উলংঘা কৰি হিমাচল প্ৰদেশৰ উনাত ধৰ্মীয় সন্মিলনত বক্তব্য ৰাখিছিল।
উক্ত অনুষ্ঠানতো নৰসিংহানন্দই হিন্দুসকলক অস্ত্ৰ তুলি মুছলমান গণহত্যাৰ মুকলি আহ্বান জনাইছিল।
