বছৰৰ শেষৰ দিনটোত মঙলবাৰে মণিপুৰৰ হিংসাত্মক ঘটনাক লৈ বিজেপিৰ মুখ্যমন্ত্ৰী এন বীৰেণ সিঙৰ বিবেক সাৰ পাই উঠিল। আজিৰ দিনটোতে মণিপুৰৰ জাতিগত দাঙ্গাত বহু লোকৰ মৃত্যু আৰু হাজাৰ হাজাৰ গৃহহীন লোকৰ বাবে তেওঁ অনুশোচনা অনুভৱ কৰে বুলিও তেওঁ কয়। ৰাজ্যবাসীৰ ওচৰত ক্ষমা বিচাৰে। এই গোটেই বছৰটো অতি দুৰ্ভাগ্যজনকভাৱে পাৰ হৈ গ’ল বুলি বছৰৰ শেষৰ সংবাদমেলত মুখ্যমন্ত্ৰীয়ে প্ৰথমবাৰৰ বাবে কয়। মই অনুশোচনা কৰিছো আৰু ২০২৩ চনৰ ৩ মে’ৰ পৰা সংঘটিত হোৱা সকলো ঘটনাৰ বাবে ৰাজ্যবাসীৰ ওচৰত ক্ষমা বিচাৰিছো।
বীৰেণ সিঙৰ এই মন্তব্যৰ কিছু সময়ৰ পাছতেই কংগ্ৰেছে প্ৰধানমন্ত্ৰী নৰেন্দ্ৰ মোদীৰ বিৰুদ্ধে হুলস্থুলীয়া পৰিৱেশৰ সৃষ্টি কৰে। দলৰ সাধাৰণ সম্পাদক জয়ৰাম ৰমেশে X ত লিখিছে, যদি মুখ্যমন্ত্ৰীয়ে ক্ষমা খুজিব পাৰে, তেন্তে প্ৰধানমন্ত্ৰী মোদীয়ে মণিপুৰলৈ গৈ কিয় কৰিব নোৱাৰে? ৰমেশৰ প্ৰশ্ন, প্ৰধানমন্ত্ৰীয়ে কিয় মণিপুৰলৈ নাযায় আৰু একো নকয়?
প্ৰসংগক্ৰমে পাহাৰীয়া অঞ্চলৰ কুকি জনগোষ্ঠী আৰু উপত্যকা অঞ্চলৰ মেইটেই জনগোষ্ঠীৰ সংঘাতৰ বাবে প্ৰায় ডেৰ বছৰ ধৰি মণিপুৰত জুই জ্বলি উঠিছিল। লোকসভাৰ অন্তিম শীতকালীন অধিৱেশন পৰ্যন্ত মণিপুৰক লৈ চলি থকা ৰাজনৈতিক হুলস্থুল আলোচনাৰ কেন্দ্ৰবিন্দু আছিল। মণিপুৰ চম্ভালিব নোৱাৰাৰ বাবে মুখ্যমন্ত্ৰী এন বীৰেণ সিঙৰ পদত্যাগৰ দাবী কেইবাবাৰো উত্থাপন হৈছে। কিন্তু প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহৰ চকুত পৰা বীৰেণ সিঙক কেন্দ্ৰই পদত্যাগ বা অপসাৰণ কৰা নাছিল বুলি অভিযোগ উত্থাপন কৰে কংগ্ৰেছে। ২০২৪ চনৰ অন্তিম দিনটোত মুখ্যমন্ত্ৰীয়ে হঠাতে ক্ষমা খুজিছিল।
