প্ৰধানমন্ত্ৰী নৰেন্দ্ৰ মোদীয়ে আজি অল ইণ্ডিয়া ৰেডিঅ’ যোগে প্ৰচাৰ কৰে ৮৩ সংখ্যক মন কী বাত অনুষ্ঠান। মোদীয়ে তেওঁৰ ভাষণত বিভিন্ন বিষয়ৰ লগতে এক বিশেষ বিষয়ো উপস্থাপন কৰে।
মোদীয়ে তেওঁৰ ভাষণত মেঘালয়ৰ ‘উৰি থকা নাৱ’ৰ প্ৰসংগ উল্লেখ কৰি কয় যে ইণ্টাৰনেটত ভাইৰেল হোৱা মেঘালয়ৰ উৰন্ত নাৱে প্ৰথম দৃষ্টিতে সকলোকে আকৰ্ষণ কৰিবলৈ সক্ষম হয়।
মেঘালয়ৰ উমগট নদীৰ পানী ইমানেই পৰিষ্কাৰ যে তাত চলোৱা নাৱবোৰক শূন্যতে উপঙি থকা যেনহে লাগে। মোদীয়ে দেশৰ প্ৰান্তে প্ৰান্তে এনে প্ৰাকৃতিক বৈচিত্ৰ্য থকা বুলিও মন্তব্য কৰে।
মোদীয়ে অষ্ট্ৰেলিয়াৰ পাৰ্থৰ এগৰাকী মহিলাৰ নাম বিশেষ ভাবে উল্লেখ কৰি কয় যে জাগৃতি দাসী নামৰ এইগৰাকী মহিলাই অষ্ট্ৰেলিয়াৰ পাৰ্থত গঢ়ি তুলিছে এখন মিনি ‘বৃন্দাবন’।
১৯৭০ চনত জাগৃতি দাসী নামৰ মহিলা গৰাকীয়ে ইস্কনৰ সৈতে জৰিত হৈ পৰিছিল আৰু উত্তৰ প্ৰদেশৰ বৃন্দাবনলৈ আহিছিল। তেওঁ বৃন্দাবনত প্ৰায় ১৩ বছৰ কটাই পুনৰ নিজৰ দেশ অষ্ট্ৰেলিয়ালৈ উভতি গৈছিল।
অষ্ট্ৰেলিয়াৰ পাৰ্থত থাকিবলৈ লোৱাৰ পিছতো জাগৃতি দাসী নামৰ মহিলাগৰাকীৰ মনৰ পৰা বৃন্দাবনৰ স্মৃতি মচ খাই যোৱা নাছিল। বৃন্দাবনৰ স্মৃতিক জীৱন্ত কৰি ৰখাৰ বাবেই তেওঁ পাৰ্থত এটা আৰ্ট গেলেৰী আৰম্ভ কৰিছিল।
এই গেলেৰীতে তেওঁ ৰং-তুলিকাৰে জীৱন্ত কৰি তুলিছিল বৃন্দাবনক।
বৃন্দাবনৰ বিতোপন দৃশ্যৰাজি তেওঁ চিত্ৰ মাধ্যমেৰে ধৰি ৰাখি কৃষ্ণ ভক্তিত গদ গদ হৈ আহিছে বুলি মোদীয়ে তেওঁৰ ভাষণত উল্লেখ কৰে।
মোদীয়ে জালাউনৰ এখন নদীৰ কথা উল্লেখ কৰি কয় যে জালাউনৰ নুৰ নদী খন বিলুপ্ত হৈ গৈছিল। কিন্তু অঞ্চলৰ ৰাইজে লগ লাগি নদী খনক পুনৰুদ্ধাৰ কৰিছে। চব কা সাথ চব কা বিকাশৰ এয়া এক সুন্দৰ উদাহৰণ বুলি মোদীয়ে উল্লেখ কৰে।
