বৰপেটা জিলাৰ বৰপেটাৰোডত আজি সংঘটিত হোৱা এক শোকাৱহ পথ দুৰ্ঘটনাত এজন লোকৰ থিতাতে মৃত্যু হয়।
মৃত্যু হোৱা লোকগৰাকী বৰপেটাৰোডৰ সূৰ্য্য নগৰৰ বাসিন্দা শ্যাম সুন্দৰ শীল বুলি জানিব পৰা গৈছে। উত্তৰ-পূব সীমান্ত ৰে’লৱেৰ অৱসৰপ্ৰাপ্ত কৰ্মচাৰী আছিল শীল।
ঘটনাৰ বিৱৰণী অনুসৰি, আজি দুপৰীয়া শ্যাম সুন্দৰ শীলে ব্যক্তিগত কামত বৰপেটাৰোড আৰক্ষী থানাৰ সন্মুখেৰে খোজকাঢ়ি গৈ থকা অৱস্থাত হঠাৎ এখন তীব্ৰবেগী বাইকে তেওঁক খুন্দা মাৰে। বাইকৰ খুন্দাত গুৰুতৰভাৱে আহত হৈ শীল দুৰ্ঘটনাস্থলীতে ঢলি পৰে।
স্থানীয় ৰাইজে ততাতৈয়াকৈ তেওঁক কাষৰে বৰপেটাৰোডৰ চিকিৎসালয়লৈ লৈ যায় যদিও চিকিৎসকে শীলক মৃত বুলি ঘোষণা কৰে। বাইক চালকগৰাকী শালবাৰীৰ মহাদেৱ বসুমতাৰী বুলি চিনাক্ত কৰিব পৰা গৈছে।
আনহাতে, দুৰ্ঘটনাটোক কেন্দ্ৰ কৰি বৰপেটাৰোডত উত্তেজনাময় পৰিস্থিতিৰ সৃষ্টি হয়। ঘটনাস্থলীত আৰক্ষী উপস্থিত হৈ দুৰ্ঘটনা সংঘটিত কৰা এ এচ ২৮ এ ৮৮৪৪ নম্বৰৰ বাইকখন জব্দ কৰাৰ লগতে মৃত্যু হোৱা লোকজনৰ মৃতদেহ মৰণোত্তৰ পৰীক্ষাৰ বাবে বৰপেটালৈ প্ৰেৰণ কৰে।
প্ৰত্যক্ষদৰ্শীৰ ভাষ্য মতে, বাইক চালকৰ ভূলৰ বাবে দুৰ্ঘটনাটো সংঘটিত হ’য়। ব্যক্তিগৰাকীৰ মৃত্যুত পৰিয়ালৰ লোকৰ মাজত কান্দোনৰ ৰোল উঠে।
