একেখন গাড়ীয়ে বৃহস্পতিবাৰে সন্ধিয়া মাৰ্ঘেৰিটাত তিনিটাকৈ দুৰ্ঘটনা সংঘটিত কৰিছে। এজন লোকৰ মৃত্যু হোৱাৰ লগতে তিনিজন আহত হৈছে।
নিহত লোকজন পাৱৈৰ চাইডিং নিবাসী সঞ্জিত দাস (৫০) বুলি চিনাক্ত কৰা হৈছে।
আহতকেইজনৰ নাম এতিয়ালৈকে জানিব পৰা হোৱা নাই।
ঘটনাৰ বিৱৰণী মতে সন্ধিয়া ৭.৩০ মান বজাত দুৰ্ঘটনা সংঘটিত কৰা মাৰুতি জেন গাড়ীখনে প্ৰথমে মাৰ্ঘেৰিটা থাৰ্মেল তিনিআলিৰ কাষত এজন পথচাৰীক খুন্দা মাৰে।
গাড়ীখন (নং এ এছ ০৬ চি ৮৩২৩) মাৰ্ঘেৰিটাৰ পৰা ডিগবৈ অভিমুখে ৩১৫নং ৰাষ্ট্ৰীয় ঘাইপথেদি তীব্ৰবেগত গৈ আছিল।
তাৰপাছত মাকুম পথাৰ আৰ্মীকেম্পৰ কাষত গাড়ীখনে দ্বিতীয়টো দুৰ্ঘটনা সংঘটিত কৰি তীব্ৰ বেগে আগুৱাই যায়।
আৰু দিহিং চাহ বাগিচাৰ কাষত সঞ্জিত দাস নামৰ লোকজনক প্ৰচণ্ড জোৰেৰে মহটিয়াই নিয়াত ব্যক্তিজন থিতাতে নিহত হয়।
দুৰ্ঘটনা সংঘটিত কৰিয়েই গাড়ীখনৰ চালকজনে পলায়ন কৰে যদিও চালকৰ লগত বহি যোৱা এজন লোক কম বেছি পৰিমাণে আঘাত প্ৰাপ্ত হৈছে।