অষ্ট্ৰেলিয়াৰ সংসদত সংঘটিত হৈছে এটা লজ্জাজনক ঘটনা।
দেশখনৰ ৰক্ষণশীল চৰকাৰৰ এজন বিষয়াই সংসদতে হস্তমৈথুন কৰাৰ এটা লিকড ভিডিঅ’ই চাঞ্চল্যৰ সৃষ্টি কৰিছে।
ভিডিঅ’টোত দেখুৱামতে, বিষয়াজনে এগৰাকী মহিলা সাংসদৰ ডেস্কত গৈ হস্তমৈথুন কৰিছিল।
সোমবাৰে ‘দ্যা অষ্ট্ৰেলিয়ান’ আৰু ‘চেনেল টেন’-এ সম্প্ৰচাৰ কৰা ভিডিঅ’টোৰ বাতৰিটোৰ পাছতে দেশখনৰ প্ৰধানমন্ত্ৰী স্কট মৰিছনে ঘটনাটো ‘অপমানজনক’ আৰু ‘লজ্জাজনক’ হিচাপে অভিহিত কৰিছে।
ভিডিঅ’টো লিক কৰা টম নামৰ লোকজনে কয় যে চৰকাৰী বিষয়া আৰু সাংসদসকলে প্ৰায়ে সংসদৰ প্ৰাৰ্থনাগৃহটো যৌনকাৰ্যৰ বাবে ব্যৱহাৰ কৰে আৰু ৰক্ষণশীল চৰকাৰৰ সাংসদসকলৰ দৈহিক সুখৰ বাবে সংসদলৈ যৌনকৰ্মীসকলকো অনা হয়।
তদুপৰি তেওঁ কয় যে ৰক্ষণশীল চৰকাৰৰ সাংসদসকলৰ এটা সংস্কাৰ আছে যে পুৰুষে যি বিচাৰে তাকেই কৰিব পাৰে।
চৰকাৰে ঘটনাটোৰ সম্পৰ্কে যথোচিত ব্যৱস্থা লোৱাৰ আশ্বাস প্ৰদান কৰিছে।
উল্লেখযোগ্য যে ইতিপূৰ্বে অষ্ট্ৰেলিয়াৰ সংসদত শাসকীয় ৰক্ষণশীল দল ‘লিবাৰেল পাৰ্টি’ৰ প্ৰতিনিধিসকলে সংঘটিত কৰা কেইবাটাও যৌন অত্যাচাৰৰ অভিযোগে দেশখন জোকাৰি গৈছে।
ব্ৰিট্টানী হিগ্গিনছ নামৰ এগৰাকী চৰকাৰী উপদেষ্টা এজন সহকৰ্মীয়ে ধৰ্ষণ কৰাকে ধৰি ৰক্ষণশীল চৰকাৰখনৰ বিৰুদ্ধে কেইবাটাও যৌন নিৰ্যাতনৰ অভিযোগত দেশখন উত্তাল হৈ আছে।
