অহা আগষ্ট মাহৰ পৰা আৰম্ভ হ’ব ‘এক দেশ এক ৰেছন কাৰ্ড’ (One Nation, One Ration Card) আঁচনি।
বৃহস্পতিবাৰে বিত্ত মন্ত্ৰী নিৰ্মলা সীতাৰমণে এই কথা ঘোষণা কৰিছে।
প্ৰধান মন্ত্ৰী নৰেন্দ্ৰ মোদীয়ে ঘোষণা কৰা ‘আত্মনিৰ্ভৰশীল ভাৰত’ আঁচনিৰ পেকেজৰ বাখ্যা আগবঢ়াই বিত্ত মন্ত্ৰীয়ে এই ঘোষণা কৰে।
তেওঁ কয় যে দেশজুৰি আগষ্টৰ পৰা ‘এক দেশ এক ৰেছন কাৰ্ড’ আঁচনি আৰম্ভ হ’ব আৰু ই অহা বছৰৰ মাৰ্চ মাহৰ ভিতৰত সম্পূৰ্ণ কাৰ্যক্ষম হ’ব।
ইয়াৰ দ্বাৰা কোনো উপভোক্তাই দেশৰ যিকোনো অংশৰ ৰেছন দোকানৰ পৰা চৰকাৰৰ নিৰ্দ্ধাৰিত সুলভ মূল্যত খাদ্য সামগ্ৰী ক্ৰয় কৰিব পাৰিব।
এই আঁচনি নিশ্চিত কৰিবলৈ দেশৰ সকলো ৰেছন কাৰ্ডৰ তথ্য এটা চাৰ্ভাৰতে সঞ্চিত কৰা হ’ব।
বিত্ত মন্ত্ৰী সীতাৰমণে আজি কৃষক, হকাৰ, প্ৰব্ৰজিত শ্ৰমিকৰ বাবে মুঠ ৯টা পদক্ষেপৰ কথা ঘোষণা কৰে।
ইয়াৰ ভিতৰত তিনিটা পেকেজ হৈছে প্ৰব্ৰজিত শ্ৰমিকৰ বাবে। দেশৰ যিকোনো অংশৰ পৰা প্ৰব্ৰজিত শ্ৰমিকসকলে ‘এক দেশ এক ৰেছন কাৰ্ড’ৰ জৰিয়তে খাদ্য সামগ্ৰী ক্ৰয় কৰিব পাৰিব।
কেন্দ্ৰীয় চৰকাৰে দেশৰ প্ৰায় ৮ কোটি প্ৰব্ৰজিত শ্ৰমিকৰ বাবে এই আঁচনিত ৩৫০০ কোটি টকা ব্যয় কৰিব।
বিত্ত মন্ত্ৰী সীতাৰমণে লগতে জানিবলৈ দিয়ে,’’আগন্তুক দুমাহ প্ৰব্ৰজিত শ্ৰমিকসকলক বিনামূলীয়াকৈ খাদ্য আগবঢ়োৱা হ’ব। যিসকলৰ কাৰ্ড নাই তেওঁলোককো গাইপতি ৫কিলোগ্ৰাম চাউল বা আটা আৰু এক কিলোগ্ৰাম দাইল দিয়া হ’ব।‘’
আনহাতে, প্ৰধান মন্ত্ৰী আৱাস যোজনাৰ জৰিয়তে শ্ৰমিকসকলৰ বাবে সৰু সৰু ঘৰ নিৰ্মাণৰ কৰাৰ কথা ঘোষণা কৰা হৈছে।
সীতাৰমণে কয়,’’অতি কম পৰিমানে ধন খৰচ কৰি প্ৰব্ৰজিত শ্ৰমিকসকলে সেই ঘৰসমূহত থাকিব পাৰিব।‘’
বিত্ত মন্ত্ৰীগৰাকীয়ে প্ৰব্ৰজিত শ্ৰমিকসকলে যাতে নিজ নিজ ৰাজ্যসমূহলৈ গৈ ১০০ দিনৰ কাম লাভ কৰিব পাৰে সেয়া নিশ্চিত কৰিবলৈ ৰাজ্যসমূহক অনুৰোধ জনাইছে।
বিত্ত মন্ত্ৰীয়ে ১০০দিনৰ এই কামৰ মজুৰি ১৮২টকাৰ পৰা ২০২টকালৈ বৃদ্ধি কৰাৰ কথাও ঘোষণা কৰিছে।
তদুপৰি, বছৰি শ্ৰমিকসকলে এবাৰ স্বাস্থ্য পৰীক্ষা কৰাৰ সুবিধাও লাভ কৰিব বুলি জানিব দিয়ে সীতাৰমণে।
