ভাৰতীয় সংস্কৃতি আৰু পৰম্পৰাৰ বৈচিত্ৰ্য ইমানেই গভীৰ আৰু চহকী যে প্ৰতিখন ৰাজ্যৰ সাজ পোছাক, খাদ্য, আৰু কথা কোৱা শৈলিয়ে এক সুকীয়া পৰিচয় গঠন কৰে।
অসমীয়া পৰম্পৰাগত সাজ পোছাৰ এটি অন্যতম মূল্যৱান প্ৰতীক হৈছে চাদৰ-মেখেলা, যাক এতিয়া বিশ্বজুৰি স্বীকৃতি দিয়া হৈছে। এই পৰম্পৰাগত সাজ পোছাকক বিশ্বব্যাপী স্বীকৃতি দিয়াৰ কৃতিত্ব অসম কন্যা সংযুক্তা দত্তৰ। এগৰাকী উদ্যমী আৰু প্ৰতিভাৱান ফেশ্বন ডিজাইনাৰ হিচাপে তেওঁ অসমৰ হস্ততাঁত শিল্পক বিশ্ব মঞ্চত আগবঢ়াই আনিছে।
সংযুক্তা দত্তৰ সৃষ্টি বিভিন্ন দেশৰ মাজত প্রদৰ্শিত হৈ অজস্ৰ লোকক আকৰ্ষিত কৰিছে। অসমৰ সাংস্কৃতিক পৰিচয়ক বিশ্ববাসীৰ আগত নিখুত ভাবে উপস্থাপন কৰি তেওঁ নিজৰ পৃথক পৰিচয় গঢ়ি তুলিবলৈ সক্ষম হৈছে।
উল্লেখ্য যে, ভাৰতৰ শীৰ্ষ ফেশ্বন ডিজাইনাৰসকলৰ মাজত অসম কন্যা সংযুক্তা দত্ত অন্যতম। আন্তঃৰাষ্ট্ৰীয় খ্যাতিসম্পন্ন অসম কন্যা সংযুক্তা দত্তৰ হস্ততাঁত বস্ত্ৰৰ ডিজাইনে ইতিমধ্যে মুদ্ধ কৰিছে অজস্ৰজনক ।
সংযুক্তা দত্তৰ জন্ম হৈছিল অসমৰ গুৱাহাটীত ৷ অভিযান্ত্ৰিক বিষয়ত অধ্যয়ন কৰিছিল যদিও ফেশ্বন আৰু পৰম্পৰাগত বয়নৰ প্ৰতি সদায় আগ্ৰহী আছিল। ২০১৩ চনত তেওঁৰ ফেশ্বন লেবেল “SANJUKTA” মুকলি কৰে, যাৰ লক্ষ্য হৈছে পৰম্পৰাগত অসমীয়া বস্ত্ৰশিল্পক সমসাময়িক ডিজাইনেৰে বিশ্ববাসীৰ আগত উপস্থাপন কৰা।
অসমৰ সংস্কৃতি আৰু শিপিনীৰ কলাৰ স্বীকৃতি দিয়াৰ উদ্দেশ্যে সংযুক্তা দত্তই, বহু মঞ্চত চাদৰ-মেখেলাক আধুনিক ৰূপত উপস্থাপন কৰিছিল। যেনে- লণ্ডন ফেশ্বন উইক, ইয়াত সমযুক্তাই চাদৰ-মেখেলাক আধুনিক পশ্চিমীয়া কাট দিছিল, যিয়ে পশ্চিমীয়া দৰ্শককো আকৰ্ষণ কৰিছিল ৷ হলিউড আৰু বলিউডৰ বহু বিখ্যাত চেলিব্ৰিটিয়ে তেওঁৰ দ্বাৰা ডিজাইন কৰা অসমীয়া সাজ-পোছাক পৰিধান কৰি বিশ্ব পৰ্যায়ত ইয়াৰ স্বীকৃতি বৃদ্ধি কৰিছে ৷
লেকমে ফেশ্বন উইক,তেওঁ প্ৰথমবাৰৰ বাবে চাদৰ-মেখেলাক হাই ফেশ্বন প্লেটফৰ্মত উপস্থাপন কৰিছিল, য’ত ইয়াৰ সৌন্দৰ্য্য আৰু মৌলিকতাই সকলোৰে দৃষ্টি আকৰ্ষণ কৰিছিল ৷
সংযুক্তা দত্ত কেৱল এগৰাকী ফেচন ডিজাইনাৰে নহয়, তেওঁ অসমৰ বহুতো শিপিনীক কাম আৰু স্বীকৃতি প্ৰদান কৰিছিল, যাৰ ফলত মহিলাসকল অৰ্থনৈতিক ভাবে স্বাৱলম্বিতাৰ পথ পাইছিল।
সংযুক্তা দত্তই চাদৰ-মেখেলাক নতুন ৰূপ দিছিল, কেতিয়াবা বেল্ট পিন্ধি, কেতিয়াবা জেকেট ষ্টাইলত, কেতিয়াবা স্কাৰ্ট কেতিয়াবা আকৌ ট্ৰাউজাৰ লৈ ৷ এনেদৰে তেওঁ পৰম্পৰাগত সাজ-পোছাক যোৰৰ বিভিন্ন ৰূপ প্ৰদান কৰিছে।
শেহতীয়াকৈ বিশ্বৰ সৰ্ববৃহৎ চলচ্চিত্ৰ মহোৎসৱ ‘কাঁ মহোৎসৱ’ত সংযুক্তা দত্তই ডিজাইন কৰা পোচাকেৰে ৰেড কাৰ্পেটত খোজ দিয়ে মোহময়ী মডেলে। অসমৰ পৰম্পৰাগত চাদৰ-মেখেলাক বিশ্বৰ ফেশ্বন মেপত স্থান দিয়াটো ইমান সহজ কাম নাছিল ৷ কিন্তু সংযুক্তা দত্তই সাংস্কৃতিক মোহ আৰু ফেশ্বনৰ গভীৰ বুজাবুজিৰে ইয়াক সম্ভৱ কৰি তুলিলে।
এই কামৰ ফলত সংযুক্তা দত্তই বহু ৰাষ্ট্ৰীয় আৰু আন্তঃৰাষ্ট্ৰীয় মঞ্চত প্ৰশংসা লাভ কৰে ৷ ইয়াৰ উপৰিও উত্তৰ-পূব ফেশ্বন এক্সেলেন্স বঁটা, বোগ ইণ্ডিয়াত ফিচাৰ, ফেমিনা পাৱাৰ লিষ্ট, বঁটা লাভ কৰিছে।
