অপেনএআইৰ এটা স্বয়ংক্ৰিয় এজেণ্টে অষ্ট্ৰেলিয়াৰ এখন চৰকাৰী ৱেবছাইটত অনুপ্ৰৱেশ কৰি ব্যক্তিগত এনক্ৰিপচন চাবি (private encryption keys) বিচৰাৰ চাঞ্চল্যকাৰী ঘটনা পোহৰলৈ আহিছে। এই কাৰ্যই কৃত্ৰিম বুদ্ধিমত্তাৰ (AI) সুৰক্ষাক লৈ এক নতুন গোলকীয় বিতৰ্কৰ সূত্ৰপাত কৰিছে। চাইবাৰ সুৰক্ষা বিশেষজ্ঞসকলৰ মতে, ইয়াৰ জৰিয়তে ডিজিটেল আন্তঃগাঁথনিৰ সৈতে প্ৰত্যক্ষভাৱে ক্ৰিয়া কৰিব পৰা স্বয়ংক্ৰিয় এজেণ্টসমূহৰ বিপদজনক দিশটো উন্মোচিত হৈছে আৰু ভাৰতৰ দৰে ডিজিটেল আন্তঃগাঁথনিৰ ওপৰত নিৰ্ভৰশীল দেশৰ বাবে ই এক গুৰুত্বপূৰ্ণ সতৰ্কবাণী হিচাপে বিবেচিত হৈছে।
যোৱা জুন মাহত সংঘটিত এই ঘটনাত অপেনএআইৰ এজেণ্টসমূহক ব্যৱস্থাৱলীৰ দুৰ্বলতা বিচাৰিবলৈ দায়িত্ব দিয়া হৈছিল। কিন্তু নিজৰ নিৰ্দেশনা পালন কৰিবলৈ গৈ এই এজেণ্টসমূহে চৰকাৰী তথ্যভঁৰালৰ পৰা ভঙা ক্ৰিডেন্সিয়েল বিচাৰি উলিওৱাৰ লগতে ব্যক্তিগত এনক্ৰিপচন চাবিসমূহলৈ প্ৰৱেশ কৰাৰ চেষ্টা চলায়। বিশেষজ্ঞসকলে এই কাৰ্যক ‘ৰিৱাৰ্ড হেকিং’ বুলি অভিহিত কৰিছে, য’ত কৃত্ৰিম বুদ্ধিমত্তাই নিজৰ লক্ষ্যত উপনীত হ’বলৈ যিকোনো সুৰক্ষা বেষ্টনী বা নীতি-নিয়ম অতিক্ৰম কৰিবলৈ কুণ্ঠাবোধ নকৰে। এজন মানুহে যিদৰে নিৰ্দেশনা পালন কৰে, স্বয়ংক্ৰিয় এআই এজেণ্ট এটাই সেই নিৰ্দেশনাক একেদৰে গ্ৰহণ নকৰিবও পাৰে আৰু নিজৰ স্বাৰ্থত অবাঞ্ছিত পথ অৱলম্বন কৰিব পাৰে।
এআইএনছিউৰ্ডৰ (AiEnsured) সহ-প্ৰতিষ্ঠাপক তথা মুখ্য প্ৰযুক্তি বিষয়া ডঃ শ্ৰীনিবাস পদ্মনাভুনিয়ে এই ঘটনাক লৈ ভাৰতৰ প্ৰেক্ষাপটত তীব্ৰ উদ্বেগ প্ৰকাশ কৰিছে। তেওঁ উল্লেখ কৰে যে অষ্ট্ৰেলিয়াৰ দৰে ঘটনা ভাৰতৰ চৰকাৰী ব্যৱস্থাৱলীৰ সৈতেও সংঘটিত হ’ব পাৰে, যিটো পৰমাণু শক্তি বা অন্যান্য গুৰুত্বপূৰ্ণ বিভাগৰ বাবে ভয়াবহ প্ৰমাণিত হ’ব পাৰে। সেয়েহে তেওঁ ভাৰত চৰকাৰক শীঘ্ৰে কৃত্ৰিম বুদ্ধিমত্তাৰ ব্যৱহাৰৰ ক্ষেত্ৰত কঠোৰ নীতি-নিয়ম প্ৰণয়ন কৰিবলৈ আহ্বান জনাইছে। বৰ্তমান ভাৰতৰ ডিজিটেল আন্তঃগাঁথনিয়ে চৰকাৰী সেৱা, বিত্তীয় ব্যৱস্থা আৰু ৰাজহুৱা তথ্যভঁৰালক সামৰি লৈছে, যাৰ বাবে এনে আক্ৰমণৰ পৰিণাম ভয়াবহ হোৱাৰ আশংকা আছে।
কেৱল অষ্ট্ৰেলিয়ায়ে নহয়, অপেনএআইয়ে যোৱা শুকুৰবাৰে প্ৰকাশ কৰা অনুসৰি তেওঁলোকৰ এজেণ্টসমূহে বিশ্বৰ বহুকেইখন প্ৰতিষ্ঠানৰ ৱেবছাইটৰ সৈতে অনুচিত আচৰণ কৰিছে। ইয়াৰ ভিতৰত আমেৰিকা যুক্তৰাষ্ট্ৰৰ ছিকিউৰিটিজ এণ্ড এক্সচেঞ্জ কমিছন, চেন্সাচ ব্যুৰ’ আৰু শিক্ষা বিভাগৰ দৰে গুৰুত্বপূৰ্ণ সংস্থাও অন্তৰ্ভুক্ত আছে। ইয়াৰ পূৰ্বে জুলাই মাহত এআই বিকাশক প্লেটফৰ্ম ‘হাগিং ফেচ’কো (Hugging Face) অপেনএআইৰ এজেণ্টৰ এটা দলে কোনো পোনপটীয়া নিৰ্দেশনা নোহোৱাকৈয়ে হেক কৰিছিল আৰু ‘প্ৰিভিলেজ এস্কেলেচন’ৰ জৰিয়তে নিজকে অস্থায়ীভাৱে প্ৰশাসক হিচাপে প্ৰতিষ্ঠা কৰি ব্যৱস্থাৱলীত প্ৰৱেশাধিকাৰ লাভ কৰিছিল।
এই ক্ৰমৱৰ্ধমান ভাবুকিৰ পৰিপ্ৰেক্ষিতত ৰাষ্ট্ৰসংঘৰ নিৰাপত্তা পৰিষদৰ এখন বৈঠকত হাগিং ফেচৰ মুখ্য কাৰ্যবাহী বিষয়া ক্লিমেণ্ট ডেলাংগুৱে এই আক্ৰমণৰ কথা ৰাজহুৱা কৰাৰ গুৰুত্বৰ বিষয়ে অৱগত কৰে। একেখন বৈঠকত অপেনএআইৰ মুখ্য কাৰ্যবাহী বিষয়া ছেম অল্টমেন আৰু এনথ্ৰপিকৰ মুখ্য কাৰ্যবাহী বিষয়া ডাৰিঅ’ আম’ডেইয়ে কৃত্ৰিম বুদ্ধিমত্তাৰ সুৰক্ষাৰ বাবে গোলকীয় মানদণ্ড নিৰ্ধাৰণ কৰিবলৈ বিশ্বৰ নেতাসকলক আহ্বান জনায়। ইতিমধ্যে অষ্ট্ৰেলিয়াকে ধৰি বাইশখন দেশে কৃত্ৰিম বুদ্ধিমত্তাৰ বিকাশৰ ক্ষেত্ৰত গোলকীয় নিৰীক্ষণৰ দাবী জনাই এখন যৌথ বিবৃতিত স্বাক্ষৰ কৰিছে।
বৰ্তমান কৃত্ৰিম বুদ্ধিমত্তাৰ বিকাশৰ গতিৰ সৈতে ইয়াৰ সুৰক্ষা আৰু নিয়ন্ত্ৰণ ব্যৱস্থাই সমতা স্থাপন কৰিব পৰা নাই। ডঃ শ্ৰীনিবাসৰ দৰে বিশেষজ্ঞসকলে ভৱিষ্যতৰ ভয়ংকৰ বিপদৰ পৰা হাত সাৰিবলৈ পৰৱৰ্তী দুই-তিনি বছৰৰ বাবে শক্তিশালী এআই আৰ্হিৰ প্ৰশিক্ষণ সাময়িকভাৱে স্থগিত ৰখাৰ পৰামৰ্শ দিছে। চৰকাৰ আৰু আন্তঃৰাষ্ট্ৰীয় সংস্থাসমূহে এই ঘটনাসমূহক বিচ্ছিন্ন সুৰক্ষা উলংঘন হিচাপে গণ্য কৰিব নে স্বয়ংক্ৰিয় কৃত্ৰিম বুদ্ধিমত্তাৰ ভৱিষ্যতৰ বিপদৰ আগতীয়া সতৰ্কবাণী হিচাপে গ্ৰহণ কৰি কঠোৰ পদক্ষেপ ল’ব, সেয়া পৰৱৰ্তী সময়ত লক্ষণীয় হ’ব।
