অসমৰ সাংসদ আৰু কেডাৰ বিষয়াৰ সৈতে মুখ্য মন্ত্ৰীৰ সভা আৰু নৈশ ভোজ : বিৰোধী দলৰ সাংসদক নিমন্ত্ৰণ নজনোৱাত ক্ষোভ প্ৰকাশ দেবব্ৰত শইকীয়াৰ

৩ জুলাইৰ নিশা মুখ্য মন্ত্ৰী সৰ্বানন্দ সোণোৱাল আৰু অসমৰ পৰা নৱ নিৰ্বাচিত বিজেপি আৰু মিত্ৰজোঁটৰ সাংসদ তথা কেডাৰ বিষয়াসকলৰ সৈতে মুখ্য মন্ত্ৰীয়ে এক সভা অনুষ্ঠিত কৰাৰ লগতে নৈশ ভোজ অনুষ্ঠিত কৰিছিল। মুখ্য মন্ত্ৰীৰ এই কাৰ্য্যক পক্ষপাতিত্বমূলক আৰু বৈষম্যমূলক আচৰণ আখ্যা দিছে বিৰোধী দলপতি দেবব্ৰত শইকীয়াই।

কিয়নো উক্ত সভা অসমৰ পৰা নৱ নিৰ্বাচিত ৰাজ্যসভা আৰু লোকসভাৰ সাংসদসকলক উদ্দেশ্যি অনুষ্ঠিত কৰা হৈছিল যদিও উক্ত সভালৈ নিমন্ত্ৰণ জনোৱা হোৱা নাছিল বিৰোধী সাংসদসকলক।

ইয়াকে কেন্দ্ৰ কৰি নৰ্থ ইষ্ট নাওৰ আগত প্ৰতিক্ৰিয়া প্ৰকাশ কৰি বিৰোধী দলপতি দেবব্ৰত শইকীয়াই কয় ‘মুখ্য মন্ত্ৰীৰ ফেইচবুক পেইজৰ জৰিয়তেই আমি দেখিবলৈ পাইছো যে তেওঁ অসমৰ নৱ নিৰ্বাচিত সাংসদ আৰু দিল্লীত কৰ্মৰত কেডাৰ বিষয়াসকলৰ সৈতে মত বিনিময়ৰ এখন সভা আৰু নৈশ ভোজনৰ আয়োজন কৰিছিল। য’ত কেৱল শাসকীয় মিত্ৰজোঁট পক্ষৰ সাংসদসকলক নিমন্ত্ৰণ জনায় আৰু অতি দৃষ্টিকটুভাৱে অসমৰ পৰা নিৰ্বাচিত বিৰোধী সাংসদসকলক এলাগী কৰি ৰাখিলে। যদি ৰাজনৈতিক মতানৈক্য থকাৰ বাবেই স্বয়ং মুখ্য মন্ত্ৰীয়ে সন্মানীয় সাংসদক এনে পক্ষপাতিত্বমূলক আচৰণ কৰিব পাৰে, তেনেহ’লে শাসকীয় পক্ষক ভোট নিদিয়া সাধাৰণ জন-গণৰ প্ৰতি এই চৰকাৰখনে কি নীতি অৱলম্বন কৰিব সেয়া সহজেই অনুমেয়।‘

আনহাতে, ভাষণপ্ৰসংগত বাৰেপতি ‘টীম আছাম’ৰ কথা কোৱা মুখ্য মন্ত্ৰী সোণোৱালক সোঁৱৰাই দি শইকীয়াই কয় ‘মুখ্য মন্ত্ৰী সোণোৱালে দায়িত্বভাৰ লোৱাৰে পৰা টীম আছামৰ কথা উল্লেখ কৰাৰ লগতে পাহাৰ-ভৈয়াম, বৰাক-ব্ৰহ্মপুত্ৰৰ কথা আওৰাই থকা দেখা যায়।‘

তদুপৰি, মুখ্য মন্ত্ৰীলৈ আহ্বান জনাই শইকীয়াই কয় ‘বিৰোধী দলৰ সাংসদ সকলৰ প্ৰতি কৰা অপমানসূচক আচৰণক গৰিহনা দিছো আৰু ভাৰতৰ গণতন্ত্ৰত শাসক বিৰোধী পৰস্পৰৰ প্ৰতি সন্মান প্ৰদৰ্শন কৰাৰ পৰম্পৰা ধূলিসাৎ নকৰিবলৈ মুখ্য মন্ত্ৰীক আহ্বান জনাইছো।