ভোট জালিয়াতিৰ অভিযোগক কেন্দ্ৰ কৰি ৰাজনৈতিক উত্তেজনা এতিয়া তীব্ৰতৰ হৈ পৰিছে। কংগ্ৰেছ নেতা ৰাহুল গান্ধীৰ এই অভিযোগৰ পাছত এতিয়া বিৰোধী মিত্ৰজোঁট ‘ইণ্ডিয়া’ই সংসদত মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে মহাভিযোগ (ইমপিচমেন্ট) জাননী দাখিলৰ কথা চিন্তা কৰিছে। সংবিধানৰ ৩২৪(৫) অনুচ্ছেদ অনুসৰি উচ্চতম ন্যায়ালয়ৰ ন্যায়াধীশৰ দৰেই মুখ্য নিৰ্বাচন আয়ুক্তক মহাভিযোগৰ জৰিয়তে অপসাৰণ কৰিব পাৰি।
আগষ্টৰ আৰম্ভণিতে লোকসভাত বিৰোধী দলৰ নেতা ৰাহুল গান্ধীয়ে মহাৰাষ্ট্ৰ, কৰ্ণাটক আৰু হাৰিয়ানাত ভোট জালিয়াতিৰ অভিযোগ উত্থাপন কৰিছিল। বেংগালুৰু চেণ্ট্ৰেলৰ মহাদেৱপুৰা সমষ্টিত বিজেপিৰ জয়ত ১ লাখৰো অধিক ভোট ‘চুৰি’ হোৱা বুলি দাবী কৰে। তেওঁ অভিযোগ কৰে যে আয়োগে ভোটাৰ তালিকা আৰু তথ্যত জালিয়াতি কৰি বিজেপিক সুবিধা কৰি দিছে।
দেওবাৰে দিল্লীত এখন সংবাদমেলযোগে নিৰ্বাচন আয়ুক্ত জ্ঞানেশ কুমাৰে এই অভিযোগক ‘ভিত্তিহীন’ বুলি খাৰিজ কৰে। তেওঁ কয় যে সংবিধানক অপমান কৰা হৈছে। ৰাহুলক প্ৰত্যাহ্বান জনাই কুমাৰে কয় যে হয় শপতনামাৰ জৰিয়তে প্ৰমাণ দিব লাগে নহয় দেশবাসীৰ ওচৰত ক্ষমা খুজিব লাগে। অন্যথা অভিযোগ মিছা বুলি প্ৰমাণিত হ’ব।
ৰাহুলৰ কাষত থিয় দিছে বিৰোধী শিবিৰ। কংগ্ৰেছ নেতা পৱন খেৰাই কটাক্ষ কৰি কয়, “আজি যেন বিজেপিৰ মুখপাত্ৰই কথা কৈছে, কোনো স্বতন্ত্ৰ সাংবিধানিক কৰ্তৃপক্ষই নহয়।”
আয়োগৰ মৌনতাক লৈ প্ৰশ্ন উত্থাপন কৰে আৰজেডিৰ সাংসদ মনোজ ঝাই। ঝাৰখণ্ড মুক্তি মৰ্চাৰ সাংসদ মহুৱা মাঝিয়ে কয় যে আয়োগে ৰাহুলে দাখিল কৰা নথি-পত্ৰৰ সত্যতা পৰীক্ষা কৰি দেশক অৱগত কৰিব লাগে।
ৰাহুল গান্ধীয়ে পুনৰবাৰ আয়োগৰ স্থিতিক “নিৰ্বাচিত” আক্ৰমণ বুলি অভিহিত কৰিছে। তেওঁ প্ৰশ্ন উত্থাপন কৰে যে বিজেপিৰ সাংসদ অনুৰাগ ঠাকুৰে একেধৰণৰ মন্তব্য কৰিলেও আয়োগে তেওঁৰ পৰা শপতনামা বিচৰা নাছিল।
যোৱা ৭ আগষ্টত এখন সংবাদমেলত ৰাহুল গান্ধীয়ে কৈছিল যে মহাদেৱপুৰাত একে ঠিকনাতে ৮০ জন ভোটাৰক দেখুওৱা হৈছিল, আৰু অবৈধ ঠিকনা আৰু ভুৱা পঞ্জীয়নৰ ইংগিত আছে। তেওঁ দাবী কৰে যে আয়োগে প্ৰমাণ ধ্বংস কৰিছে কাৰণ বুথসমূহৰ চিচিটিভি আৰু ৱেবকাষ্টিং ফুটেজ মাত্ৰ ৪৫ দিনৰ বাবে ৰখা হৈছিল।
ইয়াৰ উত্তৰত কুমাৰে কয় যে ভোটাৰৰ ব্যক্তিগত গোপনীয়তাৰ স্বাৰ্থত সীমিত সময়ৰ বাবে ফুটেজ ৰখা হৈছিল। তেওঁ কয়, “যদি কোনো ভোটাৰৰ মাতৃ, কন্যা বা ভনীয়েকৰ ভোটদানৰ ভিডিঅ’ জনসাধাৰণৰ মাজলৈ আহে, তেন্তে সেয়া গ্ৰহণযোগ্য হ’বনে?”
তেওঁ লগতে কয় যে মহাৰাষ্ট্ৰৰ ভোটাৰ তালিকাৰ খচৰা পৰ্যায়ত কোনো অভিযোগ অহা নাই। নিৰ্বাচনৰ আঠ মাহৰ পাছতো কোনেও প্ৰমাণ দিব পৰা নাই। গতিকে অভিযোগসমূহ বাৰে বাৰে আওৰাই থাকিলেই সেইবোৰ সঁচা হৈ নাযায়।
বিৰোধীয়ে মহাভিযোগ দাখিলৰ পদক্ষেপে নিৰ্বাচন আয়োগক লৈ বিতৰ্ক তীব্ৰতৰ হ’ব বুলি ৰাজনৈতিক মহলে ভাৱে। অৰ্থাৎ সংবিধান ৰক্ষাৰ যুঁজৰ আঁৰত বিৰোধী শিবিৰ আৰু বিজেপিৰ মুখামুখি সংঘাত অধিক স্পষ্ট হৈ পৰিছে।
