বক্স অফিচত ‘গদৰ ২’ৰ সফলতাৰ মাজতে আহিছিল উদ্বেগজনক খবৰ। অভিনেতা ছানি দেওলৰ জুহুৰ বাংলো ‘ছানী ভিলা’ নিলাম হ’বলৈ ওলাইছে। ৫৫ কোটি টকাৰ ঋণ পৰিশোধ কৰিব পৰা নাই বলীউডৰ অভিনেতাগৰাকীয়ে। সংশ্লিষ্ট বেংকে ঋণৰ ধন আদায়ৰ বাবে ৫৬ কোটি টকাৰ বিনিময়ত ‘ছানী ভিলা’ নিলাম কৰাৰ জাননী জাৰি কৰে।
২০ আগষ্ট দেওবাৰে এই জাননী জাৰি কৰিছিল বেংক অফ বৰোডাই। কিন্তু ২১ আগষ্ট সোমবাৰে বেংকটোৱে সংশোধনী জাৰি কৰি ‘ছানী ভিলা’ নিলামৰ জাননী প্ৰত্যাহাৰ কৰে। সোমবাৰে সংশ্লিষ্ট বেংকটোৱে ‘ছানী ভিলা’ৰ নিলামৰ জাননী প্ৰত্যাহাৰ কৰি সংশোধনী বিবৃতি প্ৰকাশ কৰে।
বিবৃতিটোত দাবী কৰা হৈছে যে জাননীখন প্ৰত্যাহাৰ কৰাৰ আঁৰত কিছু অনিবাৰ্য কাৰণ আছে। ২৫ আগষ্টত নিলাম হোৱাৰ কথা আছিল ছানী দেওলৰ জুহু বাংলোটো। বেংকৰ শেহতীয়া বিবৃতিৰ পৰা স্পষ্ট যে এতিয়াৰ বাবে বাংলোটোক লৈ ছানীয়ে সকাহ লাভ কৰিছে।
লগতে পঢ়ক: ৰে’লৰ এ চি ডবাত হঠাৎ অসুস্থ ইজনৰ পিছত সিজন যাত্ৰী, মৃত্যু ২ জনৰ! ৰহস্য মৃত্যুক লৈ চাঞ্চল্য
দেওবাৰে খবৰ পোৱা গৈছিল যে সংশ্লিষ্ট বেংকে কোটি কোটি টকাৰ ঋণ পৰিশোধ কৰিবলৈ জুহুৰ ‘ছানী ভিলা’ নিলাম কৰাৰ সিদ্ধান্ত লৈছে। ৫৫ কোটি টকাৰ ঋণ পৰিশোধ কৰা নাই অভিনেতাজনে। সেই ঋণ ঘূৰাই পাবলৈ বেংকে ৫৬ কোটি টকাত ঘৰটো নিলাম কৰাৰ সিদ্ধান্ত লয়।
এই খবৰ পোহৰলৈ অহাৰ পিছত ছানীৰ মুখপাত্ৰই দাবী কৰে যে অভিনেতাগৰাকী আৰু তেওঁৰ দলটোৱে বেংক কৰ্তৃপক্ষৰ সৈতে আলোচনা কৰি সমস্যাটো সমাধান কৰিবলৈ দৃঢ়প্ৰতিজ্ঞ। শুনা যায় যে ছানীক আৰু এমাহ দিয়া হৈছে। সেই সময়ৰ ভিতৰত ঋণ পৰিশোধ কৰিলে বেংকে ‘ছানী ভিলা’ৰ নিলাম বন্ধ কৰিব।
ইপিনে, অভিনেতা তথা ভাৰতীয় জনতা পাৰ্টিৰ সাংসদ ছানী দেউলৰ জুহু বাংলোৰ ই-নিলামৰ জাননী প্ৰত্যাহাৰ কৰাৰ পাছত সোমবাৰে কংগ্ৰেছকে ধৰি বিৰোধীয়ে এই সন্দৰ্ভত প্ৰশ্ন উত্থাপন কৰে।
লগতে পঢ়ক: নিজ গুণেৰে উজলিল ঋতুৰাজ-ৰিংকু; আয়াৰলেণ্ডৰ বিৰুদ্ধে দ্বিতীয় টী-২০ জয়েৰে ছিৰিজ দখল ভাৰতৰ
সামাজিক মাধ্যম এক্সত (আনুষ্ঠানিকভাৱে টুইটাৰ) কংগ্ৰেছৰ জ্যেষ্ঠ নেতা জয়ৰাম ৰমেশে কয়, ‘কালি বিয়লি ৰাষ্ট্ৰই গম পালে যে বেংক অৱ বৰোদাই বিজেপিৰ সাংসদ ছানী দেউলৰ জুহুৰ বাসগৃহ ই-নিলামৰ বাবে ৰাখিছে, যিহেতু তেওঁ ৫৬ কোটি টকা দিব নোৱাৰি বেংকৰ ওচৰত ঋণী। আজি পুৱা ২৪ ঘন্টা নৌহওঁতেই ৰাষ্ট্ৰই জানিব পাৰিছে যে বেংক অৱ বৰোদাই ‘কাৰিকৰী কাৰণত’ নিলামৰ জাননী প্ৰত্যাহাৰ কৰিছে। আচৰিত কথা এই ‘কাৰিকৰী কাৰণ’বোৰ কোনে নিৰ্ধাৰণ কৰিলে?”
Yesterday afternoon the nation got to know that Bank of Baroda had put up the Juhu residence of BJP MP Sunny Deol for e-auction since he has not paid up Rs 56 crore owed to the Bank.
This morning, in less than 24 hours, the nation has got to know that the Bank of Baroda has…
— Jairam Ramesh (@Jairam_Ramesh) August 21, 2023
এই মুহূৰ্তত বক্স অফিচ শাসন কৰি আছে ছানী দেওল আৰু আমিশা পেটেল অভিনীত ছবি ‘গদৰ ২’। যোৱা এসপ্তাহ ধৰি বক্স অফিচত ইটোৰ পিছত সিটোকৈ অভিলেখ গঢ়ি তুলিছে ‘গাদাৰ ২’। খোদ দ্বিতীয় সপ্তাহান্তত ছবিখনে প্ৰায় ৩৫০ কোটি টকাৰ ব্যৱসায় কৰিছে। ৪০০ কোটিৰ ক্লাবত ভৰি দিয়াটো এতিয়া মাথোঁ সময়ৰ অপেক্ষা।
