চাকৰিসূত্ৰে অথবা উচ্চ শিক্ষা লোৱাৰ উদ্দেশ্যে দূৰ-দূৰণিত থাকিবলগীয়া হোৱাসকল নিজ গৃহলৈ আহিব নোৱাৰা হেতুকে ভোটদান প্ৰক্ৰিয়াৰ পৰা বঞ্চিত হয়। তাৰ প্ৰতি লক্ষ্য ৰাখি ছ’চিয়েল এক্সনছ ফৰ নিউ অলটাৰনেটিভছ চমুকৈ চানা নামৰ বেচৰকাৰী সংস্থাটোৱে সেইসকলৰ বাবে অনলাইনযোগে ভোটদান কৰিব পৰাৰ ব্যৱস্থা কৰাৰ পোষকতা কৰে।
আজি গুৱাহাটী প্ৰেছ ক্লাৱত এক সংবাদমেল সম্বোধন কৰি সংস্থাৰ কাৰ্য্যবাহী সঞ্চালক বিধায়ক দাস আৰু মেনেজিং ট্ৰাষ্টি নয়নজ্যোতি ভুঞাই দূৰ-দূৰণিত বসবাস কৰাসকলৰ বাবে অনলাইন যোগে নিজৰ ভোটাধিকাৰ সাব্যস্ত কৰাৰ ব্যৱস্থা কৰিবলৈ আহ্বান জনায়।
শুকুৰবাৰে সংস্থাই ৰাজ্যিক নিৰ্বাচনী আয়োগৰ আয়ুক্তক সাক্ষাৎ কৰি এই বিষয়ে অৱগত কৰাৰ কথা সংবাদমেলত জানিবলৈ দিয়ে।
আজিৰ সংবাদমেলত বিধায়ক দাসে কয়, ‘যদি নিৰ্বাচনৰ দিনটোত কোনো লোক নিজৰ জিলা নাইবা অঞ্চলত নাথাকে তেন্তে তেওঁ ভোট দিব নোৱাৰে। ঘৰৰ পৰা দূৰত থাকিবলগীয়া হোৱা বাবে তেওঁলোকে ভোট দিবলৈ কেতিয়াবা যাবলৈ অসুবিধা হয়।‘
ইয়াৰোপৰি ২০১১ চনৰ পিয়ল অনুসৰি দেশৰ ভিতৰতে ১৩৯ মিলিয়ন বাহিৰত চাকৰি সুত্ৰে থকা লোকে বা উচ্চ শিক্ষা লাভ কৰা হেতুকে দূৰ-দূৰণিত থাকিবলগীয়া ছাত্ৰ-ছাত্ৰীয়ে ভোটদান কৰাৰ পৰা বঞ্চিত হৈছিল বুলি দাসে জানিবলৈ দিয়ে।
‘ডিজিটেল ইণ্ডিয়াৰ যুগত কিয় তেওঁলোকে থকা ঠাইৰ পৰাই ভোট দিব নোৱাৰে?’ সংবাদমেলত দাসে এইদৰে প্ৰশ্ন কৰে।
আনহাতে, ছ’চিয়েল এক্সনছ ফৰ নিউ অলটাৰনেটিভছ নামৰ সংস্থাটোৱে নিৰ্বাচনৰ সময়ত পৰ্য্যবেক্ষণ আৰু গৱেষণাৰ সৈতে জড়িত হৈ আহিছে বুলি নয়নজ্যোতি ভুঞাই সংবাদমেলত উল্লেখ কৰে।
সমাগত লোকসভা নিৰ্বাচনৰ আগমুহূৰ্তত এক কাৰ্য্যক্ৰম অনুষ্ঠিত হ’ব। নাগালেণ্ড, মেঘালয় আৰু অসমত প্ৰায় ২০০ স্বেচ্ছাসেৱক নিয়োগ কৰি ভোটাৰৰ মাজত সজাগতা সৃষ্টিৰ প্ৰয়াস কৰিব এই সংস্থাটোৱে।
তদুপৰি, স্বচ্ছ নিৰ্বাচন, অংশগ্ৰহণমূলক গণতন্ত্ৰ বিষয়টো আগত ৰাখি এই অভিযান আৰম্ভ কৰা হৈছে বুলি তেওঁ সংবাদমেলত জনায়। আজিৰে পৰা এই অভিযান ছ’চিয়েল মিডিয়াৰ জৰিয়তে আৰম্ভ কৰা হৈছে।
আনহাতে, এই অভিযানৰ জৰিয়তে এজন ভোটাৰৰ ভোটটোৰ কিমান মূল্য আছে, সেই কথাটো ৰাইজৰ আগত দাঙি ধৰা হ’ব তথা নতুনকৈ যিসকলে ভোট দিব সেইসকলৰ মাজত ভোটদান সন্দৰ্ভত সজাগতা সৃষ্টি কৰা হ’ব।
এই অভিযানৰ বাবে প্ৰয়োজনীয় স্বেচ্ছাসেৱকসকলক বিশেষভাৱে প্ৰশিক্ষণ দিয়া হ’ব আৰু তাৰ বাবে ২০০ ছাত্ৰ-ছাত্ৰী আৰু যুৱক-যুৱতীৰ প্ৰশিক্ষণৰ ব্যৱস্থা কৰা হৈছে।