মহাৰাষ্ট্ৰৰ ৰায়গড় জিলাৰ মহড় চহৰত সোমবাৰে সন্ধিয়া এটা পাঁচ মহলীয়া অট্টালিকা ভাঙি পৰাৰ ভয়ংকৰ ঘটনা সংঘটিত হৈছে।
ঘটনাৰ পাছতে ২৫জন লোকক উদ্ধাৰ কৰা হৈছে। আনহাতে, ধ্বংসস্তুপৰ তলত আৱদ্ধ হৈ পৰা ৮জনক উদ্ধাৰ কৰা হয় যদিও ইয়াৰে এজনৰ মৃত্যু হৈছে।
অট্টালিকাটোৰ ভিতৰত এতিয়াও ৫০জন লোক আৱদ্ধ হৈ আছে বুলি অনুমান কৰা হৈছে।
কেন্দ্ৰীয় গৃহ মন্ত্ৰী অমিত শ্বাহে এন ডি আৰ এফক শীঘ্ৰেই ঘটনাস্থলীত উপস্থিতি হোৱাৰ নিৰ্দেশ দিয়ে।
ৰায়গড়ৰ উপায়ুক্ত নিধি চৌধুৰীয়ে জানিবলৈ দিয়ে যে অট্টালিকাটোৰ তলত এতিয়াও ৫০জন মান লোক আৱদ্ধ হৈ আছে বুলি অনুমান কৰা হৈছে।
বাতৰি অনুসৰি, দহ বছৰ পুৰণি অট্টালিকাটোত মুঠ ৪০টা ফ্লেট আছিল। প্ৰথম মহলাৰ ওপৰৰ তিনিটা মহলা ভাঙি পৰে।
আহতসকলৰ হাস্পাতলত ভৰ্তি কৰা হৈছে। আনহাতে গোটেই ঘটনাটোৰ তদন্ত কৰা হ’ব বুলিও জানিব দিয়ে উপায়ুক্ত চৌধুৰীয়ে।
তাৰিক গাৰ্ডেন নামৰ এই ফ্লেটটো ভাহি পৰাৰ পাছত অঞ্চলজুৰি ধূলিৰ বতাহ বিয়পি পৰে।
এই ঘটনাত হোৱা সৱিশেষ ক্ষয়-ক্ষতিৰ পৰিমান এতিয়াও জানিব পৰা হোৱা নাই।
