উত্তৰ অসমৰ ধেমাজিত ৫০০০ হাজাৰতকৈও অধিক লোক বানপানীৰ কৱলত পৰিছে। বিগত ২৪ জুনৰ পৰা অৰুণাচল প্ৰদেশত হোৱা প্ৰচুৰ বৰষুণৰ ফলত জিলাখনৰ নদ-নদীসমূহৰ জলস্তৰ বৃদ্ধি পাইছে। নদীৰ বাঢ়নি পানীয়ে জোনাই আৰু ধেমাজি ৰাজহ চক্ৰৰ অন্তৰ্গত ৯ খনতকৈও অধিক গাঁও বুৰাই পেলাইছে।
চিয়াং আৰু লালি নদীৰ বাঢ়নি পানীয়ে জোনাই ৰাজহ চক্ৰৰ অন্তৰ্গত কবুচাপৰি নদীদ্বীপৰ অন্তৰ্গত চাৰিখন গাঁৱৰ ৪৫০০ তকৈ অধিক গাঁৱবাসীক ক্ষতিগ্ৰস্ত কৰিছে।
বানপানীৰ কবলত পাঁচখন বিদ্যালয়, খেতিপথাৰৰ উপৰিও গাঁৱৰ ৰাস্তা-পদুলি আৰু দলং আদি ক্ষতিগ্ৰস্ত হৈছে।
বানপানীৰ বাবে আক্ৰান্ত অঞ্চলৰ লোকসকলে পোহনীয়া জীৱ-জন্তুৰ সৈতে ওখ অঞ্চলত আশ্ৰয় গ্ৰহণ কৰিবলগীয়া হোৱাৰ লগতে শিক্ষানুষ্ঠানসমূহত পাঠদান বাতিল কৰা হৈছে।
জীয়া ধলৰ বাঢ়নি পানীৰ ফলত ধেমাজি ৰাহজ চক্ৰৰ অন্তৰ্গত শালমাৰি, পাভমাৰি, দুলুংখাত, ভজুগাঁও আৰু ন-আলি গাঁৱৰ প্ৰায় ৫০০ লোক আক্ৰান্ত হৈছে।
দুৰ্যোগ প্ৰশমন বিভাগৰ বিষয়াই উল্লেখ কৰা অনুসৰি জিলা প্ৰশাসনে সমগ্ৰ পৰিস্থিতিৰ ওপৰত চোকা নজৰ ৰাখি জলসম্পদ বিভাগৰ বিষয়াসকলক নদীৰ বাঢ়নি পানীৰ ওপৰত তীক্ষ্ণ নজৰ ৰখাৰ উপৰিও যিকোনো পৰিস্থিতিৰ বাবে সষ্টম হৈ থকাৰ বাবে নিৰ্দেশ দিয়ে।