চৰকাৰী ব্যৱস্থাপনাৰ অভাৱতেই হওঁক বা আন কাৰণতে হওঁক, কোভিডত ভাৰত বিশ্বৰ বহু দেশতকৈ বেছি ক্ষতিগ্ৰস্ত হৈছে। কোভিডে বিধ্বস্ত কৰা অৰ্থনীতিয়ে এতিয়াও গা টঙাই উঠিব পৰা নাই। এনে সময়তে ২০২০ চনৰ কোভিড পৰিস্থিতি সন্দৰ্ভত বিশ্ববেংকে এখন প্ৰতিবেদন প্ৰকাশ কৰিছে।
“দৰিদ্ৰতা আৰু সমৃদ্ধি ২০২২” শীৰ্ষক প্ৰতিবেদনত কোভিডৰ সময়ত ভাৰতৰ দুখজনক ছবি খন ভালদৰেই ফুটি উঠিছে। কোভিডে দেশৰ কোটি কোটি লোকক ঠেলি দিছিল দৰিদ্ৰতাৰ মুখলৈ।কোভিড-১৯ অতিমাৰীয়ে বিশ্বত অসংখ্য লোকৰ জীৱন হানি কৰাৰ লগতে বহুতৰে ভোকৰ ভাত মুঠিও আজুৰি নিছিল। উদ্যোগবোৰ প্ৰায় স্থবিৰ কৰি হৈ পৰিছিল, বহু উদ্যোগ চিৰ দিনৰ বাবে বন্ধ হৈ পৰিছিল।
বিশ্ব বেংকৰ শেহতীয়া প্ৰতিবেদনত কোৱা হৈছে যে ২০২০ চনত মহামাৰীৰ ফলত সমগ্ৰ বিশ্বৰ ৭১ নিযুত লোক চৰম দৰিদ্ৰতাৰ মুখলৈ ধাবিত হৈছিল। ইয়াৰ ভিতৰত প্ৰায় ৭৯ শতাংশ লোকেই হৈছে ভাৰতৰ । “দৰিদ্ৰতা আৰু সমৃদ্ধি ২০২২” শীৰ্ষক প্ৰতিবেদনত কোৱা হৈছে যে অতিমাৰীয়ে বিশ্বব্যাপী বহু লোকক দৰিদ্ৰ কৰিছিল।
ইয়াৰ ফলত বিশ্বব্যাপী দৰিদ্ৰতাৰ হাৰ বৃদ্ধি পাইছিল, যি ২০১৯ চনত ৮.৪ শতাংশৰ পৰা ২০২০ চনৰ শেষৰ পিনে ৯.৩ শতাংশলৈ বৃদ্ধি পাইছিল।৭১ নিযুত লোক অত্যাধিক দৰিদ্ৰতাৰ মাজত ডুব গৈছিল, যাৰ ফলত বিশ্বব্যাপী মুঠ ৭০০ নিযুতৰো অধিক দৰিদ্ৰ হৈ পৰিছিল। বিশ্ব বেঙ্কৰ মতে, বিশ্বব্যাপী দৰিদ্ৰতা বৃদ্ধি আটাইতকৈ জনবহুল দেশবোৰতে বেছিকৈ হৈছিল। বিশ্বৰ দৰিদ্ৰতাপীড়িত লোকৰ আনুমানিক সংখ্যা ৭১ নিযুত লোকৰ ভিতৰত কেৱল ভাৰততে 5৫৬ নিযুত লোক দৰিদ্ৰ হৈ পৰিছিল।
চীন আটাইতকৈ জনবসতিপূৰ্ণ দেশ হোৱা স্বত্বেও ২০২০ চনত বিশ্বব্যাপী দৰিদ্ৰতা বৃদ্ধিত দেশ খনে বিশেষ অৰিহণা যোগোৱা নাছিল। দেশখনে “২০২০ চনত মধ্যমীয়া অৰ্থনৈতিক আঘাত সহিবলগীয়া হৈছিল” ।
