দীৰ্ঘদিনীয়া অপেক্ষাৰ অন্তত বিতৰ্কিত নাগৰিকত্ব সংশোধনী আইন চমুকৈ চিএএ আৰু ইয়াৰ নিয়মাৱলীক প্ৰত্যাহ্বান জনাই দাখিল কৰা আবেদনসমূহৰ চূড়ান্ত শুনানিৰ দিন ঘোষণা কৰিছে উচ্চতম ন্যায়ালয়ে। বিগত ৬ বছৰ ধৰি ওলমি থকা এই গুৰুত্বপূৰ্ণ বিষয়টোৰ শুনানি অহা ৫ মে’ৰ পৰা ১২ মে’লৈ অনুষ্ঠিত হ’ব। সোমবাৰে ভাৰতৰ মুখ্য ন্যায়াধীশ সূৰ্য্য কান্ত, ন্যায়াধীশ জয়মল্য বাগচি আৰু ন্যায়াধীশ বিপুল এম পাঞ্চোলিৰ বিচাৰপীঠে এই সিদ্ধান্ত গ্ৰহণ কৰে। আদালতত দাখিল হোৱা ২৪৩খন আবেদনৰ ওপৰত ভিত্তি কৰি এই শুনানি প্ৰক্ৰিয়া আগবাঢ়িব।
আদালতে এই শুনানিৰ বাবে এক নিৰ্দিষ্ট সময়সূচী প্ৰস্তুত কৰিছে। আবেদনকাৰীসকলৰ বাবে ৫ আৰু ৬ মে’ৰ দিনটো ধাৰ্য কৰা হৈছে। ইয়াৰ পিছত ৭ মে’ত উত্তৰদাতা পক্ষই নিজৰ যুক্তি প্ৰদৰ্শন কৰিব আৰু ১২ মে’ত সমগ্ৰ বিষয়টোৰ ওপৰত উত্তৰ দিয়া হ’ব। সমগ্ৰ বিষয়টোক দুটা গোটত ভাগ কৰা হৈছে য’ত অসম আৰু ত্ৰিপুৰাৰ সমস্যাসমূহক এটা গোটত আৰু দেশৰ বাকী অংশৰ আবেদনসমূহক আনটো গোটত ৰখা হৈছে। নিযুক্তি দিয়া ন’ডেল কাউঞ্চেলসকলে এই আবেদনসমূহ সঠিকভাৱে তালিকাভুক্ত কৰিবলৈ দুসপ্তাহ সময় লাভ কৰিছে।
উল্লেখ্য যে ২০১৯ চনৰ ডিচেম্বৰ মাহত সংসদত এই আইন গৃহীত হোৱাৰ পিছৰে পৰা ইয়াৰ বিৰুদ্ধে দেশজুৰি প্ৰতিবাদৰ সৃষ্টি হৈছিল। এই আইনে বাংলাদেশ, পাকিস্তান আৰু আফগানিস্তানৰ পৰা ধৰ্মীয় উৎপীড়নৰ বলি হৈ ভাৰতলৈ অহা অ-মুছলমান শৰণাৰ্থীসকলক নাগৰিকত্ব প্ৰদানৰ সুবিধা দিয়ে। কিন্তু ইয়াত মুছলমান সম্প্ৰদায়ক অন্তৰ্ভুক্ত নকৰাৰ বাবে আবেদনকাৰীসকলে ইয়াক ধৰ্মৰ ভিত্তিত বৈষম্যমূলক আৰু সংবিধানৰ ১৪ নং অনুচ্ছেদৰ উলংঘা বুলি অভিযোগ কৰিছে। যদিও ২০১৯ চনতে এই আইনৰ বিৰুদ্ধে জাননী জাৰি কৰা হৈছিল, শেহতীয়াকৈ ২০২৪ চনৰ মাৰ্চ মাহত কেন্দ্ৰীয় চৰকাৰে ইয়াৰ নিয়মাৱলী ঘোষণা কৰাৰ পিছত বিষয়টোৱে পুনৰ গুৰুত্ব লাভ কৰিছে।
বিগত সময়ছোৱাত উচ্চতম ন্যায়ালয়ে এই আইনখন কাৰ্যকৰী কৰাৰ ক্ষেত্ৰত কোনো ধৰণৰ অন্তৱৰ্তীকালীন স্থগিতাদেশ প্ৰদান কৰা নাছিল। কেন্দ্ৰীয় চৰকাৰে হঠাতে নিয়মসমূহ ঘোষণা কৰাৰ পিছত বহু পক্ষই পুনৰ আদালতৰ কাষ চাপিছিল। এতিয়া অহা মে’ মাহত হ’বলগীয়া এই শুনানিৰ ওপৰত সমগ্ৰ দেশবাসীৰ চকু নিৱদ্ধ হৈ থাকিব, কাৰণ ইয়াৰ জৰিয়তেই নিৰ্ধাৰণ হ’ব নাগৰিকত্ব সংশোধনী আইনৰ ভৱিষ্যত।
