চোৰ কৰিবলৈ গৈ পালে কল্পনাতীত টকা; হৃদৰোগত আক্ৰান্ত হ’ল আনন্দত আত্মহাৰা চোৰ
দুজন চোৰে একেলগে চুৰি কৰিবলৈ গৈছিল। চুৰি কৰাৰ পাছতেই তেওঁলোকে দেখে যে তেওঁলোকে যিমান টকা চুৰি কৰি পাব বুলি ভাৱিছিল তাতকৈ বহুগুণে বেছি টকা হাতলৈ আহিল।
ইয়াকে দেখি অৱশেষত আনন্দত আত্মহাৰা হৈ এজন চোৰ হৃদৰোগত আক্ৰান্ত হ’ল। শুনিবলৈ আচৰিত যেন লাগিলেও উত্তৰ প্ৰদশৰ বিজানৌৰত সংঘটিত হৈছে এনে ঘটনা।
আৰক্ষীৰ জালত পৰিছে নাগিনা আৰক্ষী থানাৰ অন্তৰ্গত আলিপুৰৰ বাসিন্দা নৌশাদ আৰু এজাজ নামৰ চোৰ দুজন।
আৰক্ষীৰ সূত্ৰ মতে, যোৱা ১৬ আৰু ১৭ ফেব্ৰুৱাৰিত চোৰ দুজনে নবাব হাইদৰ নামৰ এজন ব্যক্তিৰ মালিকাধীন ৰাজহুৱা সেৱা কেন্দ্ৰত চুৰি কৰিবলৈ সোমাইছিল।
উক্ত কেন্দ্ৰটোত সাত লাখ টকা আছিল আৰু চোৰ দুজনে আটাইখিনি টকা চুৰি কৰি নিয়ে। তেওঁলোকে সেয়া কেইহাজাৰমান টকা হ’ব বুলি ভাৱিছিল যদিও পাছত ইমান টকা দেখি স্বাভাৱিকতেই আনন্দত আত্মহাৰা হৈ পৰে।
ইয়াৰ মাজতে এজন চোৰ হৃদৰোগত আক্ৰান্ত হৈ পৰে।
বিজানৌৰৰ আৰক্ষী অধীক্ষক গৰাকীয়ে জানিবলৈ দিয়ে যে আটকাধীন চোৰ দুজনে ইয়াৰ পূৰ্বেও বহুবাৰ চুৰি কৰিছিল। বিভিন্ন আৰক্ষী থানাত তেওঁলোকৰ নামত বহুকেইটা অভিযোগ দাখিল হৈ আছে।
চোৰ দুজনে ৰাজহুৱা সেৱা কেন্দ্ৰত চোৰ কৰিবলৈ যোৱাৰ কথা স্বীকাৰ কৰে। তেওঁলোকে আলমাৰিৰ পৰা মূল্যৱান সামগ্ৰীৰ লগতে নগদ সাত লাখ টকা চুৰি কৰে। ইয়াৰ পাছতে দুয়োজনে সেয়া সমানে ভাগ কৰি লয়।
ইমানলৈকে ঠিকেই আছিল যদিও তাৰপাছতে ঘটনাটো সংঘটিত হয়। চোৰ দুজনৰ মাজৰ এজাজ নামৰ চোৰজন অধিক আনন্দত আত্মহাৰা হোৱাৰ ফলত হৃদৰোগত আক্ৰান্ত হৈ পৰে।
পাছত এখন বেচৰকাৰী হাস্পাতলত চোৰজনৰ চিকিৎসা চলি আছে। চিকিৎসাত চুৰি টকাৰ আধাখিনি খৰচ হৈ যায়।
দুয়োজন চোৰৰ বিৰুদ্ধে বিভিন্ন ধাৰাত গোচৰ ৰুজু কৰা হৈছে।