পাকিস্তানৰ অনুৰোধত ৰাষ্ট্ৰসংঘৰ নিৰাপত্তা পৰিষদৰ এখন গোপন বৈঠক ৫ মে’ অনুষ্ঠিত হয়, কিন্তু কোনো ফলাফল নোহোৱাকৈয়ে সমাপ্ত হয় বৈঠক। পাকিস্তানৰ প্ৰতিনিধি অসীম ইফতিকাৰ আহমেদে পেহেলগাম আক্ৰমণৰ পৰা দৃষ্টি আঁতৰাবলৈ কাশ্মীৰ প্ৰসংগ উত্থাপন কৰে। ১৫ খন সদস্য দেশৰ উপস্থিতিত গ্ৰীচৰ অধ্যক্ষতাত এই বৈঠক অনুষ্ঠিত হৈছিল। পাকিস্তানে ভাৰতৰ বিৰুদ্ধে সিন্ধু জল সন্ধি স্থগিত আৰু সামৰিক কাৰ্যকলাপ বৃদ্ধিৰ অভিযোগ উত্থাপন কৰে যদিও কোনো সমৰ্থন লাভ নকৰিলে।
উল্লেখ্য যে পেহেলগাম আক্ৰমণৰ পিছত ভাৰত আৰু পাকিস্তানৰ সম্পৰ্ক অতি নিম্ন স্তৰত উপনীত হৈছে। ভাৰতে সিন্ধু জল সন্ধি স্থগিত, ভিছা বাতিল, আকাশমাৰ্গ বন্ধ আৰু বাণিজ্য বন্ধ কৰিছে, আৰু পাকিস্তানেও ভাৰতৰ ওপৰত একে ধৰণৰ প্ৰতিবন্ধকতা আৰোপ কৰিছে। এনে পৰিস্থিতিত পাকিস্তানে নিৰাপত্তা পৰিষদৰ জৰুৰী বৈঠকৰ আহ্বান জনায়। পাকিস্তান যি বৰ্তমান নিৰাপত্তা পৰিষদৰ অস্থায়ী সদস্য হৈ থকাৰ বাবে এই বৈঠকত অংশ লোৱাৰ সুবিধা লাভ কৰে। ভাৰতে আগতেই আশা কৰিছিল যে পাকিস্তানে এই সদস্যপদৰ অপব্যৱহাৰ কৰি পেহেলগামৰ পৰা দৃষ্টি আঁতৰাবলৈ চেষ্টা কৰিব!
নিৰাপত্তা পৰিষদৰ বৈঠকত কোনো সিদ্ধান্ত বা বিবৃতি জাৰি নহ’ল, আৰু পেহেলগাম আক্ৰমণৰ বিষয়ে কোনো ব্যৱস্থা লোৱা নহ’ল বুলি জানি বপৰা গৈছে। প্ৰকাশিত তথ্য অনুসৰি পাকিস্তানৰ দাবীৰ বিপৰীতে নিৰাপত্তা পৰিষদৰ সদস্যসকলে লস্কৰ-ই-তৈয়বাৰ দৰে গোটৰ সংশ্লিষ্টতাৰ বিষয়ে প্ৰশ্ন উত্থাপন কৰিছিল। পাকিস্তানৰ এই পদক্ষেপ ২০১৯ চনৰ আগষ্টৰ বৈঠকৰ দৰেই ব্যৰ্থ হ’ল, আৰু কাশ্মীৰ প্ৰসংগত ভাৰতক কোণত ৰখাৰ পাকিস্তানৰ চেষ্টা আকৌ এবাৰ নিষ্ফল হৈ পৰিল।
