পাকিস্তানৰ প্ৰধানমন্ত্ৰী ইমৰাণ খানে অৱশেষত আস্থা ভোটত বিজয়ী হৈছে।
বিৰোধীদল সমূহৰ তীব্ৰ বিৰোধিতা সত্বেও শনিবাৰে দেশখনৰ সংসদত অনুষ্ঠিত হোৱা আস্থাভোটত বিজয়ী হোৱাৰ ফলত ইমৰাণ খানৰ চৰকাৰখনে দৃঢ়ভাৱে খোপনি পুতিবলৈ সক্ষম হৈছে।
ৰাষ্ট্ৰপতি আৰিফ আলভীৰ পৰিচালনাত অনুষ্ঠিত হোৱা আস্থা ভোটত শাসনাধিস্থ প্ৰধানমন্ত্ৰীজনে ১৭৮টা ভোট লাভ কৰে।
উল্লেখযোগ্য যে ৩৪২জন সদস্য থকা নিম্ন সদনত জয়ী হ’বলৈ প্ৰয়োজন হৈছিল ১৭২টা আস্থা ভোটৰ।
আনহাতে ১১টাকৈ দলেৰে গঠিত বিৰোধী মৰ্চা পাকিস্তান ডেম’ক্ৰেটিক ম’ভমেণ্টে (পিডিএম) আস্থা ভোট বয়কট কৰে।
উল্লখযোগ্য যে বুধবাৰে অনুষ্ঠিত হোৱা ছিনেট নিৰ্বাচনত পাকিস্তানৰ বিত্তমন্ত্ৰী আব্দুল হাফিজ শ্বেইখ পৰাজিত হোৱাৰ পাছতে বিৰোধী দলসমূহে প্ৰধামন্ত্ৰীৰ পদত্যাগৰ দাবী উঠায়।
বিৰোধী দলসমূহে ইমৰাণ খানৰ বিৰুদ্ধে প্ৰতিশ্ৰুতি পালনত ব্যৰ্থ, কঠোৰ আইন প্ৰণয়ন আৰু দুৰ্নীতিৰ অভিযোগ কৰিছিল।
তাৰ পাছতে প্ৰধানমন্ত্ৰী ইমৰাণ খানে আস্থাভোটৰ আয়োজন কৰে।
বৰ্তমান জাতীয় সংসদত ইমৰাণ খান নেতৃত্বাধীন পাকিস্তান তেহৰীক-ই-ইনচাফে ১৫৭জন সদস্য থকাৰ লগতে সহযোগী দলসমূহৰ স’তে যু্ক্ত কৰি মুঠ ১৮১ জন সদস্যৰে সদনত সংখ্যাগৰীষ্ঠতা লাভ কৰি আছে।
আনহাতে বিৰোধী মৰ্চাৰ আছে ১৬০ জন সদস্য।