বিশ্বকাপত আফগানিস্তানৰ স্বপ্নৰ দৌৰ চলি আছে। সেই সপোনৰ ৰথত উঠি আফগানিস্তানে ছেমি ফাইনেলৰ আৰু কাষ চাপিছে। শুকুৰবাৰে প্ৰায় একপক্ষীয় খেলত আফগান দলে নেদাৰলেণ্ডক ৭ উইকেটত পৰাস্ত কৰে। ডাচ বাহিনীৰ ১৮০ ৰান অনুসৰণ কৰি আফগানিস্তানে হাতত ৭টা উইকেট ৰাখি জয়লাভ কৰে। তাকো আৰু ১৮.৩ অভাৰ বাকী থকা অৱস্থাত। ইংলেণ্ড, পাকিস্তান, শ্ৰীলংকাৰ পিছত এইবাৰ আফগানিস্তানৰ চিকাৰ হ’ব লগা হ’ল নেদাৰলেণ্ড।
আফগানিস্তানৰ এই দুৰ্দান্ত জয়ৰ লগে লগে দলটোৱে লীগ তালিকাৰ পঞ্চম স্থানত উপনীত হয়। পাকিস্তানক ঠেলি দিলে ছয় নম্বৰ স্থানলৈ। বৰ্তমান অষ্ট্ৰেলিয়া-নিউজিলেণ্ডৰ সৈতে একেটা পইণ্টতে আছে আফগানিস্তান। যদিও আফগানিস্তানে অষ্ট্ৰেলিয়াৰ সৈতে এখন মেচ বেছি খেলিছে।
শনিবাৰে পাকিস্তানে নিউজিলেণ্ডৰ বিৰুদ্ধে মৰণপন যুঁজত অৱতীৰ্ণ হ’ব। পাকিস্তানৰ বাবে সেই মেচৰ আগত যথেষ্ট বেয়া খবৰ ঘুৰি ফুৰিছে। শেষ চাৰিত প্ৰৱেশৰ যুঁজত আফগানিস্তানৰ মূল প্ৰতিদ্বন্দ্বী হৈছে পাকিস্তান। ৭খন মেচত ৩টা জয়কে ধৰি ৬ পইণ্টেৰে ছয় নম্বৰত আছে বাবৰ বাহিনী। পাক দলে শেষৰ দুখন মেচ খেলিব নিউজিলেণ্ড আৰু ইংলেণ্ডৰ বিৰুদ্ধে।
যুক্তিৰ খাতিৰত ধৰি ল’লে শেষৰ দুখন মেচত পাকিস্তানে যদি জয়লাভ কৰে, তেতিয়া পাকিস্তানে সৰ্বাধিক ১০ পইণ্ট লাভ কৰিব। আনহাতে, অষ্ট্ৰেলিয়া আৰু দক্ষিণ আফ্ৰিকাৰ বিৰুদ্ধে দুখন মেচত আফগানিস্তানে জয়লাভ কৰিব লাগিব। যদি আফগানিস্তানে দুখন মেচত জয়লাভ কৰে তেন্তে পাকিস্তানৰ দুখন মেচৰ ফলাফল যিয়েই নহওক কিয় বাবৰ বাহিনী নক আউট হ’ব। আনহাতে, যদি পাকিস্তানে শেষৰ দুখন মেচত জয়লাভ কৰে আৰু আফগানিস্তানে এখন মেচতো জয়ী হয়, তেন্তে দুয়োটা দলৰ পইণ্ট সমান হৈ পৰিব। তাৰ পিছত নেট ৰান ৰেটৰ কথা বিবেচনা কৰা হ’ব।
পাকিস্তানে আফগানিস্তানৰ লগতে নিউজিলেণ্ডকো হিচাপৰ বাহিৰত পঠিয়াব বিচাৰিব। তেনে ক্ষেত্ৰত শনিবাৰে পাকিস্তানে নিউজিলেণ্ডক পৰাস্ত কৰিব লাগিব। আৰু টম লাথামৰ দলটোৱে গ্ৰুপৰ শেষৰখন খেলতো শ্ৰীলংকাৰ বিৰুদ্ধে পৰাস্ত হ’ব বুলি পাকিস্তানে আশা কৰিব লাগিব।
শনিবাৰে দুখন গুৰুত্বপূৰ্ণ মেচ আছে। পুৱা পাকিস্তান-নিউজিলেণ্ডৰ খেলৰ পাছত বিয়লি অষ্ট্ৰেলিয়াই ইংলেণ্ডৰ বিৰুদ্ধে খেলিব। যদি পাকিস্তানে কিউইৰ বিৰুদ্ধে জয়লাভ কৰে, তেতিয়া ছেমি ফাইনেলৰ দৌৰ আকৰ্ষণীয় হ’ব। পাকিস্তান, নিউজিলেণ্ড আৰু আফগানিস্তান – তিনিওটা দলে একে সংখ্যক পইণ্ট লাভ কৰিব। আৰু যদি অষ্ট্ৰেলিয়া ইংলেণ্ডৰ হাতত পৰাস্ত হয়, তেন্তে নকআউটৰ যুঁজখন আৰু নাটকীয় হৈ পৰিব। তেতিয়া আফগানিস্তান আৰু অষ্ট্ৰেলিয়া একেটা পইন্টতে থাকিব। আৰু আফগানিস্তানৰ গ্ৰুপত (৭ নৱেম্বৰ) অষ্ট্ৰেলিয়াৰ খেলখনে অলিখিত কোৱাৰ্টাৰ ফাইনেলৰ ৰূপ ল’ব।
কিন্তু আফগানিস্তানৰ চিন্তাৰ বিষয় এটাই, সেয়া হ’ল নেট ৰান ৰেট। বৰ্তমান আফগানিস্তানৰ ৰান ৰেট -০.৩৩০। অষ্ট্ৰেলিয়া আৰু দক্ষিণ আফ্ৰিকাৰ দৰে শীৰ্ষ ৰেংকিঙৰ দলৰ বিৰুদ্ধে জয়লাভ কৰা আৰু নেট ৰান ৰেট বৃদ্ধি কৰাটো আফগানিস্তানৰ বাবে এক ডাঙৰ প্ৰত্যাহ্বান হ’ব।
যিয়েই নহওক, শুকুৰবাৰে আফগানিস্তানৰ জয়লাভে পাকিস্তানৰ অৱস্থা যে কাহিল কৰি তুলিলে তাত কোনো সন্দেহ নাই।
