শেহতীয়াকৈ ৱাশ্বিংটনত অনুষ্ঠিত এক অনুষ্ঠানত পাকিস্তানৰ উপ-প্ৰধানমন্ত্ৰী ইছহাক দাৰে কয় যে, আমেৰিকাই ‘দ্য ৰেজিষ্টেন্স ফ্ৰণ্ট’ (টি আৰ এফ)ক সন্ত্ৰাসবাদী সংগঠন হিচাপে তালিকাভুক্ত কৰাৰ সিদ্ধান্তত পাকিস্তানৰ কোনো আপত্তি নাই। তেওঁ কয়, “যদি টি আৰ এফৰ পেহেলগাম আক্ৰমণৰ সৈতে জড়িত থকাৰ প্ৰমাণ থাকে, তেন্তে আমেৰিকাৰ এই সিদ্ধান্তক স্বাগত জনাম।” কিন্তু তেওঁ টি আৰ এফ আৰু লস্কৰ-ই-তৈবাৰ মাজৰ সম্পৰ্ক মানি ল’বলৈ অস্বীকাৰ কৰে। তেওঁ দাবী কৰিছে যে পাকিস্তানে বহু বছৰ আগতেই লস্কৰ-ই-তৈবাক ধ্বংস কৰিছিল।
উল্লেখ্য যে আমেৰিকাই টি আৰ এফক ফৰেইন টেৰৰিষ্ট অৰ্গেনাইজেচন (এফ টি অ’) আৰু স্পেচিয়েলি ডেজিগনেটেড গ্ল’বেল টেৰৰিষ্ট (এছ ডি জি টি) হিচাপে তালিকাভুক্ত কৰিছে। আমেৰিকাৰ বিবৃতিত কোৱা হৈছে যে, ভাৰতৰ সৈতে সন্ত্ৰাসবাদৰ বিৰুদ্ধে যুঁজৰ ক্ষেত্ৰত আন্তঃৰাষ্ট্ৰীয় সহযোগিতাৰ পোষকতা কৰা হৈছে, আৰু টি আৰ এফক সন্ত্ৰাসবাদী সংগঠন হিচাপে ঘোষণা কৰাটো ভাৰত আৰু আমেৰিকাৰ মাজত এই সহযোগিতাৰে এক প্ৰতিফলন। ভাৰতে এই সিদ্ধান্তক স্বাগত জনাই কয় যে, সন্ত্ৰাসবাদৰ বিৰুদ্ধে যুঁজত আমেৰিকাৰ সৈতে ঘনিষ্ঠ সহযোগিতা আছে।
প্ৰসংগ ক্ৰমে ইছহাক দাৰে পূৰ্বে পাকিস্তানৰ সংসদত কৈছিল যে, টি আৰ এফক অবৈধ বুলি গণ্য কৰা নহয় আৰু পেহেলগাম আক্ৰমণৰ সৈতে টি আৰ এফ জড়িত থকাৰ প্ৰমাণ দাখিল কৰিবলৈ কৈছিল। তেওঁ কৈছিল, “যদি টি আৰ এফৰ দায়িত্ব প্ৰমাণিত হয়, তেন্তে আমি সকলো অভিযোগ মানি লম, কিন্তু প্ৰমাণ নোপোৱালৈকে আমি এই অভিযোগ গ্ৰহণ নকৰো।” কিন্তু এতিয়া আমেৰিকাৰ এই ঘোষণাৰ পিছত পাকিস্তানৰ সুৰ সলনি হোৱাত দেশখনৰ ওপৰত প্ৰশ্ন উত্থাপিত হৈছে। আমেৰিকাৰ চাপৰ ফলত পাকিস্তানৰ প্ৰধানমন্ত্ৰী শ্বাহবাজ শ্বৰীফৰ চৰকাৰে এই স্থিতি গ্ৰহণ কৰিবলৈ বাধ্য হৈছে বুলি আন্তঃৰাষ্ট্ৰীয় মহলত সৰৱ চৰ্চা চলিছে।
