যুদ্ধৰ বাবে সাজু হৈছে নেকি পাকিস্তান! পেহেলগাম সন্ত্ৰাসবাদী আক্ৰমণ আৰু ২৬ জন পৰ্যটকৰ মৃত্যুৰ লগে লগে জম্মু-কাশ্মীৰ সীমান্তত পাকিস্তানৰ ব্যাপক কাৰ্যকলাপ লক্ষ্য কৰিছে ভাৰতৰ সেনাই।
পাকিস্তান বায়ুসেনাৰ কেইবাখনো বিমান সীমান্ত সেনা ঘাটিৰ দিশে গৈ থকা দেখা পোৱা গৈছে। অনুমান কৰা হৈছে যে পাকিস্তানে সীমান্তত বৃহৎ পৰিসৰত সৈন্য মোতায়েন আৰম্ভ কৰিছে।
যোৱা মঙলবাৰে জম্মু-কাশ্মীৰৰ পেহেলগামত সংঘটিত হয় সন্ত্ৰাসবাদীৰ আক্ৰমণ। পেহেলগামৰ এখন ৰিজ’ৰ্টত বিয়লি উগ্ৰপন্থীয়ে পৰ্যটকক আক্ৰমণ কৰে।
প্ৰত্যক্ষদৰ্শীয়ে দাবী কৰিছে যে ধৰ্মীয় পৰিচয়ৰ ভিত্তিত এই আক্ৰমণ সংঘটিত হৈছে। স্থানীয় সূত্ৰই দাবী কৰিছে যে উগ্ৰপন্থীয়ে সামৰিক পোছাক পৰিধান কৰি আহিছিল। এই আক্ৰমণত মুঠ ৪০টা গুলী নিক্ষেপ কৰা হৈছিল।
ইতিমধ্যে লস্কৰ-ই-তৈবাৰ টি আৰ এফ বা দ্য ৰেজিষ্টেন্স ফ্ৰণ্টে এই আক্ৰমণৰ দায়িত্ব স্বীকাৰ কৰিছে। জনা যায় যে এই সংগঠনটো পাকিস্তানৰ আই এছ আইৰ সহযোগী। আনকি এই আক্ৰমণত জড়িত উগ্ৰপন্থীৰ অধিকাংশই বিদেশী। সেয়েহে সন্ত্ৰাসবাদী আক্ৰমণত পাকিস্তান জড়িত থকাৰ স্পষ্ট ইংগিত পোৱাৰ লগে লগে সজাগ হৈ পৰিছে পাকিস্তান।
পূৰ্বৰ দৰে ভাৰতে পাকিস্তানত আক্ৰমণ চলাব পাৰে বুলি আশংকাত সীমান্তৰ সিপাৰে কাৰ্যকলাপ আৰম্ভ হৈছে। এয়াৰক্ৰাফ্ট ট্ৰেকিং ৱেবছাইট ‘ফ্লাইট্ৰাডাৰ২৪’ৰ তথ্যৰ উদ্ধৃতি দি সৰ্বভাৰতীয় সংবাদ মাধ্যমৰ প্ৰতিবেদনত দাবী কৰা হৈছে যে পেহেলগামত সংঘটিত আক্ৰমণৰ লগে লগে কৰাচীৰ পৰা উত্তৰ দিশলৈ বায়ুসেনাৰ কেইবাখনো বিমান লাহোৰ আৰু ৰাৱালপিণ্ডি অভিমুখে প্ৰেৰণ কৰা হৈছে। এই দুটা পাকিস্তানী বায়ুসেনাৰ ঘাটি জম্মু-কাশ্মীৰৰ ওচৰত। ইয়াৰ ভিতৰত পাকিস্তান বায়ুসেনাৰ দুখন উল্লেখযোগ্য বিমান হ’ল চি-১৩০ই পৰিবহণ বিমান পিএএফ১৯৮ আৰু এম্ব্ৰায়াৰ ফেনম ১০০ জেট পিএএফ১০০। এই বিমান দুখন ভিভিআইপি পৰিবহণ আৰু চোৰাংচোৱা কামত ব্যৱহাৰ কৰা হয়।
