উত্তপ্ত কাশ্মীৰৰ পাক-ভাৰত সীমান্তত আজি পুৱাই পাকিস্থানৰ সেনাই তিনিটা স্থানত যুদ্ধ বিৰতি উলংঘা কৰি ধাৰাসাৰ গুলীবৰ্ষণ কৰে।
ভাৰতীয় সেনাৰ সূত্ৰই প্ৰকাশ কৰা মতে আজি পুৱা ৫ বজাত পাক সেনাই কাশ্মীৰৰ পুঞ্চ জিলাৰ ছাহপুৰ, কিৰ্নি আৰু কাছবা অঞ্চলত গুলী আৰু মৰ্টাৰেৰে আক্ৰমণ চলায়।
এই আক্ৰমণৰ প্ৰত্যুত্তৰত ভাৰতীয় সেনায়ো গুলীবৰ্ষণ কৰাত দুয়োপক্ষৰ মাজত দুঘণ্টা ধৰি সংঘৰ্ষ চলি থাকে।
এই ঘটনাত ভাৰতীয় সেনাৰ কোনো বিষয়া অথবা জোৱান হতাহত হোৱা নাই বুলি জানিব পৰা গৈছে।
উল্লেখ্য কিছুদিন পূৰ্বে ভাৰত-পাকিস্তান সীমান্তত পাকিস্তানে পুনৰ যুদ্ধবিৰতি উলংঘা কৰি গুলিচালনা কৰাত এগৰাকী ভাৰতীয়া সেনা বাহিনীৰ জোৱান শ্বহীদ হ’বলগীয়া হৈছিল।
জম্মু-কাশ্মীৰৰ কৃষ্ণঘাটি চেক্টৰত পাকিস্তানী সেনাই যুদ্ধবিৰতি উলংঘা কৰি গুলিচালনা কৰাৰ ফলতে ভাৰতীয় সেনা বাহিনীৰ জোৱান গৰাকী শ্বহীদ হ’বলগীয়া হয়।
পাকিস্তানী সেনাৰ গুলিত চহিদ হোৱা ভাৰতীয় সেনা বাহিনীৰ জোৱান গৰাকী আছিল লেন্স নায়ক কৰ্ণনাইল সিং।
ইয়াৰ পূৰ্বেও বিগত মাহত ভাৰত-পাকিস্তান সীমান্তত পাকিস্তানী সেনা বাহিনীয়ে যুদ্ধবিৰতি উলংঘা কৰি কৰা গুলিচালনাত দুগৰাকী ভাৰতীয় সেনা বাহিনীৰ জোৱান আৰু এগৰাকী সেনা বিষয়া শ্বহীদ হ’বলগীয়া হৈছিল।