ভাৰতত চোৰাংচোৱাগিৰী কৰাৰ সন্দেহত আৱদ্ধ কৰি ৰখা পাকিস্তানী পাৰ চৰাইজনীক মুকলি কৰি দিবলৈ প্ৰধানমন্ত্ৰী মোদীক দাবী জনাইছে পাকিস্তানৰ এজন গঞাই।
বিবিচিৰ বাতৰি অনুসৰি ভাৰতৰ সীমান্তৰ পৰা মাত্ৰ ৪ কিলোমিটাৰ নিলগৰ এজন গঞাই ঈদ উদযাপনৰ সময়ত এৰি দিছিল পাৰ চৰাইজনী।
ইফালে ভাৰতত প্ৰৱেশ কৰাৰ পিছত পাকিস্তানে চোৰাংচোৱাগিৰী কৰাৰ সন্দেহত পাৰ চৰাইজনীক আৱদ্ধ কৰি থোৱা হৈছে।
ইতিমধ্যে দেশৰ সংবাদ মাধ্যমে পাৰ চৰাইজনীৰ চোৰাংচোৱাগিৰী কৰা বুলি চৰ্চা কৰাই নহয় সন্ত্ৰাসবাদী পাৰ চৰাই ৰূপেও আখ্যা দিছে।
বাতিৰত আৰক্ষীৰ উদ্ধৃতি দি কোৱা হৈছে যে পাৰজনীৰ ঠেঙত এটা আঙুঠি আছে, য’ত আছে এটা ক’ড।
ইতিমধ্যে আৰক্ষীয়ে এই ক’ডৰ সাংকেতিক লিপিৰ পাঠোদ্ধাৰৰ বাবে চেষ্টা কৰি আছে।
ইফালে পাকিস্তানৰ গঞাজনে দাবী কৰিছে যে তেওঁ পাৰজনীৰ ঠেঙত থকা আঙুঠিৰ ক’ডটো হৈছে তেওঁৰ মোবাইল ফোন নম্বৰ।
পাকিস্তানৰ সংবাদ পত্ৰৰ ড’নৰ উদ্ধৃতিৰে বিবিচিএ প্ৰকাশ কৰিছে যে পাকিস্তানৰ হাবিবুল্লাহ নামৰ লোকজনৰ এক ডজন পাৰ চৰাই আছে।
হাবিবুল্লাই ড’নক কয় যে তেওঁৰ পাৰ চৰাইবোৰ হৈছে শান্তিৰ দূত আৰু ভাৰতে এজনী নিৰীহ পাৰ চৰাইক হাৰাশাস্তি কৰিছে।
উল্লেখ্য যে, যোৱা সোমবাৰে ভাৰতৰ সীমান্তবাসী গঞাই পাৰ চৰাইজনী কাশ্মীৰৰ পাক-ভাৰত সীমান্তত ধৰি স্থানীয় আৰক্ষীক গতাই দিছিল।
ইয়াৰ লগে লগে পাৰ চৰাইজনীক ভাৰতত এজনী ‘সন্ত্ৰাসবাদী পাৰ চৰাই’ৰূপে চিহ্নিত কৰা হৈছে।
ইপিনে পাকিস্তানৰ পৰা পাৰ চৰাই আহি ভাৰতত প্ৰৱেশ কৰা এয়াই প্ৰথম নহয় বুলি প্ৰকাশ কৰিছে ভাৰতৰ চৰকাৰৰ এক সূত্ৰই।
২০১৫ চনৰ মে’ত সীমান্তৰ এখন গাঁৱত এটা ১৪ বছৰীয়া কিশোৰে এজনী পাকিস্তানী পাৰ চৰাই চিনাক্ত কৰাৰ পিছত পাৰজনীক আৰক্ষীয়ে গ্ৰেপ্তাৰ কৰিছিল।
আনকি ২০১৬ৰ অক্টোবৰ মাহতো ভাৰতৰ প্ৰধানমন্ত্ৰীক প্ৰদান কৰা ভাবুকি সম্বলিত পত্ৰৰ সৈতে এটি পাকিস্তানী পাৰ চৰাইক আটক কৰা হৈছিল।
