অসমত পঞ্চায়ত নির্বাচন সম্পর্কে মুখ্যমন্ত্রীয়ে প্রকাশ কৰা কেতবোৰ মন্তব্যই সমগ্র পঞ্চায়তী ব্যৱস্থা তথা ক্ষমতাৰ বিকেন্দ্ৰীকৰণ আৰু তৃণমূল পৰ্যায়ৰ গণতন্ত্ৰৰ প্ৰতি ভাবুকি সৃষ্টি কৰিছে। পঞ্চায়তত যোগ্য ব্যক্তি নিৰ্বাচন কৰাৰ স্বাৰ্থত পঞ্চায়তৰ ৱাৰ্ডৰ ক্ষেত্ৰত ৰাজনৈতিক দলৰ প্ৰতীক অবিহনে নির্বাচন অনুষ্ঠিত কৰাৰ গুৰুত্ব আছে বুলি মুখ্যমন্ত্রীয়ে বক্তব্য প্রদান কৰিছে। অথচ সেই একেই যুক্তি আঞ্চলিক পঞ্চায়তৰ সদস্য আৰু জিলা পৰিষদৰ সদস্য নিৰ্বাচন কৰাৰ ক্ষেত্ৰত প্রযোজ্য কৰা নাই। আঞ্চলিক পঞ্চায়ত আৰু জিলা পৰিষদৰ সদস্যসকল ৰাজনৈতিক দলৰ প্ৰতীকতেই যিহেতু নির্বাচিত হ’ব, সেয়ে তেনে লোক নিকা আৰু যোগ্য হোৱাটো বাঞ্ছনীয় নহয় নেকি?
আচলতে মুখ্যমন্ত্ৰীৰ এনেবোৰ তৰল আৰু টুলুঙা যুক্তিৰ কোনো বাস্তৱ ভিত্তি নাই। বৰং পঞ্চায়ত ৱাৰ্ড সদস্যৰ বেলিকা দলীয় প্রতীক ব্যৱহাৰ নহ’লে ভোটাৰসকলৰ নিৰক্ষৰ অংশটো নিশ্চিতভাৱে বিপাঙত পৰিব আৰু নিজৰ মনঃপুত প্রার্থীগৰাকীৰ পক্ষে ভোট প্রদান কৰাত গুৰুতৰ সমস্যাৰ সম্মুখীন হ’ব। তদুপৰি প্ৰতীকৰ ক্ষেত্ৰত এই দ্বৈত ব্যৱস্থাই দুর্নীতি আৰু ভ্ৰষ্টাচাৰৰ পথ প্রশস্ত কৰাৰ লগতে পঞ্চায়ত ৱাৰ্ডৰ জয়ী হোৱা সদস্যক ক্ৰয় কৰাৰ এক সুযোগ শাসনাধিষ্ঠিত দলটোক প্রদান কৰিব। চি পি আই (এম)ৰ অসম ৰাজ্যিক কমিটিৰ সুস্পষ্ট অভিমত যে পঞ্চায়ত নির্বাচন দলীয় প্রতীকৰ পৰা মুক্ত কৰাৰ মাজেৰে অবাধ ধনৰ লেনদেনৰ পথহে মুকলি কৰি দিয়া হ’ব।
ফলত তৃণমূল পর্যায়লৈ গণতন্ত্ৰৰ সম্প্ৰসাৰণ ভেকো-ভাওনা তথা প্রহসনত পৰিণত হ’ব। আচলতে মুখ্যমন্ত্রীয়ে টকা-পইচাৰ অবাধ লেন-দেন, বিভিন্ন প্ৰকাৰৰ প্রলোভন, ভয়-ভীতি প্ৰদৰ্শন আদিৰ মাজেৰে নিৰ্বাচিত ৱাৰ্ড সদস্যসকলক শাসক বিজেপিৰ ফলীয়া কৰি পঞ্চায়তবোৰ দখল কৰাৰ পৰিকল্পনা কৰিছে। অন্যহাতে সময়ে সময়ে কেৱল মুখ্যমন্ত্ৰীয়েহে পঞ্চায়ত নির্বাচন সম্পৰ্কীয় ঘোষণা কৰি থকাৰ ঘটনাই ৰাজ্যিক নির্বাচন আয়োগৰ ভূমিকাৰ ওপৰতো প্ৰশ্নৰ অৱতাৰণা কৰিছে।
পঞ্চায়ত নিৰ্বাচনটো ৰাজ্যিক নির্বাচন আয়োগে অনুষ্ঠিত কৰিব নে মুখ্যমন্ত্ৰীয়ে কৰিব? ৰাজ্যিক নির্বাচন আয়োগৰ নির্বাক ভূমিকাৰ বিপৰীতে বহুবল্কী মুখ্যমন্ত্ৰীৰ পঞ্চায়ত নিৰ্বাচন সম্পর্কীয় বিভিন্ন ঘোষণাই সমগ্র নির্বাচনী প্রক্ৰিয়াটোৰ স্বাধীন আৰু নিৰপেক্ষ চৰিত্ৰক আঘাত কৰিব আৰু সামগ্রিকভাৱে গণতান্ত্রিক প্রক্রিয়াটোক দুৰ্বল কৰিব। মুখ্যমন্ত্ৰীৰ এনেবোৰ কাণ্ডই অনাগত পঞ্চায়ত নির্বাচনটোত শাসকীয় দলটোক অন্যায়ভাৱে সহায় কৰিব। সেয়ে মুখ্যমন্ত্ৰীৰ নেতৃত্বত সমাগত পঞ্চায়ত নির্বাচনটোক এক প্রহসনলৈ ৰূপান্তৰ কৰাৰ দুর্ভাৱনাই দেখা দিছে। এনে প্রেক্ষাপটত পঞ্চায়ত নির্বাচন সম্পর্কত চি পি আই (এম)-এ ৰাজ্যিক নির্বাচন আয়োগক সকলো দিশ স্পষ্ট কৰিবলৈ দাবী জনাইছে।
