ভাৰতীয় সেনা বাহিনীৰ বীৰ সেনা জোৱান তথা পৰমবীৰ চক্ৰ পদক প্ৰাপ্ত হাবিলদাৰ আব্দুল হামিদৰ জন্মদিৱস আজি বৰপেটা জিলাৰ বৰ আগদিয়াত পালন কৰা হয়।
উল্লেখ্য যে, ১৯৬৫ চনত হোৱা ভাৰত-পাকিস্তানৰ যুদ্ধত শত্ৰু পক্ষক নিজৰ বীৰত্ব দেখুৱাবলৈ সক্ষম হোৱা হাবিলদাৰ আব্দুল হামিদৰ কৰ্মৰাজি নৱ প্ৰজন্মৰ মাজত পৰিচয় কৰি দিয়াৰ উদ্দেশ্যে মুছলিম ছাত্ৰ সন্থাই আজি দিনজোৰা কাৰ্যসূচীৰে বীৰ সেনা জোৱান জনৰ জন্মদিন পালন কৰে।
বৰ আগদিয়া আদৰ্শ জাতীয় বিদ্যালয়ত অনুষ্ঠিত এই জন্মদিৱসৰ কাৰ্যসূচী অনুসৰি পুৱা গছপুলি ৰোপন কৰা হয়। ইয়াৰ পিছতে অনুষ্ঠিত হয় বক্তৃতা প্ৰতিযোগিতা। দিনৰ ১২ বজাৰ পৰা মুকলি সভা অনুষ্ঠিত হয় ৷ শিক্ষক নুৰজামাল আলীৰ সভাপতিত্বত অনুষ্ঠিত মুকলি সভাত মুখ্য অতিথি হিচাপে অংশ গ্ৰহণ কৰে মুছলিম ছাত্ৰ সন্থাৰ কেন্দ্ৰীয় সভাপতি জালালউদ্দিনে।
মুখ্য অতিথিৰ ভাষণত মুছলিম ছাত্ৰ সন্থাৰ নেতা গৰাকীয়ে বীৰ সেনা জোৱান জনৰ কৰ্মৰাজিৰ ওপৰত আলোকপাত কৰে। ইয়াৰ উপৰি তেওঁ নৱ প্ৰজন্মক দেশ মাতৃক সেৱা কৰাৰ কামত জড়িত হোৱাৰ বাবেও আহ্বান জনায়।
মুকলি সভাখনত সমাজকৰ্মী নজৰুল ইছলাম আৰু বাহাৰুল ইছলামৰ লগতে ছাত্ৰ-ছাত্ৰী আৰু স্থানীয় ৰাইজ উপস্থিত থাকে।
