কেন্দ্ৰই আহ্বান কৰা সংসদৰ বিশেষ অধিৱেশনত নাথাকিব কোনো কুৱেশ্বন আৱাৰ। অৰ্থাৎ সাংসদসকলে চৰকাৰক মৌখিকভাৱে কোনো প্ৰশ্ন কৰাৰ সুযোগ নাপাব। কোনো প্ৰশ্ন থাকিলে সেয়া লিখিতভাৱে কৰিব লাগিব। ইয়াৰ পূৰ্বে কৰ’নাৰ পিছত যেতিয়া লোকসভাৰ অধিৱেশন আৰম্ভ হৈছিল তেতিয়া কুৱেশ্বন আৱাৰ বাতিল কৰা হৈছিল।
কেৱল কুৱেশ্বন আৱাৰেই নহয়, কেন্দ্ৰই আহ্বান কৰা বিশেষ অধিবেশনত জিৰ’ আৱাৰো নাথাকিব। অৰ্থাৎ সমসাময়িক যিকোনো গুৰুত্বপূৰ্ণ বিষয়ত আলোচনা কৰিব বিচাৰিলে বিৰোধীয়ে সেই সুযোগ নাপাব।
লগতে পঢ়ক: শোকস্তব্ধ ইছৰো, হৃদৰোগত আক্ৰান্ত হৈ মৃত্যু চন্দ্ৰযান ৩ৰ সৈতে জড়িত বিজ্ঞানীৰ
আনকি এইবাৰ সদস্যসকলক প্ৰাইভেট মেম্বাৰ বিল উত্থাপন কৰাৰো অনুমতি দিয়া নহ’ব। অর্থাৎ এই বিশেষ অধিৱেশনত কোনো ধৰণৰ ‘বাধা-বিঘিনি’ চৰকাৰে নিবিচাৰে৷ ইয়াকে লৈয়েই জল্পনা-কল্পনাও বৃদ্ধি পাইছে।
উল্লেখ্য যে কেন্দ্ৰই ১৮ ছেপ্টেম্বৰৰ পৰা ২২ ছেপ্টেম্বৰলৈ সংসদৰ বিশেষ অধিৱেশন আহ্বান কৰিছে। কিন্তু সেই বিশেষ অধিবেশনত কি কি বিষয়ৰ ওপৰত আলোচনা কৰা হ’ব সেই সম্পৰ্কে এতিয়াও মোডী চৰকাৰে মুখত পিঠা ভৰাই ৰাখিছে। অৱশ্যে এই অধিৱেশনতে ‘এক জাতি, এক নিৰ্বাচন’ বিধেয়ক উত্থাপন হ’ব বুলিও চৰ্চা চলিছে।
লগতে পঢ়ক: ইউৰোপৰ সৰ্বোচ্চ শৃংগ মণ্ট ব্লাংক জয় কৰিলে অসমৰ পৰ্বতাৰোহী মনীষ ডেকাই
ইপিনে, চৰকাৰৰ হৈ কেন্দ্ৰীয় মন্ত্ৰী অনুৰাগ ঠাকুৰে কৈছে যে লোকসভা নিৰ্বাচন আগবাঢ়ি যোৱা বা পলম হোৱাৰ কোনো সম্ভাৱনা নাই। তেনে ক্ষেত্ৰত ‘এক জাতি, এক নিৰ্বাচন’ৰ আলোচনা এতিয়া নহ’বও পাৰে। সেই ক্ষেত্ৰত ইউনিফৰ্ম চিভিল কোড বিল উত্থাপন কৰাৰ চৰ্চাও শুনা হৈছে। মহিলা সংৰক্ষণ বিধেয়ক বা অ’বিচি সংৰক্ষণ বিলৰ ওপৰতো আলোচনা হ’ব পাৰে।
