সতীৰ্থক আত্মহত্যাৰ উচটনি দিয়াৰ গোচৰত অভিযুক্ত ৰিপাব্লিক টিভিৰ মুখ্য সম্পাদক অৰ্ণৱ গোস্বামীৰ বিপদ দিনক দিনে বাঢ়ি গৈছে।
শেহতীয়াকৈ ৰাষ্ট্ৰীয় নিৰাপত্তাৰ প্ৰতি ভাবুকি কঢ়িয়াই আনিব পৰা হোৱাটছ এপ চাটৰ প্ৰসংগকলৈ অৰ্ণৱ গোস্বামী সমালোচিত হৈ থকাৰ সময়তে এইবাৰ তেওঁৰেই সহযোগী তথা BARC India ৰ প্ৰাক্তন মুখ্য কাৰ্যবাহী বিষয়া পাৰ্থ দাসগুপ্তাই অৰ্ণৱৰ বিৰুদ্ধে ঘটাইছে এক মহা বিস্ফোৰণ।
ৰিপাব্লিক টিভিৰ TRP বৃদ্ধি কৰিবলৈ অৰ্ণৱ গোস্বামীয়ে পাৰ্থ দাসগুপ্তক ১২ হাজাৰ মাৰ্কিন ডলাৰৰ লগতে ৪০ লাখ টকা দিয়াৰ কথা পাৰ্থ দাসগুপ্তাই স্বীকাৰ কৰাত এতিয়া শলঠেকত পৰিছে অৰ্ণৱ।
দাসগুপ্তাই প্ৰকাশ কৰা মতে বাহিৰলৈ ফুৰিবলৈ যোৱাৰ বাবে অৰ্ণৱ গোস্বামীয়ে তেওঁক ১২ হাজাৰ মাৰ্কিন ড়লাৰ দিয়াৰ লগতে তিনি বছৰত ৪০ লাখ টকা দিছিল।
ইয়াৰ বিনিময়ত অৰ্ণৱে তেওঁক ৰিপাপ্লিক টিভিৰ টিআৰপি ভুৱাকৈ দেখুৱাবলৈ কৈছিল।
মুম্বাই আৰক্ষীক দিয়া এক লিখিত স্বীকাৰোক্তিত ভাৰতৰ ব্ৰড়কাষ্ট অডিয়েন্স ৰিছাৰ্চ কাউন্সিলৰ প্ৰাক্তন মুখ্য কাৰ্যবাহী বিষয়াগৰাকীয়ে প্ৰকাশ কৰিছে।
আৰক্ষীয়ে ইতিমধ্যে টিআৰপি কেলেংকাৰী সন্দৰ্ভত ৩,৬০০ পৃষ্ঠাৰ অভিযোগনামা আদালতত দাখিল কৰিছে।
উক্ত অভিযোগমনামাত আৰক্ষীয়ে দাসগুপ্তাৰ লগতে আন ৫৯ গৰাকী লোকৰ সাক্ষ্য সন্নিবিষ্ট কৰিছে।
সাক্ষ্য গ্ৰহণ কৰা লোকসকলৰ ভিতৰত কেবল অপাৰেটৰকে ধৰি ৰিপাব্লিক টিভিৰো একাধিক কৰ্মচাৰী আছে।
শেহতীয়া অডিট প্ৰতিবেদনত এই কথা পোহৰলৈ আহিছে যে ৰিপাব্লিক টিভিৰ লগতে টাইমছ নাও, আজ টক আদি টিভি চেনেলে কাৰচাজিৰে টিআৰপি বেছিকৈ দেখুৱাইছিল।
আৰক্ষীয়ে এই গোচৰ সন্দৰ্ভত বাৰ্কৰ প্ৰাক্তন কাৰ্যবাহী পাৰ্থ দাসগুপ্তৰ লগতে ৰিপাব্লিক মেডিয়া নেটৱৰ্কৰ মুখ্য কাৰ্যবাহী বিকাশ কাঞ্চানদানি,বাৰ্কৰ বিষয়া ৰমিল ৰামগাৰহিয়া আদিৰ বিৰুদ্ধে আদালতত অতিৰিক্ত অভিযোগনামা দাখিল কৰিছে।
পাৰ্থ দাসগুপ্তাই প্ৰকাশ কৰা মতে ২০০৪ চনৰে পৰাই তেওঁ অৰ্ণৱ গোস্বামীক জানে।এটা সময়ত তেওঁলোকে একেলগে টাইমছ নাও চেনেলত কাম কৰিছিল।
২০১৩ চনত তেওঁ বাৰ্কত যোগদান কৰে আৰু ২০১৭ চনত অৰ্ণৱে আৰম্ভ কৰে ।
অৰ্ণৱেই তেওঁক টিআৰপি ভুৱাকৈ দেখুৱাই ৰিপাব্লিক টিভিক দেশৰ এক নম্বৰত থকা চেনেলত পৰিণত কৰিবলৈ ধন দিছিল।
