২০১৮ চনৰ ধৰ্ষণৰ গোচৰত দোষী সাব্যস্ত হৈছিল স্বঘোষিত ধৰ্মগুৰু বাজিন্দৰ সিঙক। এইবাৰ পঞ্জাৱৰ মোহালীৰ আদালতে তেওঁক যাৱজ্জীৱন কাৰাদণ্ডৰ শাস্তি প্ৰদান কৰিলে। ৪২ বছৰীয়া বাজিন্দৰ বৰ্তমান পাটিয়ালা কাৰাগাৰত ভৰ্তি হৈ আছে।
‘য়েছু যেচু’ মন্ত্ৰতেই হেনো সকলো সমস্যা নিৰাময় হয়। আনকি কেন্সাৰ ৰোগীও সুস্থ হৈ উঠে। এই সকলোবোৰ দাবী কৰিছিল তথাকথিত ধৰ্মগুৰুজনে। তেওঁৰ ধৰ্মীয় পৰামৰ্শৰ দ্বাৰা অনলাইনতো তেওঁ যথেষ্ট জনপ্ৰিয় হৈ পৰিছিল। কিন্তু হঠাৎ পোহৰলৈ আহিল ২০১৮ চনৰ এটা অভিযোগ।
২০১৮ চনত এগৰাকী মহিলাই মোহালীৰ জিৰকপুৰ আৰক্ষী থানাত এজাহাৰ দাখিল কৰি তেওঁক বিদেশলৈ পঠোৱাৰ প্ৰতিশ্ৰুতি দি প্ৰতাৰণা কৰা বুলি অভিযোগ উত্থাপন কৰিছিল। পিছত মোহালীৰ ছেক্টৰ ৬৩-ত বাজিন্দৰ সিঙে ধৰ্ষণ কৰাৰ অভিযোগ উত্থাপন কৰে। মহিলাগৰাকীয়ে ঘটনাটোৰ ভিডিঅ’ কৰা বুলি জানিবলৈ দিয়ে।
তেওঁ আৰক্ষীক জনোৱা মতে বাজিন্দৰে তেওঁক ব্লেকমেইল কৰিছিল আৰু নুশুনিলে ভিডিঅ’টো ছ’চিয়েল মিডিয়াত প্ৰচাৰ কৰা হ’ব বুলি ভাবুকি দিছিল।
এই গোচৰৰ দীঘলীয়া শুনানিৰ অন্তত আদালতে ভাৰতীয় দণ্ডবিধিৰ ৩৭৬ (ধৰ্ষণ), ৩২৩ (শাৰীৰিক নিৰ্যাতন) আৰু ৫০৬ (অপৰাধমূলক ভাবুকি) ধাৰাত বাজিন্দৰ সিঙক দোষী সাব্যস্ত কৰে। আদালতে আন পাঁচজন অভিযুক্ত —আখবৰ ভট্টী, ৰাজেশ চৌধুৰী, যতীন্দৰ কুমাৰ, সীতাৰ আলী আৰু সন্দীপ পাহলৱানক দোষমুক্ত কৰে।
মঙলবাৰে পঞ্জাৱৰ আদালতে যেচু যেচু ধৰ্মযাজক বাজিন্দৰক যাৱজ্জীৱন কাৰাদণ্ডৰ শাস্তি প্ৰদান কৰে। খ্ৰীষ্টান ধৰ্ম প্ৰচাৰক বাজিন্দৰ সিঙৰ নাম এতিয়া আসাৰাম বাপু, ৰাম ৰহিমৰ দৰে নামৰ সৈতে সংযোজন হৈছে।
