অৰুণাচল প্ৰদেশৰ মুখ্যমন্ত্ৰী পেমা খাণ্ডুৰ বিৰুদ্ধে উত্থাপিত দুৰ্নীতিৰ অভিযোগৰ সন্দৰ্ভত উচ্চতম ন্যায়ালয়ে চিবিআই (CBI)ৰ প্ৰাথমিক তদন্তৰ নিৰ্দেশ দিয়াৰ এমাহ অতিক্ৰম কৰাৰ পিছতো তেওঁক পদত্যাগ কৰিবলৈ নিৰ্দেশ নিদিয়া কাৰ্যই তীব্ৰ প্ৰতিক্ৰিয়াৰ সৃষ্টি কৰিছে। কংগ্ৰেছৰ জ্যেষ্ঠ নেতা জয়ৰাম ৰমেশে মুখ্যমন্ত্ৰী খাণ্ডুক পদৰ পৰা অপসাৰণ নকৰাটো “উচ্চতম ন্যায়ালয়ৰ ৰায়ৰ চৰম অৱমাননা” বুলি অভিহিত কৰি প্ৰধানমন্ত্ৰী নৰেন্দ্ৰ মোদীৰ নীৰৱতাক লৈ তীক্ষ্ণ সমালোচনা কৰিছে।
ৰাজ্যসভাৰ সাংসদ তথা কংগ্ৰেছৰ যোগাযোগ বিভাগৰ সাধাৰণ সম্পাদক ৰমেশে ‘এক্স’ যোগে ক্ষোভ প্ৰকাশ কৰি কয় যে এই নিৰ্দেশ কোনো নিম্ন আদালত বা উচ্চ ন্যায়ালয়ৰ নহয়, বৰঞ্চ দেশৰ সৰ্বোচ্চ ন্যায়ালয়ৰ। ইয়াৰ পিছতো মুখ্যমন্ত্ৰীগৰাকীয়ে নিজৰ পদত বাহাল থকাটো এক উদ্বেগজনক বিষয়। তেওঁ লগতে উল্লেখ কৰে যে মুখ্যমন্ত্ৰী খাণ্ডুৰ হাততেই ৰাজ্যখনৰ গড়কাপ্তানি বিভাগৰ দায়িত্ব আছে আৰু চিবিআইক তদন্তৰ বাবে প্ৰয়োজন হ’বলগীয়া গুৰুত্বপূৰ্ণ ফাইলসমূহ তেওঁৰ নিয়ন্ত্ৰণতেই আছে। ২০১৪ চনত দুৰ্নীতি বিৰোধী স্থিতিৰে শাসনলৈ অহা প্ৰধানমন্ত্ৰী মোদীৰ ‘না খাউংগা না খানে দুংগা’ শ্লোগানৰ কথা সোঁৱৰাই ৰমেশে প্ৰশ্ন কৰে যে প্ৰধানমন্ত্ৰীগৰাকী বৰ্তমান কিয় নীৰৱ হৈ আছে আৰু অৰুণাচলৰ মুখ্যমন্ত্ৰীজনক কিয় পদত্যাগ কৰিবলৈ কোৱা হোৱা নাই।
উল্লেখযোগ্য যে, উচ্চতম ন্যায়ালয়ৰ দ্বাৰস্থ হোৱা আবেদনকাৰীসকলৰ অভিযোগ অনুসৰি অৰুণাচল প্ৰদেশ চৰকাৰে বেআইনী আৰু স্বেচ্ছাচাৰীভাৱে মুখ্যমন্ত্ৰী খাণ্ডু, তেওঁৰ ভাতৃ, মাহীমাক আৰু তেওঁলোকৰ ঘনিষ্ঠ ৰাজনৈতিক সহযোগীক নিৰ্মাণকাৰ্যৰ বৃহৎ পৰিমাণৰ ঠিকা প্ৰদান কৰিছিল। অভিযোগ অনুসৰি ২০১৫ চনৰ পৰা ২০২৫ চনৰ ভিতৰত প্ৰায় ১২৭০ কোটি টকাৰ ঠিকা কেৱল খাণ্ডু আৰু তেওঁৰ আত্মীয়ৰ সৈতে জড়িত চাৰিটা প্ৰতিষ্ঠানক আৱণ্টন দিয়া হৈছিল। পেমা খাণ্ডুৱে ২০১৬ চনত ৰাজ্যখনৰ মুখ্যমন্ত্ৰী হিচাপে দায়িত্বভাৰ গ্ৰহণ কৰিছিল।
যোৱা ৬ এপ্ৰিলত ন্যায়াধীশ বিক্ৰম নাথ, সন্দীপ মেহতা আৰু এন. ভি. আঞ্জাৰিয়াক লৈ গঠিত উচ্চতম ন্যায়ালয়ৰ এখন খণ্ড বিচাৰপীঠে এই অভিযোগসমূহৰ ওপৰত চিবিআইৰ প্ৰাথমিক তদন্তৰ নিৰ্দেশ দিছিল। বিচাৰপীঠখনে খাণ্ডু আৰু তেওঁৰ পৰিয়ালৰ সদস্যৰ সৈতে জড়িত প্ৰতিষ্ঠানসমূহক প্ৰদান কৰা ঠিকাৰ বিশেষ পৰীক্ষা কৰিবলৈ তদন্তকাৰী সংস্থাটোক নিৰ্দেশ দিছিল। ৰায়দানৰ সময়ত বিচাৰপীঠে মৌখিকভাৱে এক গুৰুত্বপূৰ্ণ মন্তব্য কৰি কৈছিল যে এখন ৰাজ্যত পৰিয়ালৰ সদস্যসকলক ইমান বৃহৎ পৰিমাণৰ ঠিকা প্ৰদান কৰাটো এক আচৰিত কাকতালীয় ঘটনা। ইয়াৰ পূৰ্বে যোৱা অক্টোবৰ মাহত কেন্দ্ৰীয় চৰকাৰে সৰ্বোচ্চ ন্যায়ালয়ক জনাইছিল যে তেওঁলোকে খাণ্ডুৰ বিৰুদ্ধে উত্থাপিত অভিযোগসমূহৰ তদন্ত কৰিব নোৱাৰে আৰু এই বিষয়টো ৰাজ্য চৰকাৰৰ এক্তিয়াৰভুক্ত।
বৰ্তমান চিবিআইয়ে উচ্চতম ন্যায়ালয়ৰ নিৰ্দেশ মৰ্মে প্ৰাথমিক তদন্তৰ প্ৰক্ৰিয়া আৰম্ভ কৰাৰ দিশত অগ্ৰসৰ হৈছে যদিও মুখ্যমন্ত্ৰী পেমা খাণ্ডুৰ পদত্যাগৰ দাবীত বিৰোধীয়ে সৃষ্টি কৰা ৰাজনৈতিক হেঁচাই ৰাজ্যখনৰ লগতে ৰাষ্ট্ৰীয় পৰ্যায়তো তীব্ৰ চৰ্চা লাভ কৰিছে।
