যোৰহাট জিলাৰ টীয়ক নগৰৰ মাজ মজিয়াত কেইবাবছৰ ধৰি পৰিত্যক্ত অৱস্থাত পৰি আছে এটুকুৰা মূল্যবান ভূমি।
দৰাচলতে এই ভূমিতে টীয়ক প্ৰাথমিক চিকিৎসালয়খন প্ৰথম অৱস্থাত আৰম্ভ হৈছিল যদিও পৰৱৰ্তী সময়ত ৰাজ্য চৰকাৰৰ স্বাস্থ্য বিভাগে এই প্ৰাথমিক চিকিৎসালয়ৰ নিকটতম দূৰত্বত এখনি ৩০খন বিচনাযুক্ত চিকিৎসালয় স্থাপন কৰাৰ পৰা এই প্ৰাথমিক কেন্দ্ৰটিৰ গৃহটো অব্যৱহৃত হৈ পৰি আছে।
উল্লেখযোগ্য যে টীয়ক উচ্চতৰ মাধ্যমিক বালিকা বিদ্যালয়ৰ গাতে লাগি থকা এই ভূমিত ১৯৭১ চনতে টীয়কত এই কেন্দ্ৰটো স্থাপনত চৰকাৰে অনুমোদন দিছিল আৰু তেতিয়াৰে পৰা বৃহত্তৰ অঞ্চলটোৰ ৰোগীসকলৰ একমাত্ৰ ভৰষাৰ স্থল হিচাপে পৰিগণিত হৈছিল।
অৱশ্যে পৰৱর্তী পৰ্য্যায়ত নতুনকৈ স্থাপিত চিকিৎসালয়খনলৈ কেন্দ্ৰটো স্থানান্তৰিত কৰাত এই ভূমিত কেৱল জন্ম মৃত্যুৰ পঞ্জীয়ন কেন্দ্রটো ৰখা হৈছিল আৰু পাছলৈ আজিৰ পৰা কেইবাবছৰৰ আগতে সেই কেন্দ্ৰটোও ৩০খন বিচনাযুক্ত চিকিৎসালয়ললৈ স্থানান্তৰিত কৰা হ’ল।
যাৰ ফলত গৃহটি সুদীৰ্ঘ দিন অব্যৱহৃত হৈ জহি খহি বৰ্তমান পৰিত্যক্ত অৱস্থাত পৰি আছে।
সেয়ে টীয়কৰ সচেতন মহলে চৰকাৰৰ ওচৰত এই মূল্যবান ভূমিত এক সাংস্কৃতিক প্ৰকল্প স্থাপন কৰি সমগ্ৰ পৰিবেশ আকৰ্ষণীয় কৰি এই মূল্যবান ভূমিৰ উচিত ব্যৱহাৰ কৰিবলৈ চৰকাৰক আহ্বান জনাইছে।
