পেৰুৰ এখন আদালতে পেৰুৰ প্ৰাক্তন ৰাষ্ট্ৰপতি মাৰ্টিন ভিজকাৰাক দুৰ্নীতিৰ অপৰাধত ১৪ বছৰৰ কাৰাদণ্ড বিহিছে।
দক্ষিণ অঞ্চল মকেগুয়াৰ গৱৰ্ণৰ হৈ থকাৰ সময়তে তেওঁক দুৰ্নীতিৰ অভিযোগত দোষী সাব্যস্ত কৰা হৈছিল।
কাৰাদণ্ডৰ উপৰিও তেওঁক ৯ বছৰৰ বাবে ৰাজহুৱা পদবীত অধিষ্ঠিত কৰাত নিষেধাজ্ঞা আৰোপ কৰা হৈছে আৰু জৰিমনাও বিহা হৈছে।
এই শাস্তি প্ৰদানৰ তাৎক্ষণিক প্ৰতিক্ৰিয়াত ভিজকাৰাই ছ’চিয়েল মিডিয়া এক্স-এত লিখিছে, “এয়া ন্যায় নহয়, এইটো প্ৰতিশোধ।তেওঁলোকে মোক ভাঙিব নোৱাৰে।” তেওঁ লগতে এই ৰায়ৰ বিৰুদ্ধে আপীল কৰিব বুলিও কয়।
অভিযোগনামাত কোৱা হৈছে যে মকেগুয়াৰ বিভিন্ন চৰকাৰী নিৰ্মাণ প্ৰকল্পৰ কামত চুক্তিবদ্ধ হোৱাৰ বিনিময়ত ভিজকাৰাই ৬ লাখ ডলাৰতকৈ অধিক উৎকোচ গ্ৰহণ কৰিছিল। ২০১১ চনৰ পৰা ২০১৪ চনলৈকে তেওঁ এই অঞ্চলৰ গৱৰ্ণৰ আছিল। তাৰ পিছত ২০১৮ চনৰ পৰা ২০২০ চনলৈকে পেৰুৰ ৰাষ্ট্ৰপতি হিচাপে কাৰ্যনিৰ্বাহ কৰিছিল।
পেৰুত প্ৰাক্তন ৰাষ্ট্ৰপতিসকল এনে শাস্তিৰ সন্মুখীন হোৱাটো নতুন কথা নহয়। আন কমেও তিনিজন প্ৰাক্তন ৰাষ্ট্ৰপতিক এনে শাস্তি প্ৰদান কৰা হৈছে, যিটোৱে পেৰুৰ ৰাজনৈতিক অস্থিৰতা আৰু দুৰ্নীতিৰ দীৰ্ঘ ইতিহাস প্ৰতিফলিত কৰে বুলি বিশ্লেষকসকলে ধাৰণা কৰে।
২০১৮ চনৰ পৰা দেশত ছয়জন ৰাষ্ট্ৰপতি ক্ষমতালৈ আহিছে, যাৰ ভিতৰত বহুকেইজনৰ বিৰুদ্ধে অভিযোগনামা দাখিল কৰা হৈছে বা দুৰ্নীতিৰ কেলেংকাৰীৰ বাবে পদত্যাগ কৰিবলৈ বাধ্য হৈছে।
কংগ্ৰেছ সদস্যসকলক উৎকোচ দিয়াৰ চেষ্টা আৰু অডেব্ৰেক্ট দুৰ্নীতি কেলেংকাৰীৰ তদন্তৰ মাজতে পেড্ৰ’ পাবলো কুচিনস্কিয়ে পদত্যাগ কৰাৰ পিছত ২০১৮ চনত ভিজকাৰাই কাৰ্যভাৰ গ্ৰহণ কৰে। তিনি বছৰৰ পাছত একেটা দুৰ্নীতিৰ কেলেংকাৰীৰ সৈতে জড়িত অভিযোগত কংগ্ৰেছে তেওঁক পদচ্যুত কৰে।
ভিজকাৰাই এই অভিযোগ অস্বীকাৰ কৰি কয় যে তেওঁৰ অভিযোগনামা আৰু বৰ্তমানৰ বিচাৰ দুয়োটা ৰাজনৈতিক উদ্দেশ্যপ্ৰণোদিত।
এক সুকীয়া বিবৃতিত তেওঁ কয়, “মাফিয়া সদৃশ মিত্ৰজোঁটৰ সন্মুখত থিয় দিয়াৰ বাবে মোক শাস্তি দিয়া হৈছে। মোক পদৰ পৰা আঁতৰাই পেলাইছে। ৰাজহুৱা পদবীত থকাত নিষেধাজ্ঞা আৰোপ কৰিছে। দলৰ পৰা বহিষ্কাৰ কৰিছে। আৰু এতিয়া মোক কাৰাগাৰলৈ পঠিয়াইছে। ভিজকাৰাক তেওঁলোকে ইমান ভয় কৰেনে?”
