মালয়েছিয়াৰ জনপ্ৰিয় পৰ্যটনস্থলী কুৱালালামপুৰৰ পেট্ৰ’নাছ টাৱাৰ ৩-ত এক বৃহৎ অগ্নিকাণ্ড সংঘটিত হয়। শনিবাৰে পুৱা অগ্নিকাণ্ডৰ ফলত আতংক বিয়পি পৰে। জানিব পৰা মতে, ৬০ মহলীয়া আকাশচুম্বী ঘৰটোৰ ওপৰত বিশাল অগ্নিকাণ্ড দেখা পাই আৰক্ষীক খবৰ দিয়া হৈছিল। দুৰ্ঘটনাটোৰ বাবে কোনো লোক হতাহত হোৱা নাই।
সংবাদ মাধ্যমৰ সূত্ৰ অনুসৰি, কুৱালালামপুৰৰ আইকনিক পেট্ৰ’নাছ টুইন টাৱাৰৰ কাষতে অৱস্থিত এই ৬০ মহলীয়া আকাশচুম্বী ঘৰটো। শনিবাৰে পুৱা ৬.৪০ বজাত এই অগ্নিকাণ্ডৰ কথা লক্ষ্য কৰি আকাশচুম্বী ঘৰটোৰ ওপৰৰ অংশত জুই জ্বলি উঠে। এই খবৰ পোৱাৰ ১০ মিনিটৰ ভিতৰতে তাত উপস্থিত হয় আৰক্ষী আৰু অগ্নিনিৰ্বাপক বাহিনী। দীৰ্ঘ প্ৰচেষ্টাৰ অন্তত সন্ধিয়া ৭ বজাৰ ভিতৰত জুই নিয়ন্ত্ৰণ কৰিবলৈ সক্ষম হয়। ৰাতিপুৱা প্ৰায় ৯ বজাত সময় লাগিছিল জুই সম্পূৰ্ণৰূপে নুমুৱাবলৈ। জানিব পৰা মতে, অট্টালিকাটোৰ আভ্যন্তৰীণ অগ্নিনিৰ্বাপক ব্যৱস্থাৰ সহায়ত জুই নিৰ্বাপন কৰা হৈছিল।
অৱশ্যে এই জনপ্ৰিয় উচ্চ অট্টালিকাটোত কেনেকৈ অগ্নিকাণ্ড সংঘটিত হয় সেয়া এতিয়াও স্পষ্ট হোৱা নাই। কিন্তু অনুমান কৰা হৈছে যে ওখ অট্টালিকাটোৰ ৫৭ নং মহলাত এখন ৰেষ্টুৰেণ্ট আছে। তাৰ পৰাই হয়তো জুই আৰম্ভ হৈছে। এতিয়াৰ বাবে বন্ধ হৈ আছে ৰেষ্টুৰেণ্টখন। এই দুৰ্ঘটনাৰ বাবে কোনো লোক হতাহতি হোৱা নাই বুলি প্ৰশাসনে জানিবলৈ দিয়ে। অৱশ্যে ছচিয়েল মিডিয়াত ভাইৰেল হৈ পৰিছে এই অগ্নিকাণ্ডৰ ভয়াবহ ছবি। য’ত ওখ অট্টালিকাৰ ওপৰৰ অংশ জ্বলি থকা দেখা গৈছে আৰু ক’লা ধোঁৱা ওলাইছে।
মন কৰিবলগীয়া যে জনপ্ৰিয় পৰ্যটনস্থলী পেট্ৰ’নাছ টুইন টাৱাৰৰ কাষতে এইটো তৃতীয় টাৱাৰ। ৬০ মহলীয়া এই ওখ অট্টালিকাটো মেনৰা কাৰিগালি নামেৰেও জনা যায়। য’ত অসংখ্য কাৰ্যালয়ৰ লগতে বহুতো ৰেষ্টুৰেণ্ট আছে।
