কেইমাহ মান পূৰ্বে জাতীয়তাবাদী শিবিৰ এৰি হিন্দুত্ববাদী দল বিজেপিত যোগদান কৰা আটাছুৰ প্ৰাক্তন মুখ্য উপদেষ্টা অশ্বিনী চেতিয়াৰ এখন ফটোক লৈ ছচিয়েল মিডিয়াত ব্যাপক চৰ্চা আৰু ব্যংগ-বিদ্ৰূপ দেখা গৈছে।
আটাছুৰ প্ৰাক্তন নেতাজনক ফটোখনত দেখা গৈছে (যিখন ব্যাপক হাৰত বিভিন্ন মন্তব্য আৰু টেগৰ সৈতে শ্বেয়াৰ কৰি থকা হৈছে) আৰ এছ এছৰ পোচাক আৰু হাতত লাঠী লৈ সংগঠনটোৰ শিবিৰত অংশগ্ৰহণ কৰা ৰূপত।
চেতিয়াই যোৱা ২৫ মাৰ্চত আটাছুৰ দায়িত্ব ত্যাগ কৰি বিজেপিত আনুষ্ঠানিকভাৱে যোগদান কৰিছিল।
তাৰ আগলৈকে নাগৰিকত্ব সংশোধনী বিধেয়কৰ তীব্ৰ বিৰোধিতাত আন্দোলন কৰা আটাছুক সন্মুখৰ পৰা নেতৃত্ব দিছিল চেতিয়াই। সদৌ মৰাণ ছাত্ৰ সন্থা, কৃষক মুক্তি, আছু আদিকে ধৰি মুঠ ৭০টা দল-সগঠনৰ সৈতে কৰা এই প্ৰবল আন্দোলনটোৰ এজন গুৰুত্বপূৰ্ণ নেতা আছিল অশ্বিনী চেতিয়া।
“বিজেপিয়ে নাগৰিকত্ব বিধেয়কৰ জৰিয়তে অসমবাসীক গভীৰ সংকটৰ গৰাহলৈ ঠেলি দিছে”, নেতাজনে এই বক্তব্য দিছিল বিজেপিত যোগদান কৰাৰ মাত্ৰ তিনি মাহৰ পূৰ্বে (৪ জানুৱাৰিত) শিৱসাগৰৰ এটা প্ৰতিবাদস্থলীত।
কিন্তু এই মুহূৰ্তত ফটোখনে দিয়া আটাইতকৈ আমোদজনক সংযোগটো হ’ল- ২০১৭ চনত আৰ এছ এছে অশুচি কৰা বুলি কাৰেংঘৰক গাখীৰ ঢালি শুচি কৰা ঘটনাটো, যিটোক আন কিছু সংখ্যকৰ লগতে অশ্বিনী চেতিয়ায়ো নেতৃত্ব দিছিল।
কিন্তু সেই অশ্বিনী চেতিয়াই আজি হাতত লাঠী লৈ, খাকী পোচাকত সংঘৰ (আৰ এছ এছৰ) শিবিৰত কুচকাৱাজত ব্যস্ত, ৰাজ্যখনৰ জাতীয়তাবাদী শিবিৰৰ বাবে বোধহয় ইয়েই এই মুহূৰ্তত আটাইতকৈ লজ্জাজনক দৃশ্য।
উল্লেখ কৰিব পাৰি, আছুৰ প্ৰাক্তন সাধাৰণ সম্পাদক তথা বৰ্তমান বিজেপি সাংসদ তপন কুমাৰ গগৈয়েও নিজৰ ৰাজনৈতিক কেৰিয়াৰৰ স্বাৰ্থত বিজেপিত যোগদান কৰিয়ে খাকী হাফপেণ্টত সংঘত পদসঞ্চালন কৰা দেখা গৈছিল।