বিশ্বৰ ভিতৰতে সৰ্ববৃহৎ গণতন্ত্ৰৰ দেশ ভাৰতবৰ্ষত গণতন্ত্ৰৰ মূল আধাৰ সংবিধানৰ প্ৰতি বিশ্বাস নাই খোদ দেশৰ উপ-ৰাষ্ট্ৰপতি আৰু কেন্দ্ৰীয় আইন মন্ত্ৰীৰ! দেশৰ সংবিধানৰ প্ৰতি দুয়োগৰাকীৰ বিশ্বাসৰ অভাৱ শেহতীয়াকৈ পৰিলক্ষিত হৈছে আৰু সেয়ে দুয়োকে কৰ্তব্যৰ পৰা অব্যাহতি দিয়া উঠিত!
উপ-ৰাষ্ট্ৰপতি জগদীপ ধনকৰ আৰু কেন্দ্ৰীয় আইন মন্ত্ৰী কিৰেন ৰিজিজুৰ বিৰুদ্ধে এই গুৰুতৰ অভিযোগ উত্থাপন কৰি বম্বে উচ্চ ন্যায়ালয়ৰ কাষ চাপিছে বম্বে উকীল সন্থা। অধিবক্তা গোটটোৱে ধনকৰ আৰু কিৰেন ৰিজিজুৱে দেশৰ শীৰ্ষ ন্যায়িক প্ৰতিষ্ঠানটোৰ ওপৰত ধাৰাবাহিক আক্ৰমণ চলাইছে বুলি অভিযোগ কৰি উচ্চ ন্যায়ালয়ত ৰাজহুৱা স্বাৰ্থজড়িত আবেদন দাখিল কৰিছে।
আবেধনখনত অধিবক্তা গোটটোৱে উপ-ৰাষ্ট্ৰপতি আৰু আইন মন্ত্ৰীয়ে উচ্চতম ন্যায়ালয়ক অপমানজনক ভাষা ব্যৱহাৰ কৰি অপমান কৰিছে বুলি অভিযোগ তুলিছে। কলেজিয়াম ব্যৱস্থাৰ লগতে মৌলিক গাঁথনিৰ ধাৰণাৰ বিৰুদ্ধে দুয়োগৰাকীয়ে কৰা মন্তব্যক ‘অযোগ্য আচৰণ’ বুলি অভিহিত কৰিছে বম্বে উকীল সন্থাই।
আবেদনকাৰী বম্বে উকীল সন্থাই উপ-ৰাষ্ট্ৰপতি আৰু আইন মন্ত্ৰীৰ দৰে সাংবিধানিক পদত অধিষ্ঠিত হোৱাৰ পেছতো দুয়ো জনসাধাৰণৰ দৃষ্টিত উচ্চতম ন্যায়ালয়ৰ মহিমা হ্ৰাস কৰিছে বুলি উচ্চ ন্যায়ালয়ৰ সমুখত বিষয়টো দৃষ্টিগোচৰ কৰিছে।
আবেদনখনত লগতে কোৱা হৈছে, “উচ্চতম ন্যায়ালয়ৰ বিভিন্ন ৰায়দানৰ জৰিয়তে ন্যায়াধীশ নিযুক্তি আৰু বদলিৰ কলেজিয়াম ব্যৱস্থাৰ বিকাশ ঘটিছে। উচ্চতম ন্যায়ালয়ে ন্যায়াধীশ নিযুক্তিৰ কলেজিয়াম ব্যৱস্থা ভাৰতৰ সংবিধানৰ মৌলিক গাঁথনিৰ অংশ আৰু ন্যায়পালিকাৰ স্বাধীনতা বজাই ৰাখিবলৈ অপৰিহাৰ্য বুলিও ৰায় দিছে।”
উল্লেখ্য যে উপ-ৰাষ্ট্ৰপতি জগদীপ ধনকৰ আৰু কেন্দ্ৰীয় আইন মন্ত্ৰী কিৰেন ৰিজিজুৱে শেহতীয়াকৈ কলেজিয়াম ব্যৱস্থাৰ ওপৰত উচ্চতম ন্যায়ালয়ৰ সৈতে ধাৰাবাহিক বিবাদত লিপ্ত হৈ আহিছে। এনে পৰিস্থিতিত ন্যায় বিভাগৰ স্বতন্ত্ৰতাত হস্তক্ষেপ নকৰিবলৈ দুয়োগৰাকীক সকীয়াই দিছিল উচ্চতম ন্যায়ালয়ে।
