যোৱা বৃহস্পতিবাৰে কেন্দ্ৰীয় ৰেইল মন্ত্ৰী পিয়ুষ গোৱেলে উদ্বোধন কৰে কলকতা মেট্ৰ’ ৰেইল লাইন।
পূব-পশ্চিম মেট্ৰ’ কৰিড’ৰ কলকতা আৰু চল্টলেক ষ্টেড়িয়ামৰ সৈতে সংযোগী মেট্ৰ’ ৰেইল লাইনৰ প্ৰথম অংশৰ উদ্বোধনী অনুষ্ঠানত কেন্দ্ৰীয় মন্ত্ৰী বাবুল চুপ্ৰিয় উপস্থিত থাকিলেও পশ্চিমবংগৰ মুখ্যমন্ত্ৰী মমতা বেৰ্নাজী উপস্থিত নাছিল।
উক্ত উদ্বোধনী অনুষ্ঠানলৈ কেন্দ্ৰই নিমন্ত্ৰণ কৰা নাছিল বুলি জনাইছে পশ্চিমবংগৰ মুখ্যমন্ত্ৰী মমতা বেৰ্নাজীয়ে। সেয়ে মুখ্যমন্ত্ৰী মমতা বেনাৰ্জীয়ে মেট্ৰ’ লাইন উদ্বোধনী অনুষ্ঠান বয়কট কৰা বুলি জানিবলৈ দিছে।
ইফালে মেট্ৰ’ লাইন উদ্বোধন কৰি কেন্দ্ৰীয় ৰেইল মন্ত্ৰী পিয়ুষ গোৱেলে স্বাধীনতা যুঁজাৰু সৰোজনী নাইডুৰ জন্ম দিৱসত তেওঁৰ নামত মেট্ৰ’ লাইনৰ প্ৰথম অংশ উৰ্ছগা কৰা বুইল ঘোষণা কৰে।
কেন্দ্ৰীয় মন্ত্ৰীগৰাকীয়ে নিজৰ ভাষণ প্ৰসঙ্গত কয়, ‘বংগ জনসংঘৰ প্ৰতিষ্ঠাতা শ্যামাপ্ৰসাদ মুৰ্খাজী, ধৰ্ম-সাহিত্য-সংস্কৃতিৰ অৰবিন্দ, স্বামী বিবকানন্দ, বংকিম চন্দ্ৰ চেৰ্টাজী আদি কৃতবিদ্য পণ্ডিত তথা ব্যক্তিসকলৰ জন্মস্থান হ’লেও স্বাধীনতা আন্দোলনৰ নেত্ৰী সৰোজনী নাইডুৰ নামত পূব-পশ্চিম মেট্ৰ’ কৰিড’ৰৰ প্ৰথম অংশ উৰ্ছগা কৰিছো।’
কলকতাৰ পূব-পশ্চিম মেট্ৰ’ লাইনৰ বাকী অংশ দুবছৰৰ ভিতৰত সম্পূৰ্ণ কৰা হ’ব বুলিও কেন্দ্ৰীয় মন্ত্ৰীগৰাকীয়ে ভাষণ প্ৰসঙ্গত উল্লেখ কৰে।
প্ৰথম আণ্ডাৰগ্ৰাউণ্ড ষ্টেচন ফুলবাগানৰ লগত অহা দুৰ্গা পূজাৰ আগতে প্ৰথম অংশ মেট্ৰ’ লাইন সংযোগ কৰা হ’ব বুলিও দোহাৰে কেন্দ্ৰীয় মন্ত্ৰীগৰাকীয়ে।
ইফালে তৃণমূল কংগ্ৰেছৰ সাংসদ কাকলি ঘোষ দস্তিদাৰ, পশ্চিমবংগ ৰাজ্য চৰকাৰৰ অগ্নিনিৰ্বাপক সেৱা মন্ত্ৰী সুজিত বসু আৰু বিধাননগৰ পৌৰ নিগমৰ অধ্যক্ষ কৃষ্ণা চক্ৰৱৰ্তীক উক্ত উদ্বোধনী অনুষ্ঠানলৈ নিমন্ত্ৰণ কৰা হৈছিল যদিও তেওঁলোকে অনুষ্ঠান বৰ্জন কৰে।
‘পূব-পশ্চিম মেট্ৰ’ কৰিড’ৰ মুখ্যমন্ত্ৰী মমতা বেনাৰ্জীৰ মানস পু্ত্ৰ আছিল। ২০০৯-১১ বৰ্ষত কেন্দ্ৰীয় ৰেইল মন্ত্ৰী হৈ থাকোতে মমতা বেনাৰ্জীয়ে এই প্ৰকল্প ৰেল’ৱে বাজেটত অনুমোদন কৰি আৱণ্টন দিছিল আৰু আজি এই প্ৰকল্প উদ্বোধনী অনুষ্ঠানলৈ মমতা বেনাৰ্জীক নিমন্ত্ৰণ নকৰি বংগবাসীক কেন্দ্ৰীয় চৰকাৰে অপমান কৰিছে।’ তৃণমূল কংগ্ৰেছৰ সাংসদ দস্তিদাৰে অভিযোগ কৰি এইদৰে কয়।
‘আমাৰ মুখ্যমন্ত্ৰীক নিমন্ত্ৰণ নকৰা অনুষ্ঠানত আমি কিয় উপস্থিত থাকিম?’ বুলি প্ৰশ্ন কৰে ৰাজ্যৰ চৰকাৰ মন্ত্ৰী সুজিত বসুৱে।
কলকতাৰ মেয়ৰ আৰু নগৰ উন্নয়ন মন্ত্ৰী ফাৰ্হিদ হাকিমে উক্ত উদ্বোধনী অনুষ্ঠানলৈ মখ্যমন্ত্ৰীক নিমন্ত্ৰণ নকৰাৰ বাবে কেন্দ্ৰক সমালোচনা কৰি কয় ‘ৰাজ্যৰ নগৰ উন্নয়ন বিভাগে মেট্ৰ’ প্ৰকল্পত কেন্দ্ৰৰ লগত একেলগে কাম কৰি থকা অৱস্থাত যিগৰাকী ব্যক্তিয়ে গোটেই প্ৰকল্পটোক জন্ম দিছিল সেইগৰাকী ব্যক্তিক অনুষ্ঠানলৈ নিমন্ত্ৰণ নকৰাটো অতি দুৰ্ভাগ্যজনক।’
ইফালে ৰে’লৱে সূত্ৰত প্ৰকাশ যে মুখ্যমন্ত্ৰীলৈ নিমন্ত্ৰণী পত্ৰ প্ৰেৰণ কৰা হৈছিল।অৱশ্যে নিমন্ত্ৰণী পত্ৰত মুখ্যমন্ত্ৰী মমতা বেনাৰ্জীৰ নাম অতিথি হিচাপে উল্লেখ নাছিল।
উল্লেখ্য যে, ৫.৩ কিলোমিটাৰ দৈৰ্ঘ্যৰ ৬ টা ষ্টেচনযুক্ত মেট্ৰ’ কৰিড’ৰটো শুকুৰবাৰ পৰা মুকলি কৰা হৈছে।
