১৪ দিনৰ ন্যায়িক জিম্মালৈ প্ৰেৰণ কৰা হ’ল এছ আই কেলেংকাৰীৰ অন্যতম মাষ্টাৰমাইণ্ড পি কে দত্তক। চি আই ডিয়ে পি কে দত্তক পুনৰ নিজৰ জিম্মাত নিবিচাৰিলে।
দত্তক কাৰাগাৰলৈ প্ৰেৰণ কৰাটো ইতিমধ্যে নিশ্চিত বুলি জনায় অধিবক্তাই।
পি কে দত্ত বৰ্তমান সময়ত হৃদৰোগত ভূগি থকাৰ লগতে তেওঁৰ দেহত অক্সিজেনৰ পৰিমানো কমি আছে বুলি জানিব পৰা গৈছে।
আজি পি কে দত্তৰ জীয়ৰীয়ে আদালতত ঘৰৰ পৰা ঔষধৰ যোগান ধৰাৰ অনুমতি বিচাৰি আবেদন কৰিছিল আৰু আদালতে সেই আবেদনৰ ভিত্তিত ঘৰৰ পৰা ঔষধ যোগানৰ বাবে অনুমতি প্ৰদান কৰে।
বিগত ৬ অক্টোবৰত ভাৰত-নেপাল সীমান্তৰ পৰা গ্ৰেপ্তাৰ কৰা হৈছিল পি কে দত্তক।
উল্লেখযোগ্য যে, সোমবাৰে আৰক্ষী উপ-পৰিদৰ্শক নিযুক্তি পৰীক্ষাৰ প্ৰশ্নকাকত ফাদিল কেলেংকাৰীৰ অন্যতম নায়ক দিবন ডেকাক ১৪ দিনৰ ন্যায়িক জিম্মালৈ প্ৰেৰণ কৰা হৈছিল।
চি আই ডিৰ জিম্মাত থকা দিবন ডেকাক সোমবাৰে আদালতত হাজিৰ কৰোৱা হৈছিল আৰু চি আই ডিয়ে পুনৰ জিম্মাত নিবিচৰাত আদালতে তেওঁক ন্যায়িক জিম্মালৈ প্ৰেৰণ কৰিছিল।
উল্লেখযোগ্য যে, চি আই ডিৰ দলে সোমবাৰে দিবন ডেকা আৰু এই কেলেংকাৰিটোৰ মূল অভিযুক্ত পি কে দত্তক পুনৰ মুখামুখিকৈ বহুৱাই জেৰা চলায়।
এই জেৰাৰ পিছতে ডেকাক বিয়লিভাগত আদালতত হাজিৰ কৰোৱা হয়।
ইফালে, এই কেলেংকাৰিৰ সৈতে জড়িত থকাৰ অভিযোগত বঙাইগাঁৱৰ পৰা গ্ৰেপ্তাৰ কৰা তিনিজন অভিযুক্ত ক্ৰমে ৰূপম দাস, তাৰিণীকান্ত বণিক্য, প্ৰদীপ মজুমদাৰ আৰু কাহিলীপাৰাৰ পৰা গ্ৰেপ্তাৰ কৰা মনজিৎ বৰাক আদালতে পাঁচদিনৰ বাবে আৰক্ষীৰ জিম্মালৈ প্ৰেৰণ কৰে।
বৰ্তমানলৈকে, এই কেলেংকাৰীত অভিযুক্ত মুঠ ৪৭ গৰাকী লোকক গ্ৰেপ্তাৰ কৰিছে আৰক্ষীয়ে।
