অষ্ট্ৰেলিয়া ভ্ৰমণলৈ যোৱা ভাৰতীয় দলটো ছিডনীত এক ভয়ানক দুৰ্ঘটনাৰ পৰা কথপমি ৰক্ষা পৰিছে।
ঘটনাৰ বিৱৰণীৰ মতে শনিবাৰে ভাৰতীয় জাতীয় ক্ৰিকেট দলটোৱে বাহৰ পাতি থকা ছিডনীৰ অলিম্পিক পাৰ্কৰ পৰা মাত্ৰ ৩০ কিলোমিটাৰ নিলগত নিয়ন্ত্ৰণহীন হৈ এখন বিমান সৰি পৰে।
অষ্ট্ৰেলিয়াৰ স্থানীয় সময় অনুসৰি সন্ধিয়া চাৰে চাৰিটা বজাত দুৰ্ঘটনাটো সংঘটিত হয় ক্ৰোমাৰ ক্ৰিকেট ক্লাৱৰ খেলপথাৰত।
অৱশ্যে ভাৰতীয় দলটো ক’ৰ’ণা পৰীক্ষা সম্পন্ন কৰি নিগেটিভ ফলাফল অহাৰ পিছত অনুশীলন কৰাৰ বাহিৰে অন্য কামত হোটেলৰ বাহিৰলৈ যোৱাৰ কোনো অনুমতি লাভ কৰা নাই।
ভাৰতীয় ক্ৰিকেট দলটোৱে বাহৰ পাতি থকা হোটেলখনৰ পৰা ক্ৰোমাৰ ক্ৰিকেট ক্লাৱটো প্ৰায় ৩০ কিলোমিটাৰ দূৰত্বত অৱস্থিত।
দুৰ্ঘটনাৰ সময়ত উক্ত খেল পথাৰখনত স্থানীয় লোকে ক্ৰিকেট আৰু ফুটবল মেচ খেলি আছিল। তেনে সময়তে ফ্লায়িঙৰ স্কুলৰ এখন উৰন্ত বিমান নিয়ন্ত্ৰণহীন হৈ ভাঙি পৰে।
দুৰ্ঘটনাটোত দুগৰাকী লোক আহত হৈছে যদিও আঘাত গুৰুতৰ নহয় বুলি প্ৰকাশ পাইছে।
বিমানখন নিয়্ন্ত্ৰহীণ হোৱা প্ৰত্যক্ষ কৰাৰ লগে লগে খেলপথাৰত থকা লোকসকলক ক্লাৱৰ ছাদত সোমাবলৈ দৌৰা দৌৰি কৰে বুলি ক্ৰোমাৰ ক্ৰিকেট ক্লাৱৰ উপ সভাপতি গ্ৰেগ ৰ’লিন্সে সংবাদ মাধ্যমৰ আগত প্ৰকাশ কৰিছে।
উল্লেখ্য যে আই পি এল সামৰি ভাৰতীয় দলটোৱে যোৱা বৃহস্পতিবাৰে ডুবাইৰ পৰা অষ্ট্ৰেলিয়া ভ্ৰমণৰ বাবে গৈ ছিডনীত উপস্থিত হয়।
