দেশৰ প্ৰথম প্ৰধানমন্ত্ৰী জৱাহৰলাল নেহৰুৰ ঐতিহাসিক গুৰুত্বৰ ব্যক্তিগত চিঠিসমূহ গান্ধী পৰিয়ালৰ ঘৰত পৰি আছে। প্ৰধানমন্ত্ৰী সংগ্ৰহালয় আৰু পুথিভঁৰাল চমুকৈ পিএমএমএলে এতিয়া বিৰোধী দলপতি ৰাহুল গান্ধীলৈ চিঠিসমূহ ঘূৰাই বিচাৰি পত্ৰ লিখিছে। য’ত স্পষ্টকৈ কোৱা হৈছে, এই চিঠিসমূহ তৎক্ষণাত ঘূৰাই দিব লাগে। কাৰণ, জৱাহৰলাল নেহৰু মেম’ৰিয়েলে নিজেই এই চিঠিবোৰ ১৯৭১ চনত নেহৰু মেম’ৰিয়েল মিউজিয়াম এণ্ড লাইব্ৰেৰীক দিছিল।
২০০৮ চনত ইউ পি এ চৰকাৰৰ দিনত এই বিতৰ্ক আৰম্ভ হৈছিল। নেহৰুৰ এই ব্যক্তিগত চিঠিবোৰ ড° মনমোহন সিঙৰ শাসনকালত ৫১টা বাকচত ভৰাই ছোনিয়া গান্ধীলৈ প্ৰেৰণ কৰা হৈছিল। মাউণ্টবেটেন, এলবাৰ্ট আইনষ্টাইন, জয়প্ৰকাশ নাৰায়ণ, পদ্মজা নাইডু, বিজয়া লক্ষ্মী পণ্ডিত, অৰুণা আছাফ আলী, বাবু জগজীৱন ৰাম, গোবিন্দ বল্লভ পন্ত আদি ঐতিহাসিক ব্যক্তিলৈ নেহৰুৱে এই চিঠি লিখিছিল।
প্ৰধানমন্ত্ৰী সংগ্ৰহালয়ে দাবী কৰিছে যে যি চিঠিবোৰত চৰকাৰৰ অধিকাৰ, সেইবোৰ এনেদৰে লৈ যাব নোৱাৰি। যাৰ বাবে ১০ ডিচেম্বৰত প্ৰধানমন্ত্ৰী সংগ্ৰহালয়ৰ সদস্য ৰিজৱান কাদ্ৰীয়ে ৰাহুল গান্ধীলৈ এখন পত্ৰ লিখি এই সকলোবোৰ চিঠি ঘূৰাই দিবলৈ অনুৰোধ জনায়।
কিন্তু এই ঘটনা এয়াই প্ৰথম নহয়, যোৱা ছেপ্টেম্বৰ মাহত সংগ্ৰহালয়ৰ হৈ নিজেই ছোনিয়া গান্ধীলৈ এখন চিঠি লিখা হৈছিল। সেই প্ৰসংগত পত্ৰখনত ছোনিয়া গান্ধীক বিষয়টোৰ বিষয়ে অৱগত কৰা মূল চিঠিবোৰ ঘূৰাই দিবলৈ কোৱা হৈছিল। অন্যথা চিঠিৰ ফটোকপি দিয়া হওক।
এই ঘটনা পোহৰলৈ অহাৰ লগে লগে সৰৱ হৈ পৰিল বিজেপি। বিজেপিৰ আই টি চেলৰ মুৰব্বী অমিত মালব্যই এক্স হেণ্ডেলত লিখিছে, ‘ইমান চাঞ্চল্যকৰ তথ্য। জৱাহৰলাল নেহৰুৰ চিঠিবোৰ ৫১টা বাকচত গোপনে প্ৰধানমন্ত্ৰী সংগ্ৰহালয় (তেতিয়াৰ নেহৰু সংগ্ৰহ)ৰ পৰা লৈ যোৱা হৈছিল। মাউণ্টবেটেন আৰু অন্যান্য ঐতিহাসিক ব্যক্তিসকললৈ চিঠি লিখা হৈছিল। তদানীন্তন ইউ পি এ চৰকাৰৰ দিনত এই চিঠিবোৰ লৈ গৈছিল ছোনিয়া গান্ধীয়ে। এতিয়া প্ৰশ্ন হয়, নেহৰুজীয়ে মাউণ্ট বেটনলৈ কি লিখিলে যিটো ইউ পি এ চৰকাৰে ঢাকি ৰখাৰ প্ৰয়োজন আহিল? ৰাহুল গান্ধীলৈ পত্ৰ লিখিব? নে সেইবোৰ হাতলৈ আনিবলৈ কিবা পদক্ষেপ লব?’
