অতি কম দিনৰ ভিতৰতে চতুৰ্থবাৰৰ বাবে আজি সমস্যাজৰ্জৰ অসমলৈ আহিব প্ৰধানমন্ত্ৰী নৰেন্দ্ৰ মোদী।
মোদীৰ আগমণৰ পৰিপ্ৰেক্ষিতত ধেমাজী-চিলাপথাৰকে বিভিন্ন স্থানত নিৰাপত্তা ব্যৱস্থা কটকটীয়া কৰি তোলা হৈছে।
ইপিনে প্ৰধানমন্ত্ৰী মোদীৰ আগমণৰ সময়তে আজি সদৌ অসম ছাত্ৰ সন্থাই আজি মোদীক ক’লা পতাকাৰে আদৰণি জনাব।
অসম চুক্তিৰ প্ৰতিটো দফা আখৰে আখৰে পালন কৰাৰ দাবীত আছুৱে আজি সমগ্ৰ ৰাজ্য জুৰি ক’লা পতাকা প্ৰদৰ্শন কৰিব। জানিব পৰা মতে আজি দিনৰ ১১.৩০ বজাত প্ৰধানমন্ত্ৰী মোদীয়ে চিলা পথাৰত আহি উপস্থিত হ’ব।
আজিৰ কাৰ্যসূচী অনুসৰি মোদীয়ে ৪৪.৯৮ কোটি টকা ব্যয়ৰে নিৰ্মাণ কৰা ধেমাজী অভিযান্ত্ৰিক মহাবিদ্যালয়ৰ শ্ৰেণীৰ শুভাৰম্ভ,৫৪.৭১ কোটি টকা ব্যয়ৰে নিৰ্মাণ হ’বলগীয়া শুৱালকুছি অভিযান্ত্ৰিক মহাবিদ্যালয়ৰ আধাৰশিলা স্থাপন,বঙাইগাওঁত ইণ্ডিয়ান অইলৰ প্ৰকল্প, মাকুমত বিশেষ প্ৰকল্প আদি আৰম্ভনি কৰিব।
প্ৰধানমন্ত্ৰী মোদীয়ে ধেমাজী আৰু চিলাপথাৰৰ দুখনকৈ বিশাল ৰাজহুৱা সভাত অংশগ্ৰহণ কৰিব।
তেওঁ ভিডিঅ’ কনফাৰেন্সৰ জৰিয়তে শুৱালকুছি অভিযান্ত্ৰিক মহাবিদ্যালয়ৰ আধাৰশিলা স্থাপন কৰিব বুলি জানিব পৰা গৈছে।
উল্লেখ্য যোৱা ২৩ জানুৱাৰী আৰু ৭ ফেব্ৰুৱাৰীত মোদীয়ে দুবাৰকৈ অসম ভ্ৰমণ কৰি
আগন্তুক অসম বিধানসভা নিৰ্বাচনৰ প্ৰতি লক্ষ্য ৰাখি প্ৰধান মন্ত্ৰী মোদীৰ লগতে বিজেপি দলৰ আন আন শীৰ্ষ কেন্দ্ৰীয় নেতৃত্বৰ সঘনাই কৰিবলৈ ধৰা অসম ভ্ৰমণে যথেষ্ট তাৎপৰ্য বহন কৰিছে।
যোৱা ২৩ জানুৱাৰিত প্ৰধান মন্ত্ৰী মোদীয়ে শিৱসাগৰ জিলাৰ ঐতিহাসিক জেৰেঙা পথাৰত আয়োজিত এক বিশাল কাৰ্যসূচীত অংশগ্ৰহণ কৰি ৰাজ্যৰ ১.০৬ লাখ খিলঞ্জীয়া লোকক ভূমি পট্টা প্ৰদান কৰে।
প্ৰধান মন্ত্ৰী মোদীয়ে বিশ্বনাথ জিলাৰ বিশ্বনাথ চাৰিআলিত এখন চিকিৎসা মহাবিদ্যালয়ৰ আধাৰশিলা স্থাপন কৰিছিল ।
উল্লেখ্য যে আগন্তুক বিধানসভা নিৰ্বাচনত বিজেপি মিত্ৰজোঁটে ১২৬খন আসনৰ ভিতৰৰে ১০০ৰো অধিক আসনত জয়ী হোৱাৰ লক্ষ্য বান্ধি লৈছে।
এই লক্ষ্যত উপনীত হ’বলৈ প্ৰধান মন্ত্ৰী নৰেন্দ্ৰ মোদী, অমিত শ্বাহ, জেপি নাড্ডাকে ধৰি আন আন শীৰ্ষ নেতাসকলে অসমলৈ আহি ভোটাৰ ৰাইজক আকৰ্ষিত কৰাৰ চেষ্টাত ব্ৰতী হৈছে।
‘কা’ৰ বিৰুদ্ধে অসমৰ প্ৰকৃত জাতীয়তাবাদী মনোভাৱাপন্ন জনতাই কৰা প্ৰতিবাদক মুঠেও গুৰুত্ব নিদিয়া মোদীৰ চৰকাৰে বিগত দিন সমূহত অসমত এমুঠি মান হিতাধিকাৰী সৃষ্টিৰ বাহিৰে গৰিষ্ঠসংখ্যক লোকৰে মৌলিক সমস্যা সমূহ দূৰ কৰাত সফল হোৱা নাই বুলি সচেতন মহলে মন্তব্য কৰিছে।
মোদীৰ দিনতে বন্ধ হৈ পৰিছে নগাঁও, কাছাৰৰ কাগজকলকে ধৰি বহু সম্ভাৱনাপূৰ্ণ উদ্যোগ প্ৰতিষ্ঠান।নতুন উদ্যোগ স্থাপনৰ কথাটো বাদেই।অসমত আগৰে পৰা থকা চিকিৎসা মহাবিদ্যালয় কেইখনতে আজিও নাই পূৰ্ণ আন্তঃগাঁথনি।
সেইবাবেই মেডিকেল কাউন্সিল অৱ ইণ্ডিয়াৰ দলে পৰিদৰ্শন কৰিবলৈ আহিলে চৰকাৰে ইখন চিকিৎসা মহাবিদ্যালয়ৰ অধ্যাপকক সিখনৰ অধ্যাপক হিচাবে দেখুৱাবলগীয়া হয় বুলি তীৰ্যক মন্তব্য কৰিছে বহুতে।
সচেতন মহলৰ মতে আন্তঃগাঁথনি নোহোৱাকৈয়ে কেৱল ৰাজনৈতিক চমক সৃষ্টিৰ বাবেই অসমত খোলা হৈছে বা খোলাৰ প্ৰতিশ্ৰুতি দিয়া হৈছে ইখনৰ পিছত সিখনকৈ চিকিৎসা, অভিযান্ত্ৰিক মহাবিদ্যালয়।