অৱশেষত সকলো জল্পনা-কল্পনাৰ অন্ত পেলাই আজি পুৱা ৰাছিয়াই ইউক্ৰেইন আক্ৰমণ কৰাৰ পিছতে যুদ্ধৰ ভয়াৱহতা তথা ই সৃষ্টি কৰিব পৰা প্ৰভাৱক লৈ উদ্বিগ্ন হৈ পৰিছে সমগ্ৰ বিশ্ব।
ৰাছিয়া-ইউক্ৰেইন যুদ্ধ সন্দৰ্ভত আলোচনাৰ বাবে ভাৰতৰ প্ৰধানমন্ত্ৰী নৰেন্দ্ৰ মোদীয়ে আজি সন্ধিয়া বিত্ত মন্ত্ৰী নিৰ্মলা সীতাৰমণ আৰু অন্যান্য শীৰ্ষস্থানীয় বিষয়াসকলৰ সৈতে মিলিত হ’ব।
বৈঠকত মূলতঃ ৰাছিয়া-ইউক্ৰেইন যুদ্ধৰ অৰ্থনৈতিক প্ৰভাৱ আৰু খাৰুৱা তেলৰ বৰ্ধিত মূল্যৰ প্ৰভাৱ হ্ৰাস কৰাৰ উপায় সম্পৰ্কে আলোচনা কৰা হ’ব বুলি এক চৰকাৰী সূত্ৰই সংবাদ মাধ্যমক জানিবলৈ দিয়ে।
ভাৰতে যুদ্ধৰ ভয়াৱহতাৰ প্ৰতি লক্ষ্য ৰাখি ৰাছিয়া আৰু ইউক্ৰেইনক তাৎক্ষণিক যুদ্ধবিৰতিৰ বাবে আহ্বান জনাইছে।
দুয়োখন দেশৰ মাজত বিবাদ নিষ্পত্তি নহ’লে সমগ্ৰ অঞ্চলটোক গুৰুতৰভাৱে অস্থিৰ কৰি তুলিব পৰা এক গভীৰ সংকটৰ সৃষ্টি হ’ব বুলি আশংকা প্ৰকাশ কৰিছে ভাৰতে।
আনহাতে যুদ্ধৰ বিভীষিকাৰ মাজত সোমাই পৰা ইউক্ৰেইনত আৱদ্ধ হৈ থকা শিক্ষাৰ্থীসহ ভাৰতীয় নাগৰিক সকলক দেশলৈ প্ৰত্যাৱৰ্তনৰ বাবে বিশেষ ব্যৱস্থা গ্ৰহণ কৰিবলৈ চিন্তা-চৰ্চা চলাইছে ভাৰতে।
উল্লেখ্য যে আজি দুপৰীয়া ইউক্ৰেইনৰ আকাশীপথ বন্ধ থকাৰ বাবে ভাৰতীয় নাগৰিকসকলক ঘূৰাই আনিবলৈ যোৱা ভাৰতৰ এখন বিশেষ বিমান ঘূৰি আহিবলগীয়া হৈছিল।
অৱশ্যে আজি পুৱাই শিক্ষাৰ্থীসহ ১৮২ জন ভাৰতীয় নাগৰিকক ইউক্ৰেইনৰ পৰা কঢ়িয়াই অনা এখন বিমান ভাৰতত উপস্থিত হৈছিল।
২২ ফেব্ৰুৱাৰীতো এয়াৰ ইণ্ডিয়াৰ আন এখন বিমানে প্ৰায় ২৪০ জন ভাৰতীয় নাগৰিকক দেশলৈ ঘূৰাই আনিছিল।
