লোকসভা নিৰ্বাচনত কাৰ্যতঃ বিপৰ্যয়ৰ সন্মুখীন হৈছে বিজেপি। নীতিশ কুমাৰ আৰু চন্দ্ৰবাবু নাইডুৰ সহায়ত এন ডি এ-য়ে চৰকাৰ গঠন কৰিবলৈ সক্ষম হয়। তৃতীয়বাৰৰ বাবে প্ৰধানমন্ত্ৰী হয় নৰেন্দ্ৰ মোডী। কিন্তু ক্ষমতালৈ আহিলে কি হ’ব, সমীক্ষাৰ প্ৰতিবেদন নৰেন্দ্ৰ মোডীৰ বাবে বৰ ভাল নহয়।
লোকসভা নিৰ্বাচনৰ ফলাফলৰ কেইমাহমান পিছতে ৰাষ্ট্ৰীয় সংবাদ মাধ্যমে মুড অৱ দ্য নেচন সমীক্ষা চলাইছিল। আৰু তাতেই দেখা যায় যে দেশৰ ৫০ শতাংশতকৈও অধিক ভোটাৰৰ নৰেন্দ্ৰ মোডীৰ ওপৰত আস্থা নাই।
২০১৪ চনত এন ডি এ ক্ষমতালৈ অহাৰ পিছত এয়া প্ৰথম এনে প্ৰতিবেদন দেখা গ’ল। এফালে নৰেন্দ্ৰ মোডীৰ ওপৰত আস্থা কমি অহাৰ বিপৰীতে ৰাহুল গান্ধীৰ জনপ্ৰিয়তা বৃদ্ধি পাইছে বুলি প্ৰতিবেদনত দাবী কৰা হৈছে। কিন্তু তেওঁ এতিয়াও নৰেন্দ্ৰ মোদীতকৈ যথেষ্ট পিছ পৰি আছে।
প্ৰতিবেদন অনুসৰি যদি এতিয়া লোকসভা নিৰ্বাচন অনুষ্ঠিত হয় তেন্তে বিজেপিৰ ভোটৰ অংশ ৩৮%ৰ পৰা ৩৬.৬%লৈ হ্ৰাস পাব।
এই সমীক্ষাত এন ডি এ মিত্ৰজোঁটেই চৰকাৰ গঠনৰ দাবীত আছে। কিন্তু দেখা গৈছে যে কংগ্ৰেছৰ আসনৰ সংখ্যা বৃদ্ধি পাইছে। ১৫ জুলাইৰ পৰা ১০ আগষ্টলৈকে এই সমীক্ষা চলোৱা হৈছিল। ১ লাখ ৩৬ হাজাৰ ৪৬৩ জন ভোটাৰে নিজৰ মতামত দিয়ে। তাত ৪৯ শতাংশ লোকে মোডীক ভোট দিছিল। ৩২ শতাংশৰ আস্থা ৰাহুল গান্ধী। ৮ শতাংশ ভোট লাভ কৰি তৃতীয় স্থানত আছে সমাজবাদী পাৰ্টিৰ মুৰব্বী অখিলেশ যাদৱ।
সমীক্ষাৰ প্ৰতিবেদন অনুসৰি মোডীৰ প্ৰতি মানুহৰ সমৰ্থন প্ৰায় চাৰে সাত শতাংশ হ্ৰাস পাইছে। বহু ভোটাৰৰ মতে মোডী চৰকাৰে কেন্দ্ৰীয় তদন্তকাৰী সংস্থাৰ অপব্যৱহাৰ কৰিছে। নিৰ্বাচনৰ পূৰ্বে চিবিআই, ইডিক ৰাজনৈতিক উদ্দেশ্যত ব্যৱহাৰ কৰা হৈছে।
