আজৱ কাণ্ড! প্ৰধানমন্ত্ৰীয়ে খঙতে সাংবাদিকক চটিয়ালে চেনিটাইজাৰ, ক’ত?

থাইলেণ্ডৰ প্ৰধানমন্ত্ৰী প্ৰয়ুথ চান-অচাই এটা আজৱ কাণ্ড সংঘটিত কৰিছে।

ঘটনাটো মঙলবাৰৰেই আৰু সম্প্ৰতি ইণ্টাৰনেটত ই ভাইৰেল হৈ পৰিছে।

প্ৰধানমন্ত্ৰীজনে এখন সংবাদমেল সম্বোধন কৰি আছিল কিন্তু সাংবাদিকসকলে তেওঁক উপৰ্যুপৰি কিছুমান প্ৰশ্ন সুধি  আছিল।

প্ৰশ্নসমূহৰ উত্তৰ দিব নোৱাৰি তেওঁ সংবাদমেলৰ মাজতে সাংবাদিকসকলক উদ্দেশ্যি চেনিটাইজাৰ চটিয়াব ধৰে।

উল্লেখযোগ্য যোৱা সপ্তাহত থাইলেণ্ডৰ তিনিজনকৈ মন্ত্ৰীক ২০১৪ চনত দেশখনত সংঘটিত হোৱা প্ৰতিবাদী বিক্ষোভত অংশ লোৱা বাবে কাৰাবাসলৈ প্ৰেৰণ কৰা হয়।

তেতিয়াৰ পৰা প্ৰয়ুথ মন্ত্ৰীসভাৰ তিনিটা কেবিনেট পদবী খালী হৈ আছে।

সংবাদমেলখনত প্ৰধানমন্ত্ৰীজনক সাংবাদিকসকলে খালী হৈ থকা পদবীকেইটাৰ সম্ভাব্য প্ৰাৰ্থীসকলৰ বিষয়ে সুধি আছিল।

সাংবাদিকসকলৰ প্ৰশ্নত প্ৰধানমন্ত্ৰী ক্ষুণ্ণ হৈ পৰে।

Thai prime minister sprays hand sanitizer at journalists who are seen trying to shield their faces pic.twitter.com/rEcOeqYxCt

— Reuters (@Reuters) March 9, 2021

আন্তঃৰাষ্ট্ৰীয় বাতৰি সংস্থা ‘ৰয়টাৰ’-এ টুইটাৰত ঘটনাৰ ভিডিঅ’টো শ্বেয়াৰ কৰিছে।

ভিডিঅ’টোত প্ৰয়ুথে সাংবাদিকসকলক সুধিছে- ”প্ৰধানমন্ত্ৰীয়েই সকলো কথা প্ৰথমে জনাটো প্ৰয়োজন নেকি?”

তাৰ পাছতে তেওঁ বহি থকা আসনৰ পৰা নামি আহে আৰু এটা হেণ্ড চেনিটাইজাৰৰ সৰু বটল হাতত লয়, সাংবাদিকসকলৰ কাষলৈ যায় আৰু তেওঁলোকলৈ উদ্দেশ্যি চেনিটাইজাৰ চটিয়াই যাব ধৰে।

চেনিটাইজাৰ চটিয়াই  থাকোতে তেওঁ আনখন হাতেৰে মুখত এখন মাস্ক ধৰি থাকে।

টুইটাৰত শ্বেয়াৰ কৰাৰ পাছতে প্ৰায় ৬৭ হেজাৰ লোকে ৰয়টৰৰ ভিডিঅ’টো চাইছে।

উল্লেখযোগ্য যে এগৰাকী প্ৰাক্তন সামৰিক নেতা প্ৰয়ুথক তেওঁৰ সৰস আচৰণ আৰু ভাষ্যৰ বাবে জনাজাত।