নতুন বছৰৰ আৰম্ভণিতে দুদিনীয়া কাৰ্যসূচীৰে আজি অসম ভ্ৰমণ কৰিব প্ৰধানমন্ত্ৰী নৰেন্দ্ৰ মোদীয়ে। ১৭ জানুৱাৰীৰ সন্ধিয়া প্ৰায় ৬ বজাত গুৱাহাটীৰ সৰুসজাই ষ্টেডিয়ামত এক ঐতিহাসিক সাংস্কৃতিক ক্ষণৰ সাক্ষী হ’ব প্ৰধানমন্ত্ৰী। বড়ো সম্প্ৰদায়ৰ সমৃদ্ধ ঐতিহ্য উদযাপনৰ বাবে আয়োজিত ‘বাগুৰুম্বা দ্বহৌ ২০২৬’ শীৰ্ষক অনুষ্ঠানত তেওঁ অংশগ্ৰহণ কৰিব। এই বিশেষ উপলক্ষে ৰাজ্যৰ ২৩ খন জিলাৰ ৮১ টা বিধানসভা সমষ্টিৰ পৰা অহা ১০,০০০ ৰো অধিক শিল্পীয়ে একেলগে সুসংগতভাৱে পৰম্পৰাগত বাগৰুম্বা নৃত্য পৰিবেশন কৰি এক অভিলেখ সৃষ্টি কৰিব।
ভ্ৰমণৰ দ্বিতীয় দিনা অৰ্থাৎ ১৮ জানুৱাৰীত দিনৰ প্ৰায় ১১ বজাত প্ৰধানমন্ত্ৰীয়ে নগাঁও জিলাৰ কলিয়াবৰত উপস্থিত হৈ ৬,৯৫০ কোটি টকাতকৈও অধিক ব্যয়সাপেক্ষ কাজিৰঙা এলিভেটেড কৰিডৰ প্ৰকল্পৰ ভূমি পূজন কৰিব। ৮৬ কিলোমিটাৰ দৈৰ্ঘ্যৰ এই প্ৰকল্পটোৱে ৭১৫ নং ৰাষ্ট্ৰীয় ঘাইপথৰ কলিয়াবৰ-নুমলীগড় অংশক চাৰিশাৰীলৈ উন্নীত কৰিব। বিশেষকৈ কাজিৰঙা ৰাষ্ট্ৰীয় উদ্যানৰ বন্যপ্ৰাণীৰ সুৰক্ষাৰ প্ৰতি লক্ষ্য ৰাখি ইয়াৰ ৩৫ কিলোমিটাৰ অংশ এলিভেটেড কৰিডৰ হিচাপে নিৰ্মাণ কৰা হ’ব যাতে জীৱ-জন্তুৰ চলাচলত কোনো বাধাৰ সৃষ্টি নহয়।
একেটা কাৰ্যসূচীতে প্ৰধানমন্ত্ৰীয়ে উত্তৰ-পূৰ্বাঞ্চলৰ ৰেল যোগাযোগ ব্যৱস্থা অধিক শক্তিশালী কৰাৰ উদ্দেশ্যে দুখনকৈ নতুন অমৃত ভাৰত এক্সপ্ৰেছ ৰেলৰ শুভাৰম্ভ কৰিব। কামাখ্যাৰ পৰা হাৰিয়ানাৰ ৰোহটকলৈ আৰু ডিব্ৰুগড়ৰ পৰা লক্ষ্ণৌৰ গোমতী নগৰলৈ চলিবলগীয়া এই দুই নতুন ৰেল সেৱাই উত্তৰ-পূব আৰু উত্তৰ ভাৰতৰ মাজত জনসাধাৰণৰ ভ্ৰমণ অধিক সুৰক্ষিত আৰু সুবিধাজনক কৰি তুলিব।
