বোকাখাতত গঁড়ৰ পৰিৱৰ্তে চোৰাংচিকাৰীৰ চিকাৰ হৈছে দলৰে এজন সতীৰ্থ।
বুধবাৰে নিশা বোকাখাতৰ কমাৰগাঁৱত ধনশিৰি নদীৰ পাৰত গঁড় চিকাৰী ধন বৰা ওৰফে মনজিত বৰাক তেওঁৰে সতীৰ্থ কেইজনমানে মিলি হত্যা কৰে।
ঘটনাৰ খবৰ পাই তাতালিতে ঘটনাস্থলীত উপস্থিত হোৱা কমাৰগাওঁ আৰক্ষীৰ এটা দলে খেদি খেদি দলটোৰ সদস্য পল্লৱ বসুমতাৰী আৰু হৰেকৃষ্ণ দলেক আটক কৰে। গৌতম দলে নামৰ দলটোৰ আন এজন সদস্য পলাই যাবলৈ সক্ষম হৈছে।
সতীৰ্থৰ চিকাৰ হোৱা ধন বৰাৰ মৃতদেহ বৃ্হস্পতিবাৰ পৰ্য্যন্ত উদ্ধাৰ কৰিব পৰা হোৱা নাই। চোৰাংচিকাৰীকেইজনে সতীৰ্থজনক হত্যা কৰি ধনশিৰিত উটুৱাই দিয়া বুলি সন্দেহ কৰিছে আৰক্ষীয়ে।
পুলিচৰ চোৰাংচোৱা বুলি সন্দেহ কৰিয়েই ধন বৰাক হত্যা কৰা বুলি প্ৰাৰম্ভিক জেৰাত ধৃত চোৰাংচিকাৰীকেইজনে প্ৰকাশ কৰিছে, আৰক্ষী সূত্ৰৰ দাবী।
আনহাতে পলাতক গৌতম দলেৰ বোকাখাত পলাশগুৰিৰ ঘৰৰ পৰা আৰক্ষী আৰু কাজিৰঙা কৰ্তৃপক্ষৰ যুটীয়া অভিযানত বৃ্হস্পতিবাৰে দুটা ৩৹৩ ৰাইফল, এটা চাইলেঞ্চাৰ আৰু ১৪ জাঁই সক্ৰিয় গুলী উদ্ধাৰ হৈছে৷ বাসগৃহৰ চৌহদতে থকা ঘাঁহনিৰ মাজত অস্ত্ৰসমূহ লুকুৱাই ৰখা হৈছিল৷
হত্যাকাণ্ডটো সংঘটিত হোৱা ঠাইৰপৰা আৰক্ষীয়ে এখন AS-05M-0435 নম্বৰৰ পালছাৰ মটৰ চাইকেল জব্দ কৰিছে।
ধৃত হৰেকৃষ্ণ দলে আৰু গৌতম দলেক কাজিৰঙাত গঁড় হত্যা সন্দৰ্ভত আগতেও গ্ৰেপ্তাৰ কৰা হৈছিল৷
গঁড় হত্যাত সহায় কৰাৰ বাবে গৌতম দলেৰ মাতৃকো গ্ৰেপ্তাৰ কৰি জে’ললৈ প্ৰেৰণ কৰিছিল আৰক্ষীয়ে৷
