Poem collection inaugurate হাজোত প্ৰভাত ভাগৱতীৰ কাব্য সংকলন ‘অনুভূতি’ উন্মোচন
নৱ বৰ্ষৰ প্ৰাকক্ষণত পঞ্চতীৰ্থ হাজোত আজি আনুষ্ঠানিক ভাবে উন্মোচন কৰা হয় প্ৰভাত ভাগৱতীৰ কবিতা সংকলন ‘অনুভূতি’।
হাজোৰ চন্দ্ৰমা হোটেলত আয়োজিত হাজো এছ বি এছ কে আৰ উচ্চতৰ মাধ্যমিক বিদ্যালয়ৰ পৰা ১৯৭৬ চনত উচ্চ মাধ্যমিক উত্তীৰ্ণ আৰু উচ্চতৰ মাধ্যমিকত নামভৰ্তি কৰা শিক্ষাৰ্থীসকলৰ হোৱাটছ এপ গ্ৰুপ ‘উভতি চাওঁ ১৯৭৬ (হাজো)ৰ প্ৰীতি সমাৰোহত কাব্য সংকলনখন আনুষ্ঠানিক ভাবে উন্মোচন কৰে ভাৰতীয় প্ৰশাসনিক সেৱাৰ বিষয়া দেৱেশ্বৰ মালাকাৰে।
২০২০ চনৰ ডিচেম্বৰ মাহত অসম গ্ৰামীন বিকাশ বেংকৰ এগৰাকী বিষয়া হিচাবে অৱসৰ গ্ৰহণ কৰা প্ৰভাৱ ভাগৱতীয়ে দীৰ্ঘদিন ধৰি সাহিত্য চৰ্চা কৰি আহিছে। ‘অনুভূতি’ তেওঁৰ প্ৰথম কাব্য গ্ৰন্থ।
পাণবজাৰৰ আগশাৰীৰ প্ৰকাশন গোষ্ঠী এম আৰ পাব্লিকেছনে প্ৰকাশ কৰি উলিওৱা প্ৰভাত ভাগৱতীৰ ‘অনুভূতি’ কাব্য গ্ৰন্থত মুঠ ৫০ টা ভিন্ন স্বাদৰ কবিতাই ঠাই পাইছে।
গ্ৰন্থ উন্মোচনী সভাত উপস্থিত থাকে ডঃ অজিত কুমাৰ মেধি, ডাঃমণিকা দাস,ভূপেন চন্দ্ৰ বিশ্বাসী,সত্যপ্ৰকাশ মালাকাৰ,ডঃ সুষমা মজুমদাৰ, মঞ্জুলা মেধি, পদুমা হাটখোৱা, অনিল দাস, প্ৰদীপ দাস, জহৰুল,সুভাষ দাস আদি ব্যক্তিসকল।
উল্লেখ্য হাজো এছ বি এছ কে আৰ উচ্চতৰ মাধ্যমিক বিদ্যালয়ৰ পৰা ১৯৭৬ চনত উচ্চ মাধ্যমিক উত্তীৰ্ণ আৰু উচ্চতৰ মাধ্যমিকত নামভৰ্তি কৰা শিক্ষাৰ্থীসকলে দীৰ্ঘ বছৰৰ বিৰতিৰ মূৰতো পুনৰ একেলগ হোৱাৰ কথাই বহুতোকে অনুপ্ৰাণিত কৰিছে।
বছৰৰ পিছত বছৰ ধৰি বিভিন্ন ক্ষেত্ৰৰ সৈতে জৰিত হৈ থকাৰ পিছতো সেইসকল শিক্ষাৰ্থী আজি পুনৰ একেলগ হয় হাজোৰ চন্দ্ৰমা হোটেলত ।
আজিৰ অনুষ্ঠানতে বিদা্যলয় খনৰ ১৯৭৬ চনত উচ্চ মাধ্যমিক উত্তীৰ্ণ আৰু উচ্চতৰ মাধ্যমিকত নামভৰ্তি কৰা শিক্ষাৰ্থীসকলে বিভিন্ন কাৰ্যসূচীৰ মাজেৰে এৰি অহা দিন বোৰৰ কথা ৰোমন্থন কৰে।
অনুষ্ঠানত ইতিমধ্যে ইহসংসাৰ এৰি যোৱা উক্ত বেটছৰ শিক্ষাৰ্থীসকলৰ আত্মাৰ সদগতি কামনা কৰিও প্ৰাৰ্থনা জনোৱা হয়।