বহুচৰ্চিত লেপাৰ্ড-২ টেংকৰ (Leopard tanks)প্ৰথম চালান ইউক্ৰেইনত উপস্থিত হৈছে। পোলেণ্ডৰ প্ৰতিৰক্ষা মন্ত্ৰী মাৰিয়ছ ব্লাচজাগে শুকুৰবাৰে কয় যে ৰাছিয়াৰ ইউক্ৰেইন আক্ৰমণৰ বাৰ্ষিকীত টেংকবোৰ কিয়েভলৈ যোগান ধৰা হৈছে। তেওঁ ৰাষ্ট্ৰীয় সুৰক্ষা পৰিষদৰ এখন বৈঠকত কয়, “পোলেণ্ডৰ লেপাৰ্ড আজি (শুকুৰবাৰে) ইউক্ৰেইনত উপস্থিত হৈছে। অৱশ্যে তেওঁ এই জাৰ্মান নিৰ্মিত টেংকবোৰৰ কিমানখন কিয়েভক দিয়া হৈছে সেয়া সদৰী কৰা নাই।
পোলেণ্ডে প্ৰথমে ইউক্ৰেইনক লেপাৰ্ড যোগান ধৰিছে। অৱশ্যে, জাৰ্মানীয়ে প্ৰথমতে এই টেংকবোৰ ইউক্ৰেইনলৈ প্ৰেৰণ কৰিবলৈ অনিচ্ছুক আছিল। সেই সময়ত পোলেণ্ডে এই স্থিতিৰ বাবে বাৰ্লিনক তীব্ৰ সমালোচনা কৰিছিল।
ইপিনে, পোলেণ্ডৰ প্ৰধানমন্ত্ৰী মাটেউজ মোৰাউইকিয়ে শুকুৰবাৰে কিয়েভ ভ্ৰমণ কৰে। তাত তেওঁ ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিক সাক্ষাৎ কৰে।
মেটিউছে এক টুইটযোগে কয়, “ইউক্ৰেইনত ৰাছিয়াৰ সামৰিক অভিযানৰ বাৰ্ষিকীত, মই ইউক্ৰেইনৰ প্ৰতিৰক্ষাত অধিক সমৰ্থন আগবঢ়োৱাৰ বাবে এক স্পষ্ট বাৰ্তা প্ৰেৰণ কৰিবলৈ কিয়েভত আছো।”
আনহাতে, ফিনলেণ্ডে ইউক্ৰেইনলৈ তিনিটা লেপাৰ্ড-২ টেংক প্ৰেৰণ কৰাৰ কথা ঘোষণা কৰিছে। দেশখনে বৃহস্পতিবাৰে এই ঘোষণা কৰিছিল। প্ৰতিৰক্ষা মন্ত্ৰী মিকো চাভোলাই এক বিবৃতিত কৈছিল যে তেওঁলোকে ইউক্ৰেইনলৈ অধিক প্ৰতিৰক্ষা সঁজুলি প্ৰেৰণ কৰিব। অন্যান্য অংশীদাৰসকলৰ সৈতে তেওঁলোকেও লেপাৰ্ড টেংক সহযোগিতাত অংশগ্ৰহণ কৰিব। তেওঁলোকৰ সামৰিক সহায়ৰ পেকেজত অন্যান্য বিষয়ো অন্তৰ্ভুক্ত আছে।
হেলচিঙ্কিয়ে কিয়েভক টেংক দিব বুলি ঘোষণা কৰাৰ পিছত সংবাদমেললৈ আহিছিলফিনলেণ্ডৰ প্ৰতিৰক্ষা মন্ত্ৰী। তেওঁ কয় যে লেপ’ৰ্ড-২ টেংকৰ এটা পৰিৱৰ্তিত সংস্কৰণ ইউক্ৰেইনলৈ প্ৰেৰণ কৰা হ’ব। ই মাইনকে ধৰি অন্যান্য বিস্ফোৰক আঁতৰাবলৈ সক্ষম।
ইয়াৰ মাজতে, ছুইডেনেও কালি ১০ খন লেপাৰ্ড-২ টেংক প্ৰেৰণ কৰাৰ কথা ঘোষণা কৰিছে। প্ৰধানমন্ত্ৰী উলফ ক্ৰিষ্টাৰচন আৰু প্ৰতিৰক্ষা মন্ত্ৰী পল জনছনে কালি এই ঘোষণা কৰিছিল।
আমেৰিকা যুক্তৰাষ্ট্ৰই ৰাছিয়াৰ আক্ৰমণৰ বাৰ্ষিকীত ইউক্ৰেইনৰ বাবে অতিৰিক্ত ২০০ কোটি ডলাৰ নিৰাপত্তা সাহায্য ঘোষণা কৰিছে। পেন্টাগনে কয় যে এই সহায়ৰ ভিতৰত আছে হিমাৰ্ছ ৰকেট প্ৰণালীৰ বাবে গোলাবাৰুদ, ১৫৫ মিমি গোলাবাৰুদ, ড্ৰোন আৰু কাউণ্টাৰ-ড্ৰোন প্ৰণালী, মাইন আঁতৰোৱাৰ সঁজুলি, প্ৰশিক্ষণ আৰু ৰক্ষণাবেক্ষণৰ বাবে পুঁজি।
আমেৰিকা যুক্তৰাষ্ট্ৰই ইউক্ৰেইনৰ বাবে বিশ্বব্যাপী সমৰ্থন সংগ্ৰহ কৰাৰ ক্ষেত্ৰত আগভাগ লৈছে। যোৱা বছৰ ফেব্ৰুৱাৰীত ৰাছিয়াৰ আক্ৰমণৰ পিছত ৱাশ্বিংটনে কিয়েভক সমৰ্থন কৰিবলৈ তৎপৰতাৰে এক আন্তৰ্জাতিক মিত্ৰজোঁট গঠন কৰে। দেশখনে বহু দেশে প্ৰদান কৰা সহায়ৰো সমন্বয় কৰি আছে।
মুঠতে আমেৰিকা যুক্তৰাষ্ট্ৰকে ধৰি ইউৰোপৰ দেশসমূহে ৰাছিয়াৰ বিৰুদ্ধে পোতক তুলিবলৈ একত্ৰিত হোৱা দেখা গৈছে আৰু ইয়াৰ বাবে তেওঁলোকে ইউক্ৰেইনক ‘বলিৰ পঠা’ হিচাপে ব্যৱহাৰ কৰিছে।
