ক্ৰমশঃ অপৰাধীৰ ৰম্যভূমিত পৰিণত হৈছে নগাঁও জিলাৰ ৰূপহীহাট অঞ্চল।
বৃহস্পতিবাৰে আৰক্ষীয়ে ৰূপহীহাটত দুখনকৈ চুৰি বাইকসহ এটা গভাইত চোৰক আটক কৰিবলৈ সক্ষম হয়।
ৰাতিপুৱা এক গোপন সুত্ৰৰ পম খেদি আৰক্ষীয়ে অভিযান চলাই ছাইদৰীয়াৰ পৰা চুৰি কৰা বাইক দুখনৰ সৈতে আটক কৰে হবিবুৰ ৰহমান নামৰ দুৰ্ধৰ্ষ চোৰটোক।
ধৃত হবিবুৰ ৰহমানৰ ঘৰ দলনি জুৰীয়াত।
আৰক্ষীয়ে উদ্ধাৰ কৰা বাইক দুখনৰ এখন নম্বৰ প্লেট বিহীন হোৱাৰ লগতে আনখন এ এছ-০২এল-৯৯৮১ নম্বৰৰ পালছাৰ বাইক।
বৃহত্তৰ অঞ্চলটোত দীৰ্ঘদিন ধৰি এটা শক্তিশালী বাইক চোৰৰ চক্ৰ সক্ৰিয় হৈ থকাৰ খবৰ আৰক্ষীয়ে লাভ কৰিছিল।
আনহাতে, চোৰৰ চক্ৰটো শীঘ্ৰে উৎখাত কৰাৰ লগতে আন বহু কেইটা দুৰ্ধৰ্ষ চোৰৰ সন্ধানত ইতিমধ্যে আৰক্ষীয়ে অনুসন্ধান অব্যাহত ৰাখিব বুলি জানিবলৈ দিছে সংবাদ মাধ্যমক।
উল্লেখযোগ্য যে, চলিত সপ্তাহত ৰূপহীহাট আৰক্ষী থানাৰ ভাৰপ্ৰাপ্ত বিষয়া কল্যান কুমাৰ গগৈৰ নেতৃত্বত আৰক্ষীয়ে বিভিন্ন অপৰাধত জড়িত থকা দহটাতকৈও অধিক অপৰাধীক গ্ৰেপ্তাৰ কৰিবলৈ সক্ষম হৈছে।