সমগ্ৰ ৰাজ্য জোকাৰি যোৱা আমনিৰ ধৰ্ষণ কাণ্ডৰ মুল পাঁচজন নৰ পিশাচক আজি এটা বৃহৎ আৰক্ষীৰ দলে অভিযান চলাই কৰায়ত্ত কৰিবলৈ সক্ষম হয়। দলটোৱে তেজপুৰ ডোলাবাৰীৰ পৰা এখন চুইফট ডিজেয়াৰসহ তিনিজনক কৰায়ত্ত কৰাৰ লগতে আন দুজনক আমনিৰ পৰা কৰায়ত্ত কৰিবলৈ সক্ষম হয়।
জানিব পৰা মতে আজি পুৱা প্ৰায় ৪-৩০ মান বজাত চামগুৰি আৰক্ষী আৰু নগাঁও আৰক্ষীৰ এটা বৃহৎ দলে তেজপুৰ আৰক্ষীৰ সহযোগত গোপন সূত্ৰৰ পম খেদি ডোলাবাৰী অঞ্চলত অভিযান চলাই এ এছ ০১বি এন ৬৯৯৪ নম্বৰৰ এখন চুইফট ডিজেয়াৰ, ধৰ্ষিতা গৰাকীৰ মোবাইল ফোনসহ তিনি ধৰ্ষণকাৰীক কৰায়ত্ত কৰে।
আৰক্ষীয়ে লগতে লগতে আন দুজন ধৰ্ষণকাৰীক আমনিৰ পৰা কৰায়ত্ত কৰিবলৈ সক্ষম হয়। আটকাধীন মুল ধৰ্ষণ কাৰী কেইজন হ’ল ক্ৰমে আমনিৰ শিয়ালখাইতীৰ হাবিজ ভূঞা, তেজপুৰ ন -পামৰ মইনুল হুছেইন, তেজপুৰ নপাম পুখুৰী বস্তিৰ ছফিকুল ইছ্লাম আৰু তেজপুৰ বকুল জাৰণিৰ ৰমজান আলী আৰু আমনিৰ ৰকিবুল ইছলাম।
উল্লেখ্য যে যোৱা ২৮ আগষ্ট মঙ্গলবাৰে নিশা লংকাৰ পৰা গোলাঘাট অভিমুখে এখন বাইকত অহা এগৰাকী মহিলাক উৰিয়াগাৱঁৰ বাইপাচত ছয় নৰ পিশাচে আগুচি ধৰি বাইকখন খালত পেলাই মহিলা গৰাকীক আটক কৰি চুইফট ডিজেয়াৰত ভৰাই আমনিস্থিত আমলখী হাইস্কুলৰ পিছ ফালে নিৰ্মিয়মান খেল পথাৰত নিশা প্ৰায় দুঘন্টা পৰ্যন্ত নৰ পিশাচ কেইটায়েই বলাৎকাৰ কৰি পিছত আমনিৰ তেল ডিপুত মহিলা গৰাকীক পেলাই থৈ গৈছিল।
পৰবৰ্তী সময়ত আৰক্ষীয়ে ৩০ আগষ্ট বৃহস্পতিবাৰে অভিযান চলাই হোজাইৰ ৰামপুৰ বস্তিৰ পৰা বাইক চালক ৰাজেশ ধৰক কৰায়ত্ব কৰাৰ পিছত নগাঁও আদালতে চাৰি চেপ্টেম্বৰলৈকে ৰাজেশক আৰক্ষীৰ জিম্মালৈ প্ৰেৰণ কৰিছিল।
ধৃত ৰাজেশৰ স্বীকাৰোক্তিৰ ভিত্তিত আজি আৰক্ষীৰ এটা বৃহৎ দলে অভিযান চলাই পাঁচজন ধৰ্ষণকাৰীক আটক কৰিবলৈ সক্ষম হয়। বৰ্তমান চামগুৰি আৰক্ষীয়ে অভিযুক্তকেইজনক জেৰা অব্যাহত ৰখাৰ লগতে দুই পলাতক ধৰ্ষণকাৰীৰ বিৰুদ্ধে অভিযান তীব্ৰতৰ কৰি তুলিছে বুলি আৰক্ষীৰ এক সূত্ৰই প্ৰকাশ কৰিছে।
